އަދުގެ ސަރުކާރުގައި ރާއްޖޭގެ މާލީ ކަންކަމާއި އިގުތިޞާދީ ކަންކަން ގެންދާނެ މިސްރާބެއް ވެސް މީޒާނެއް ވެސް ނެތް ކަމަށާއި އެމްޑީޕީގެ ކޮންގްރެސްގެ ކަންބޮޑުވުން ހުއްޓެނީ އެ ހިސާބަށް ކަމަށް، އެ ޕާޓީގެ ޗެއާޕާސަން އަދި ކުރީގެ ރައީސް މުޙައްމަދު ނަޝީދު މިރޭ ވިދާޅުވެއްޖެއެވެ.
އެމްޑީޕީގެ ކޮންގްރެސް ފެށުމުގެ ގޮތުން މިހާރު ކުރިއަށްދާ ޖަލްސާގައި ވާހަކަފުޅު ދައްކަވަމުން ނަޝީދު ވަނީ ސަރުކާރުން މި ފަހުން ގާނޫނަށް ގެނައި ބަދަލުތަކަށް ވަރަށް ބޮޑަށް ފާޑުވިދާޅުވެފައެވެ.
"މި ކޮންގްރެސްގެ ކަންބޮޑުވުން ހުއްޓެނީ މިއަދުގެ ދިވެހިރާއްޖޭގެ މާލިއްޔަތާއި އަދި އިގުތިޞާދީ ކަންކަން ގެންދާނެ ގޮތުގެ މީޒާނެއް މިސްރާބެއް މި ސަރުކާރުގައި އެއްގޮތަކަށް ވެސް ނެތަތީ، އެއް ދުވަހު ވިދާޅުވީ 500 ޑޮލަރު މާރުކުރާށޭ ކޮންމެ ޓުއަރިސްޓެއްގެ ބޮލަކަށް، އަނެއް ދުވަހު ވިދާޅުވީ 20 ޕަސެންޓަށް އެ ބަދަލުކުރާށޭ، އަނެއް ދުވަހު ވިދާޅުވީ 40 ޕަސެންޓަށް އެ ބަދަލުކުރާށޭ، އަދި ބޭރުގެ ޓުއާ އޮޕަރޭޓަރުން ވެސް ރަޖިސްޓްރީކުރާށޭ ޖީއެސްޓީ ދައްކަން،" ނަޝީދު ވިދާޅުވިއެވެ.
އެކަމަކު މިއީ ފެއިލްވެފައިވާ އެއްވެސް ވަރަކަށް ތަންފީޒުނުވާ ސިޔާސަތުތަކެއް ކަމަށް، އެ މަނިކުފާނު ވިދާޅުވިއެވެ.
މި ސަރުކާރަކީ "ބަތްކައްކާ ކުޅޭ"، މީޒާނެއް އަދި މިސްރާބެއް ނެތް "ލާހޫރޭ' އިގުތިޞާދީ ސިޔާސަތުތަކެއް ގެންގުޅޭ ސަރުކާރެއް ކަމަށް ވިދާޅުވެ ނަޝީދު ވިދާޅުވިގޮތުގައި ރާއްޖޭގެ މިސްރާބު ހުރީ ކަނު ބަނދެވި ތިބެ އަނދަވަޅަކަށް ވެއްޓުމަކާ ދިމާލަށެވެ.
އެ މަނިކުފާނު ވިދާޅުވީ އެ މަގަށް ރާއްޖެ ދިއުމަށް އެމްޑީޕީން ދުލެއް ނުކުރާނަން ކަމަށެވެ.
"އަޅުގަނޑުމެން ރައީސް [ޑރ. މުޙައްމަދު] މުޢިއްޒު ބަދަލުކުރާނަން، މި ދިވެހިރާއްޖޭގެ ރައްޔިތުންނަށް އަޅުގަނޑުމެން ހެޔޮ ވެރިކަމެއް ހޯދައިދޭނަން، މި ސަރުކާރު އަޅުގަނޑުމެން ބަދަލުކުރާނަން،" ނަޝީދު ވިދާޅުވިއެވެ.
ދޮގު ހެދުމާއި މަކަރު ހެދުމާއި އޮޅުވައިލުމަކީ މި ސަރުކާރުގެ ހަމައެކަނި އަމާޒުކަމަށް ވެސް ނަޝީދު ތުހުމަތު ކުރެއްވިއެވެ. އަދި ސަރުކާރުން ރައްޔިތުންނަށް ކަމެއް ކޮށްދޭނެ ޚިޔާލެއް ވެސް ނެތް ކަމަށް ވިދާޅުވެ، ނަޝީދު ވަނީ ދަރަނި އަދާކުރުމުގެ ސިޔާސަތެއް ވެސް މި ސަރުކާރުގައި ނެތް ކަމަށް ތުހުމަތު ކުރައްވައިފައެވެ.
"އަޅުގަނޑުމެންނެއް ނުތިބޭނަން، އަޅުގަނޑުމެން ނުކުންނާނަން، އަޅުގަނޑުމެން އިރާދަކުރެއްވިއްޔާ މި ރާއްޖެ އަނެއްކާ ވެސް ބަދަލުކުރާނަން،" އެ މަނިކުފާނު ވިދާޅުވިއެވެ.
ފާހަގަކޮށްލެވޭ ގޮތުގައި، ނަޝީދު ވަނީ ދައުލަތުގެ ނިޒާމަށާއި ޕާޓީގެ ހިންގުމަށް އިސްލާހުތައް ގެނައުމަށް "ބޮޑު ބަދަލު"ގެ ނަމުގައި ހަރަކާތެއް ފައްޓަވައިފައެވެ. އަދި އެ މަނިކުފާނު އެމްޑީޕީގެ ރިޔާސީ ޕްރައިމަރީގައި ތާއިދުކުރައްވަން ނިންމަވައިފައިވަނީ، އެ ހަރަކާތުގައި އެ މަނިކުފާނާއެކު އިސްކޮށް އުޅުއްވާ، ޕާޓީގެ ކުރީގެ ޗެއާޕާސަން ފައްޔާޒު އިސްމާއީލެވެ.