ޔުނައިޓެޑް އަރަބް އެމިރޭޓްސް (ޔޫއޭއީ) ގެ ދުބާއީއިން ފުރައިގެން އިސްރާއީލުގެ ޓެލްއަވީވަށް ދަތުރުކުރި ފްލައިދުބާއީގެ ފްލައިޓެއްގައި މައްސަލައެއް ދިމާވެ، ސައުދީ އަރަބިއްޔާގެ ތަބޫކަށް މިއަދު ސަލާމަތުން ޖައްސައިފިއެވެ.
ފްލައިދުބާއީގެ ތަރުޖަމާނަކާ ހަވާލާދީ ގަލްފް ނިއުސްއިން ރިޕޯޓުކޮށްފައިވާ ގޮތުގައި، އެފްޒެޑް 1073 ފްލައިޓު ތަބޫކް އެއާޕޯޓަށް ޖައްސާފައިވާއިރު، ފްލައިޓުގައި ތިބި ހުރިހާ ފަސިންޖަރުން ތިބީ ސަލާމަތުންނެވެ. އަދި ކަމާބެހޭ ފަރާތްތަކާ ގުޅިގެން އެ ކުންފުނީގެ ޓީމުތަކުން މަސައްކަތްކުރަމުން އަންނަ ކަމަށާއި، އިތުރު މައުލޫމާތު ލިބެމުންދާ ވަރަކަށް ހާމަކުރާނެ ކަމަށް ތަރުޖަމާނު ބުނެފައިވެއެވެ. ފަސިންޖަރުންނާއި ކުރޫއިންގެ ސަލާމަތާއި ރައްކާތެރިކަމަކީ އެ ކުންފުނިން އެންމެ އިސްކަންދޭ ކަންތައް ކަމަށް ވެސް ފްލައިދުބާއީން ބުނެފައިވެއެވެ.
ފްލައިޓްރާޑާ24 ގެ ތަފާސްހިސާބުތަކާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި، މި ފްލައިޓުން ފުރަތަމަ ވަނީ ގަވާއިދާ ހިލާފު އަމަލެއް ހިނގައިގެން އުޅޭކަން އަންގައިދޭ ކޯޑު ކަމަށްވާ 7500 އަށް ސްކުއޯކްކޮށްފައެވެ. އެއަށްފަހު ތަބޫކާ ކައިރިން 5،000 ފޫޓު މަތިން އުދުހެމުން ދިޔައިރު، އާންމު ކުއްލި ހާލަތްތަކުގައި ބޭނުންކުރާ ކޯޑު ކަމަށްވާ 7700 އަށް ބަދަލުކޮށްފައިވެއެވެ.
ނަމަވެސް މި ހާދިސާއާ ގުޅޭ އިތުރު ތަފުސީލެއް ފްލައިދުބާއީން އަދި ހާމަކޮށްފައެއް ނުވެއެވެ.
އިސްރާއީލުގެ އޮފިޝަލުންނާ ހަވާލާދީ ރިޕޯޓުކޮށްފައިވާ ގޮތުގައި، މި ހާދިސާ ހިނގަން މެދުވެރިވީ ފްލައިޓު ދުއްވަން ތިބި ޕައިލެޓުންގެ މެދުގައި ހިނގި ދެބަސްވުމަކާ ގުޅިގެންނެވެ. މިކަމާ ގުޅިގެން އިސްރާއީލުގެ އަސްކަރިއްޔާގެ ޗީފް އޮފް ސްޓާފް ލެފްޓިނެންޓް ޖެނެރަލް އިޔާލް ޒާމިރު ވަނީ ހާލަތު ވަޒަންކުރެއްވުމަށް އިސް އޮފިޝަލުންނާއެކު ބައްދަލުވުމެއް ބާއްވާފައެވެ. މި ބައްދަލުވުމުގައި އިސްރާއީލުގެ ވައިގެ އަސްކަރިއްޔާގެ ވެރިޔާއާއި އިންޓެލިޖެންސް ޑައިރެކްޓަރޭޓްގެ ވެރިޔާ ވެސް ބައިވެރިވެވަޑައިގެންނެވި ކަމަށް އިސްރާއީލުގެ އަސްކަރިއްޔާއިން ބުނެފައިވެއެވެ.