ރާއްޖެއަށް އަންނަ ބޮޑެތި ބޭރުގެ އިންވެސްޓްމަންޓްތަކަކީ ގައުމުގެ ތަރައްގީގެ މައި ނާރު ކަމަށްވާއިރު، އެފަދަ މަޝްރޫއުތަކަށް ސިޔާސީ ގޮތުން ހުރަސްއެޅުމަކީ އިގުތިސާދަށް އޮތް އެންމެ ބޮޑު އެއް ނުރައްކާ ކަމާމެދު މިއަދު ވަނީ ބޮޑު ބަހުސެއް އުފެދިފައެވެ. ސިޔާސީ މަންފާއަށްޓަކައި އިންވެސްޓަރުންގެ އިތުބާރު ގެއްލުވާލުމުން ގައުމަށް ލިބޭ ގެއްލުންތަކުގެ މައްޗަށް "ސަން" ގެ އެޑިޓަރުންގެ ވަށްމޭޒު ޕްރޮގްރާމްގައި ވަނީ ފުޅާ ދާއިރާއެއްގައި އަލިއަޅުވާލާފައެވެ.
މި ޕްރޮގްރާމްގައި އެޑިޓަރުން ފާހަގަކުރި ގޮތުގައި، މާޒީގައި ހިނގާފައިވާ ކަންކަމަށް ބަލާއިރު ސިޔާސީ ހަލަބޮލިކަމުގެ ތެރެއިން ބޮޑެތި މަޝްރޫއުތައް ވަނީ ހުއްޓިފައެވެ. އޭގެ ތެރޭގައި ވެލާނާ އިންޓަނޭޝަނަލް އެއާޕޯޓު ތަރައްގީކުރަން އިންޑިއާގެ ޖީއެމްއާރާ ހަވާލުކުރުމަށްފަހު އެއްބަސްވުން އުވާލުމުން ދައުލަތަށް އުފުލަންޖެހުނު މާލީ ބުރަ ހިމެނެއެވެ. ހަމައެހެންމެ، ކުރީގެ ރައީސް އަބްދުﷲ ޔާމީންގެ ސަރުކާރުގައި ސައުދީ އަރަބިއްޔާއިން ފ. އަތޮޅުގައި ހިންގަން އުޅުނު ބިޔަ މަޝްރޫއު ސިޔާސީ ފިއްތުންތަކާ ހެދި ހުއްޓުމަކަށް އައިކަން އެޑިޓަރުން ފާހަގަކުރިއެވެ. އޭރު އިދިކޮޅު ފަރާތްތަކުން ވަނީ އެ އަތޮޅު ވިއްކާލަން އުޅޭ ކަމަށް ބުނެ ބޮޑެތި ކަންބޮޑުވުންތަކެއް ފާޅުކޮށްފައެވެ. މީގެ އިތުރުން ދިރާގާއި އެމްޑަބްލިއުއެސްސީގެ ހިއްސާ ވިއްކުމުގެ މަރުހަލާގައި ކުރިމަތިވި ސިޔާސީ ގޮންޖެހުންތަކަށް ވެސް ޕްރޮގްރާމްގައި ބަލާލާފައިވެއެވެ.
މިހާރު ރާއްޖޭގެ ސިޔާސީ މަސްރަހުގައި އެންމެ ހޫނުވެފައިވާ އެއް މައްސަލައަކީ ރަސްމާލޭގައި ޔޫއޭއީގެ އީގަލް ހިލްސް ކުންފުނިން ހިންގަން ރާވާފައިވާ 12 ބިލިއަން ޑޮލަރުގެ މަޝްރޫއެވެ. އެޑިޓަރުން ފާހަގަ ކުރި ގޮތުގައި، މި މަޝްރޫއާ ދެކޮޅަށް ވެސް ސިޔާސީ ގޮތުން އެތައް ވާހަކަތަކެއް ދެކެވެމުންދާއިރު، މިއީ އިންވެސްޓަރުންގެ ޔަގީންކަން ގެއްލިދާނެ ކަމެކެވެ. އީގަލް ހިލްސްގެ މަޝްރޫއަކީ އެތައް ހާސް ވަޒީފާއެއް އުފެދި، ދައުލަތަށް ބޮޑު އާމްދަނީއެއް ލިބޭނެ ކަމެއް ކަމަށް ސަރުކާރުން ބުނަމުންދިޔަ ނަމަވެސް، ބިމުގެ މިލްކުވެރިކަމާ ގުޅުވައިގެން އިދިކޮޅު ފަރާތްތަކުން ދަނީ ފާޑުކިޔަމުންނެވެ.
އެޑިޓަރުން މައިގަނޑު ގޮތެއްގައި އަލިއަޅުވާލީ، ސިޔާސީ ބޭނުމަށްޓަކައި ބޭރުގެ އިންވެސްޓްމަންޓްތަކާ މެދު ޝައްކު އުފައްދައި، މަޝްރޫއުތަކަށް ހުރަސްއެޅުމުން ދިގު މުއްދަތުގައި ގައުމުގެ އިގުތިސާދަށް ކުރިމަތިވާނެ މައްސަލަތަކަށެވެ. ބޭރުގެ ފަރާތްތަކުން ރާއްޖޭގައި އިންވެސްޓްކުރަން ފަސްޖެހުމަކީ ވަޒީފާގެ ފުރުސަތުތަކާއި އުމްރާނީ ތަރައްގީއަށް އެޅޭނެ ބޮޑު ހުރަހެއް ކަމަށް މި ޕްރޮގްރާމްގައި ފާހަގަކޮށްފައިވެއެވެ.