ފްލައިދުބާއީގެ ފަސިންޖަރު ބޯޓެއް ހައިޖެކްކުރި ކަމަށް ބުނެ ފެތުރުނު ހަބަރުތައް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން މިއަދު ދޮގުކޮށްފިއެވެ.
ބޮޑުވަޒީރުގެ ތަރުޖަމާނު ވިދާޅުވި ގޮތުގައި، އިސްރާއީލުގެ ފަސިންޖަރުންނާއެކު ދަތުރުކުރި އެ ބޯޓުގެ މިސްރާބު ބަދަލުކޮށް ސައުދީ އަރަބިއްޔާއަށް ޖައްސަން ޖެހުނީ ހައިޖެކްކޮށްގެން ނޫން ކަމަށާއި، އެއީ ސަލާމަތީ ނުރައްކަލެއް އޮތް ކަމެއް ނޫން ކަމަށެވެ. އިސްރާއީލުގެ މީޑިއާތަކުންވެސް ވަނީ މިއީ ސަލާމަތީ ހާދިސާއެއްގެ ގޮތުގައި މިހާރު ނުބަލާ ކަމަށް ރިޕޯޓުކޮށްފައެވެ.
ދުބާއީން ފުރައިގެން ތެލް އަވީވްއަށް ދަތުރުކުރި ފްލައިދުބާއީގެ ފްލައިޓް އެފްޒެޑް1073 ސައުދީ އަރަބިއްޔާގެ ތަބޫކް އެއާޕޯޓަށް ޖައްސާފައިވަނީ ކުއްލި ހާލަތުގެ ސިގްނަލްތަކެއް ފޮނުވުމަށް ފަހުގައެވެ. ފްލައިޓް ޓްރެކްކުރާ ވެބްސައިޓުތަކުން ދައްކާ ގޮތުގައި، ބޯޓުން ފުރަތަމަ އާންމު ކުއްލި ހާލަތުގެ ކޯޑު ފޮނުވުމަށްފަހު، ފަހުން ވަނީ ހައިޖެކްކުރުން ފަދަ ކަމެއް ހިނގައިގެން އުޅޭކަން އަންގައިދޭ ކޯޑު ފޮނުވާފައެވެ.
އިސްރާއީލުގެ މީޑިއާތަކުން ރިޕޯޓުކޮށްފައިވާ ގޮތުގައި، ބޯޓުގެ މިސްރާބު ބަދަލުކުރަން ޖެހުނީ ކޮކްޕިޓް ތެރޭގައި ދެ ޕައިލެޓުންގެ މެދުގައި ހިނގި ހަމަނުޖެހުމެއްގެ ތެރެއިން އޮޅިގެން އިމަޖެންސީ ބަޓަނަށް ފިތުމުންނެވެ. މި ބޯޓުގައި 174 ފަސިންޖަރުން ތިބިއިރު، އޭގެ ތެރޭގައި އިސްރާއީލުގެ 100 އެއްހާ މީހުން ހިމެނޭ ކަމަށް ރިޕޯޓުތައް ބުނެއެވެ.
ނަމަވެސް މި ހާދިސާ ހިނގަން މެދުވެރިވި ސީދާ ސަބަބު ކަމާބެހޭ ފަރާތްތަކުން އަދި ކަށަވަރުކޮށްދީފައެއް ނުވެއެވެ.
ބޯޓުން ކުއްލި ހާލަތުގެ ސިގްނަލް ފޮނުވުމާ ގުޅިގެން އިސްރާއީލުގެ އަސްކަރިއްޔާއިން ވަނީ ފައިޓާ ޖެޓުތައް ނެރެ، ސަލާމަތީ ފިޔަވަޅުތައް ވަރުގަދަކޮށްފައެވެ. އަދި ބޮޑުވަޒީރު ނަތަންޔާހޫއާއި ދިފާއީ ވަޒީރު ވަނީ ސަލާމަތީ އިދާރާތަކާއެކު ކުއްލި ބައްދަލުވުމެއް ބާއްވަވާފައެވެ.
އިސްރާއީލުގެ ޗެނަލް 12 އިން ރިޕޯޓުކޮށްފައިވާ ގޮތުގައި، މި މަޝްވަރާތަކަށްފަހު ސަލާމަތީ އިދާރާތަކުން ވަނީ އެއީ ޓެރަރިޒަމްގެ އަމަލެއް ނޫންކަން ކަށަވަރުކޮށްފައެވެ.
އިސްރާއީލުގެ ނޫސްތަކުން ބުނާ ގޮތުގައި، ބޯޓު ސައުދީއަށް ޖެއްސުމާއެކު، ފަސިންޖަރުން އަނބުރާ ގެނައުމުގެ މަސައްކަތް ކަމާބެހޭ ފަރާތްތަކުން ވަނީ ފަށާފައެވެ. އަދި މައްސަލަ ތަހުގީގުކުރުމަށް ފްލައިދުބާއީން ދަނީ ކަމާބެހޭ އިދާރާތަކާ ގުޅިގެން މަސައްކަތް ކުރަމުންނެވެ.