އިސްރާއީލަށް ދަތުރުކުރި ފްލައިދުބާއީގެ މަތިންދާބޯޓެއްގެ ކޯ-ޕައިލެޓް، އެ ބޯޓުގެ ކެޕްޓަނަށް ވަޅިން ހަމަލާދީ ބޯޓު ވައްޓާލަން އުޅުނު ނުރައްކާތެރި ހާދިސާއިން ބޯޓު ސަލާމަތްކުރި އިންޑިއާގެ ޕައިލެޓް ސްމިތު މައްޗަރަށް އިންޑިއާއާއި އިސްރާއީލުގެ ލީޑަރުން ތައުރީފުކޮށްފިއެވެ.
އިސްރާއީލުގެ އޮފިޝަލުންނާ ހަވާލާދީ ރޮއިޓާސްއާއި އެސޯސިއޭޓެޑް ޕްރެސް (އޭޕީ) އިން ރިޕޯޓުކޮށްފައިވާ ގޮތުގައި، މި ހާދިސާ އިއްޔެ ހިނގާފައިވަނީ ޔޫއޭއީގެ ދުބާއީން ފުރައިގެން އިސްރާއީލުގެ ޓެލްއަވީވަށް ދަތުރުކުރި ފްލައިދުބާއީގެ ބޯއިންގް 737 މަރުކާގެ ބޯޓެއްގައެވެ. އޮމާން ދަރިކޮޅުގެ ކޯ-ޕައިލެޓް ދިން ކުއްލި ހަމަލާގައި ކެޕްޓަން މައްޗަރަށް ބޮޑެތި އަނިޔާތަކެއް ލިބި، ކޮކްޕިޓް ތެރެއަށް ވެއްޓުނެވެ. އެ ވަގުތު ބޯޓު ވަރަށް ބޮޑަށް ތިރިވާން ފެށި ނަމަވެސް، މައްޗަރު ވަނީ އޭނާގެ ފުރާނައަށް ނުރައްކާވެފައިވާ ހާލަތުގައި ވެސް ކޮކްޕިޓްގެ ދޮރު ހުޅުވައިފައެވެ.
މީގެ ސަބަބުން ބޯޓުގެ ފަސިންޖަރުންނާއި ކްރޫންނަށް ކޮކްޕިޓަށް ވަދެ، ހަމަލާދިން މީހާ ހުއްޓުވުމުގެ ފުރުސަތު ލިބުނު ކަމަށް އޮފިޝަލުން ބުނެފައިވެއެވެ. އެއަށްފަހު، ފަސިންޖަރުންގެ ގޮތުގައި ދަތުރުކުރި ފްލައިދުބާއީގެ އޮފް-ޑިއުޓީ ދެ ޕައިލެޓެއްގެ އެހީތެރިކަމާއެކު، 174 މީހުންނާއެކު ދަތުރުކުރި މި ބޯޓު ވަނީ ސައުދީ އަރަބިއްޔާގެ ތަބޫކަށް ރައްކާތެރިކަމާއެކު ޖައްސައިފައެވެ. ބޯޓު ތަބޫކަށް ޖެއްސުމާ ހަމައަށް، ފަސިންޖަރެއްގެ ގޮތުގައި ދަތުރުކުރި އިސްރާއީލުގެ ޑޮކްޓަރަކު ވަނީ ކެޕްޓަން މައްޗަރަށް ފުރަތަމަ އެހީ ފޯރުކޮށްދީފައެވެ.
މި ހާދިސާއާ ގުޅިގެން އިންޑިއާގެ ބޮޑުވަޒީރު ނަރެންދުރަ މޯދީ އެކްސްގައި ކުރެއްވި ޕޯސްޓެއްގައި ވިދާޅުވި ގޮތުގައި، ކެޕްޓަން މައްޗަރަކީ ބަތަލެކެވެ. ބޮޑެތި އަނިޔާތަކެއް ލިބިފައިވަނިކޮށް އަދި ފުރާނައަށް ނުރައްކާވެފައިވާ ދަނޑިވަޅެއްގައި، އެހެން މީހުންގެ ފުރާނަ ސަލާމަތްކުރުމަށް އޭނާ ދެއްކީ އާދަޔާހިލާފު ހިތްވަރެއް ކަމަށް މޯދީ ފާހަގަކުރެއްވިއެވެ.
ހަމައެހެންމެ، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވެސް ވަނީ މައްޗަރަކީ ހަގީގީ ބަތަލެއް ކަމަށް ސިފަކުރައްވައިފައެވެ. ނަތަންޔާހޫ ވިދާޅުވި ގޮތުގައި، މައްޗަރުގެ ހުޝިޔާރުކަމުގެ ސަބަބުން ވައިގެ ތެރޭގައި ހިނގަން އުޅުނު ވަރަށް ބޮޑު ކާރިސާއަކުން 174 މީހުންގެ ފުރާނަ ވަނީ ސަލާމަތްވެފައެވެ.
އިންޑިއާ ސަރުކާރުން ބުނެފައިވާ ގޮތުގައި، ސައުދީ އަރަބިއްޔާގެ ތަބޫކުގެ ހޮސްޕިޓަލެއްގައި މައްޗަރަށް މިހާރު އަންނަނީ ފަރުވާދެމުންނެވެ. އޭނާގެ ހާލު ސްޓޭބަލް ކަމަށާއި، އިންޑިއާގެ އެމްބަސީން އޭނާގެ އާއިލާއާއި ސައުދީގެ ކަމާބެހޭ ފަރާތްތަކާ ގުޅިގެން މަސައްކަތްކުރަމުންދާ ކަމަށް ވެސް އިންޑިއާގެ ކަމާބެހޭ ފަރާތްތަކުން ބުނެފައިވެއެވެ.
އިސްރާއީލުގެ އޮފިޝަލުންނާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި، ހަމަލާދިން ކޯ-ޕައިލެޓް ވަނީ ސައުދީ އަރަބިއްޔާގެ ފުލުހުންގެ ބެލުމުގެ ދަށަށް ގެންގޮސްފައެވެ. އަދި އޭނާ އެ ހަމަލާ ދިން ސަބަބު ދެނެގަތުމަށްޓަކައި ތަހުގީގުތައް އަންނަނީ ކުރިއަށް ގެންދަމުންނެވެ.
މުމްބާއީއަށް ނިސްބަތްވާ މައްޗަރުގެ އޭވިއޭޝަން ކެރިއަރަކީ އޭނާގެ ކުޑައިރުގެ ހުވަފެނެއް ނޫނެވެ. އުމުރުން 19 އަހަރުގައި އޭވިއޭޝަން ދާއިރާއަށް ޝައުގުވެރިކަން އުފެދުމުގެ ކުރިން، އޭނާ އަމާޒުހިފާފައި ހުރީ އާއިލީ ވިޔަފާރި ކަމަށްވާ ޓެކްސްޓައިލް އިންޖިނިއަރިންގެ ދާއިރާއިން ކުރިއަށް ދިއުމަށެވެ. ނަމަވެސް، މުމްބާއީގައި ބޭއްވި އޭވިއޭޝަން ސެމިނާއަކުން ލިބުނު މައުލޫމާތާއެކު އޭނާގެ މިސްރާބު ބަދަލުކުރިއެވެ. ނިއުޒީލެންޑުން ޕައިލެޓްކަމުގެ ތަމްރީނު ހޯދުމަށްފަހު، އިންޑިއާގެ ބަޖެޓް އެއާލައިނެއް ކަމަށްވާ ސްޕައިސްޖެޓްގައި އޭނާ ވަނީ 11 އަހަރު މަސައްކަތްކޮށްފައެވެ. އެ ކުންފުނީގައި އޭނާ ވަނީ ޒުވާން ޕައިލެޓުން ތަމްރީނުކުރުމުގެ އިސް ދައުރެއް އަދާކޮށްފައެވެ. އެއަށްފަހު 2022 ވަނަ އަހަރު ފްލައިދުބާއީއާ ގުޅުނު މައްޗަރު ވަނީ ބޯއިންގް 737 މަރުކާގެ ބޯޓުތަކުގައި 9،750 އަށް ވުރެ ގިނަ ގަޑިއިރުގެ އުދުހުމުގެ ތަޖުރިބާ ހޯދާފައެވެ.
މީގެ ކުރިން 2025 ވަނަ އަހަރު ޔޫޓިއުބް ޗެނަލަކަށް ދިން އިންޓަވިއުއެއްގައި މައްޗަރު ބުނި ގޮތުގައި، ފްލައިޓް ޑިލޭވުމަކީ އޭނާއަށް މައްސަލައެއް ނޫނެވެ. އޭނާގެ އެންމެ ބޮޑު އަމާޒަކީ ފަސިންޖަރުން ރައްކާތެރިކަމާއެކު ބޯޓުން ފައިބައިގެން ދިއުން ކަމަށް އޭނާ ފާހަގަކުރިއެވެ. އަދި ކޮކްޕިޓުން ބޭރުގައި އޭވިއޭޝަންގެ ވާހަކަދައްކަން ބޭނުންނުވާ ކަމަށާއި، ޔުނީފޯމު އެޅުމަށްފަހު ހަމައެކަނި ވިސްނަނީ ވަޒީފާ ފުރިހަމަކުރުމަށް ކަމަށް ވެސް އޭނާ ބުނެފައިވެއެވެ.
މި ހާދިސާއާ ގުޅިގެން ޔޫއޭއީގެ ސިވިލް އޭވިއޭޝަން އޮތޯރިޓީންނާއި ފްލައިދުބާއީން އަންނަނީ ބޯޓުގެ ކޮކްޕިޓް ވޮއިސް ރެކޯޑަރު ދިރާސާކޮށް، އިތުރު ތަހުގީގުތައް ކުރިއަށް ގެންދަމުންނެވެ.