ބައިނަލްއަގުވާމީ އެކުވެރިކަމުގެ ފުޓްބޯޅަ މެޗެއްގައި އަމިއްލަ ގައުމުގައި ކުޅެ، 5-0 ގެ ތަފާތު ބޮޑު ނަތީޖާއަކުން ދިވެހިރާއްޖެ ބަލިކޮށް ކިރްގިސްތާނުން 29 އަހަރަށްފަހު އެ ޓީމު އަތުން ފުރަތަމަ މޮޅު ހޯދައިފިއެވެ.
މިއީ 12 އަހަރުގެ މެދުކެނޑުމަކަށް ފަހު މި ދެ ގައުމު ބައްދަލުކުރި ފުރަތަމަ ފަހަރެވެ. މީގެ ކުރިން ކުޅުނު ހަތަރު މެޗުގެ ތެރެއިން 2011 ގެ އެކުވެރިކަމުގެ މެޗުން 2-1 ގެ ނަތީޖާއަކުން އަދި 2014 ގެ އޭއެފްސީ ޗެލެންޖު ކަޕުން 2-0 ރާއްޖެ މޮޅުވެފައިވީ ނަމަވެސް، އެންމެ ފުރަތަމަ 1997 ގެ ވޯލްޑް ކަޕް ކޮލިފައިންގައި ކިރްގިސްތާނުން ވަނީ 3-0 އާއި 6-0 އިން ރާއްޖެ ބަލިކޮށްފައެވެ.
މީގެ ހަތަރު ދުވަސް ކުރިން ޗައިނާ އަތުން 3-0 އިން ބަލިވި މެޗުގެ ފުރަތަމަ އެގާރައަށް ބަދަލުތަކެއް ގެނެސްގެން ރާއްޖެ މިރޭގެ މެޗަށް ނުކުތް ނަމަވެސް، ފުރަތަމަ ހާފުގައި ދިވެހި ޓީމަށް ހެދުނު ބޮޑެތި ގޯސްތަކުގެ ފައިދާ ނަގައި ކިރްގިސްތާނުން ވަނީ ފަސް ލަނޑުގެ ބޮޑު ލީޑެއް ނަގައިފައެވެ.
ފުރަތަމަ ހާފުގައި ކިރްގިސްތާނުން ފަސް ލަނޑު ޖެހީ ދިވެހި ޓީމުގެ ޑިފެންސާއި ކީޕަރަށް ހެދުނު ބޮޑެތި ގޯސްތަކުގެ ފައިދާ ނަގައިގެންނެވެ. އެގޮތުން 10 ވަނަ މިނިޓްގައި ކީޕަރު ހުސެއިން ޝަރީފް އާއި ކެޕްޓަން ސަމޫހު އަލީ (ސަމުއްޓެ) އަށް ބޯޅަ ސާފުކޮށްނުލެވިގެން އަޓަބައޭވް އެރްބޯލް ފުރަތަމަ ލަނޑު ޖެހިއިރު، 19 ވަނަ މިނިޓްގައި ކީޕަރު ހުސެން އަތުން ބޯޅަ ކަސިޔާރުވެގެން އަސްތަނަކުލޯވް ޝިރޯޒުދީން ވަނީ ދެވަނަ ލަނޑު ކާމިޔާބުކޮށްފައެވެ.
އޭގެ ފަހުން އޭރިއާ ތެރެއަށް ހުރަސްވި ދެ ބޯޅައަކުން އަޓަބައޭވް އާއި މުރްޒަކޯވް ވަލެރީ ތިންވަނަ އަދި ހަތަރުވަނަ ލަނޑު ޖެހިއިރު، ފަސްވަނަ ލަނޑު ކޯޖޯ ކާމިޔާބުކުރީ ހައިޝަމް ހަސަން (ބިޑި) ފަހަތަށް ދިން ބޯޅައެއް ޑިފެންޑަރު އަމްދާން އަލީ (އެންޑީ) އަށް ކޮންޓްރޯލް ނުކުރެވުމުގެ ފައިދާ ނަގައިގެންނެވެ.
މީގެ އިތުރުން އެންޑީ ބޮލުން ފޮނުވާލި ބޯޅައެއް ހުރަސްދަނޑި މަތިން ދިޔައިރު، މުޒްދާން ހަސަންއަށް އޭރިއާ ތެރެއިން ކުރި ފައުލަކަށް ޕެނަލްޓީއެއް ނުދޭން ރެފްރީ ނިންމިއެވެ.
ދެވަނަ ހާފަށް ރާއްޖެއިން ނުކުތީ އިބްރާހިމް މަހުދީ (ފޭދޫ އިއްބެ)، އަލީ ފާސިރު (ސެންޓޭ)، އަހުމަދު މާއިޝް ރަޝީދު އަދި ހުސެއިން ސިފާއު ޔޫސުފް (ކުރޯ) އާއެކު ހަތަރު ބަދަލެއް ގެނެސްގެންނެވެ.
މިއާއެކު ދިވެހި ޓީމުގެ ކުޅުން ރަނގަޅުވެ، ކިރްގިސްތާނުގެ ބައެއް ހަމަލާތައް ކީޕަރު ހުސެން މަތަކުރިއިރު، 63 ވަނަ މިނިޓްގައި ކައުންޓަ އެޓޭކެއްގައި ސެންޓޭ ފޮނުވާލި ނުރައްކާތެރި ހަމަލާ އަމާޒުވީ ގޯލުގެ އަރިމަތީ ދާގަނޑަށެވެ.
މެޗުގެ 78 ވަނަ މިނިޓްގައި ކިރްގިސްތާންގެ ޝުކުރޯވް އަލިމަރްޑޯން ފޮނުވާލި ބޯޅައެއް ސަމުއްޓެ ފައިގައި ޖެހިފައި ދަނޑީގައި ޖެހިފައި ބޭރަށް ދިޔައިރު، އިތުރު ލަނޑެއް ނުޖެހި މެޗު ނިމުނީއެވެ.
މި މެޗަށްފަހު ރާއްޖެއަށް ދެން އެންމެ އަވަހަށް އޮތީ އަންނަ ބުރާސްފަތި ދުވަހު ލުބުނާނާ ދެކޮޅަށް ކުޅޭ މެޗެވެ.