އެފްއޭއެމް ފުޓްސަލް ޗެމްޕިއަންޝިޕްގެ އުތުރު ޒޯން 2 ގައި ރ. ދުވާފަރާއި ނ. މަގޫދޫ އަތުން ބަލިވެ، ފުޓްސަލް އަދި ފުޓުބޯޅައިގެ ވަރުގަދަ ބ. އޭދަފުށި ކަޓައިފިއެވެ.
ޒޯން ބުރުގައި ކުޅުނު ދެ މެޗުންވެސް ބަލިވެ އޭދަފުށި ކެޓިއިރު، ފުރަތަމަ މެޗުގައި ރ. ދުވާފަރު އަތުން ބަލިވީ 2-1 ގެ ނަތީޖާއަކުންނެވެ. އަދި ދެވަނަ މެޗުގައި ނ. މަގޫދޫ އަތުންވެސް ބަލިވީ 2-1 ގެ ނަތީޖާއަކުންނެވެ.
ނ. މަނަދޫ ފުޓްސަލް ދަނޑުގައި ކުރިއަށްދާ ޒޯން ބުރުގައި މަގޫދޫއާ ދެކޮޅަށް އޭދަފުށި ކުޅުނު މެޗުގެ މުޅި ކޮންޓްރޯލް ނަގައިގެން އޭދަފުށިން ކުޅުނު ނަމަވެސް، މެޗުގެ 4 ވަނަ މިނެޓުގައި މުހައްމަދު އިހުސާން ވަނީ މަގޫދޫއަށް ކުރިހޯދައިދީފައެވެ.
އެފްއޭއެމް ފުޓްސަލް ޒޯން ބުރުގައި އޭދަފުއްޓާއި މަގޫދޫ ބައްދަލުކުރި މެޗުގެ ތެރެއިން-- ފޮޓޯ: އަޙްމަދު މާހް ދެވަނަ ހާފު ފަށައިގެން އަހުމަދު ބައްސާމް މުހައްމަދު ނައީމް (ބައްކު) ގޯލެއް ޖަހައި އޭދަފުއްޓަށް ނަތީޖާ އެއްވަރުކޮށްދިނެވެ. ނަމަވެސް، މެޗުގެ ފަހު މިނެޓުގައި އޭދަފުށިން 'ޕަވަރ ޕްލޭ' އަށް ނުކުތް ވަގުތު، މަގޫދޫގެ ތަޖުރިބާކާރު ކުޅުންތެރިޔާ މުހައްމަދު އައްޒާމް ވަނީ ކައުންޓާ އެޓޭކެއްގައި ހުސް ގޯލުގެ ތެރެއަށް ބޯޅަ ވައްދާލައިގެން މަގޫދޫ މޮޅުކޮށްދީފައެވެ.
މި ނަތީޖާއާއެކު ގްރޫޕް ބީ އިން ސެމީ ފައިނަލަށް ހޮވުނީ މަގޫދޫއާއި ދުވާފަރެވެ.
2024 ވަނަ އަހަރުގެ ގޯލްޑަން ފުޓްސަލް ޗެމްޕިއަންކަން ހޯދައި، މީގެ ކުރިން ބޭއްވި 8 މުބާރާތުގައިވެސް މަދުވެގެން ކުއާޓާ ފައިނަލާ ހަމައަށް ދިޔަ އޭދަފުށި ޒޯން ބުރާ ހިސާބުން ކެޓުމަކީ އެރަށުގެ ފުޓްސަލް ތާރީހުގައި ކުރިމަތިވި ބޮޑު ނާކާމިޔާބީއެކެވެ.