އެޑްވެންޗާ އަޕުން އިންތިޒާމުކޮށްގެން ކުރިއަށް ގެންދާ އައިލެންޑް ކާނިވަލާއެކު ކުޅުދުއްފުށި ސިޓީއަށް އަންނާނީ މުނިފޫހިފިލުވުމާއި ވިޔަފާރީގެ ބޮޑު އީދެއް ކަމަށް އެ ސިޓީގެ މޭޔަރު މުހައްމަދު އާތިފް މިއަދު ވިދާޅުވެއްޖެއެވެ.
ބޮޑުތިލަދުންމަތީގެ ބޮޑު ބާޒާރާއެކު، އައިލެންޑް ކާނިވަލް ފަށާނީ މަދާމާއެވެ.
އަންނަ އާދިއްތަ ދުވަހުގެ ނިޔަލަށް ކުރިއަށްދާ މި ހަރާކާތާ ގުޅުވައި 'ސަން'އަށް ދެއްވި އިންޓަވިއުއެއްގައި މޭޔަރު ވިދާޅުވީ، އެ ބާޒާރަކީ ބޮޑުތިލަދުންމަތީގެ އިގުތިޞާދީ ހަރަކާތްތައް އިތުރުކޮށް، ކުޅުދުއްފުށީގެ އިގުތިޞާދު ފުޅާކުރުމަށް ކުރިއަށް ގެންދާ ކަމެއް ކަމަށެވެ.
ކުޅުދުއްފުށި ސިޓީގެ މޭޔަރު މުހައްމަދު އާތިފު 'ސަން'އަށް އިންޓަވިއު ދެއްވަނީ --- ސަން ފޮޓޯ/ މުހައްމަދު ޝާންމިގޮތުން، އާ ވިޔަފާރިވެރިން އުފައްދައި، އިތުރު ވިޔަފާރީގެ ފުރުސަތުތައް ފަހިކޮށްދިނުމަކީ އެ ހަރަކާތުގެ މަގުސަދެއް ކަމަށް އާތިފް ވިދާޅުވިއެވެ. އަދި، އެ ކައުންސިލުގެ އެންމެ ބޮޑު އަމާޒަކީ މި ހަރަކާތުގެ ތެރެއިން އެ ސަރަހައްދުގެ ރައްޔިތުންނަށް ހެޔޮ އަގުގައި ކޮންމެ ދުވަހެއްގެ މުދާ ފޯރުކޮށްދިނުން ކަމަށް މޭޔަރު ވިދާޅުވިއެވެ.
އާތިފް ފާހަގަކުރެއްވި ގޮތުގައި، މި ހަރަކާތުގެ ތެރޭގައި ރަށްތަކުގެ ރައްޔިތުންނަށް އާންމުކޮށް ތަޖުރިބާ ނުކުރެވޭ ފަދަ މުނިފޫހިފިލުވުމުގެ ހަރަކާތްތައް ހިމެނެއެވެ. އޭގެތެރޭގައި، ލޭޒާ ޓެކާއި ބުލް ބޭޝް ހިމެނެއެވެ.
މޭޔަރު ވިދާޅުވީ، މި ހަރަކާތުގައި ހިމަނާ ބިރުވެރި ހޮހަޅަ ތައްޔާރުކޮށްފައި ވަނީ ރާއްޖޭން ބޭރުން ކަމަށާއި އެ ހޮހަޅަ އިންސްޓޯލް ކުރުމުގެ މަސައްކަތް ކުރިއަށްދާ ކަމަށެވެ.
"އަޅުގަނޑު ދަންނަވާނީ ވިޔަފާރީގެ އަދި އެންޓަޓެއިންމަންޓުގެ ބޮޑު އީދެކޭ ކުޅުދުއްފުއްޓަށް މި އަންނަނީ" މޭޔަރު ފާހަގަކުރެއްވިއެވެ.
މި ހަރަކާތް އިންތިޒާމުކުރާ އެޑްވެންޗާ އެޕުން މައުލޫމާތު ދޭ ގޮތުގައި، މިއީ ވިޔަފާރިތަކުން އުފެއްދުންތައް މާކެޓުކުރުމަށާއި ލޯންޗުކުރުމަށް ވަރަށް ރަނގަޅު ފުރުސަތަކަށް ވާނެއެވެ. މި ކާނިވާ ތައާރަފުކުރީ ވެސް، އުފާވެރި މާހައުލަކުން މުޖުތަމައުގެ އެންމެން ދިމާވުމަކީ ލިބެން ޖެހޭ ފުރުސަތެއް ކަމަށް ގަބޫލުކުރާތީ ކަމަށް އެ ކުންފުނިން ފާހަގަކުރެއެވެ.
މި ފަހަރުގެ އައިލެންޑް ކާނިވަލްގެ މީޑިއާ ޕާޓްނަރަކީ އެސްއެސް މީޑިއާއެވެ.