އިންޑިއާގެ މަގުބޫލު ފިލްމު ޑައިރެކްޓަރު ޕްރިޔާދަރުޝަންގެ އާ ފިލްމު "ހައިވާން" ސިނަމާތަކަށް ގެންނަ ތާރީޚު އިއުލާނުކޮށްފިއެވެ.
އަހަރުތަކަކަށްފަހު އަކްޝޭ ކުމާރާއި ސައިފް އަލީ ޚާން އެކުގައި މަސައްކަތްކޮށްފައިވާ ފިލްމު "ހައިވާން" ސިނަމާތަކަށް ގެންނަން ނިންމާފައި ވަނީ އަންނަ އަހަރުގެ ސެޕްޓެމްބަރު މަހުގެ 11 ވަނަ ދުވަހެވެ.
ފިލްމު ރިލީޒްކުރާ ތާރީޚު އިއުލާނުކުރަމުން އެ ފިލްމު އުފައްދާ ކޭވީއެން ޕްރޮޑަކްޝަނުން ސޯޝަލް މީޑިއާގައި ނެރުނު ޕޯސްޓެއްގައި ބުނީ، މިއީ ބެލުންތެރިންގެ ހަނދާނުން ފޮހެލަން ދަތި އެތައް ހާދިސާތަކެއް އޭގައި ހިމެނޭނެ ފިލްމެއް ކަމަށެވެ.
މި ފިލްމުގައި އަކްޝޭއާއި ސައިފްގެ އިތުރުން ޝްރިޔާ ޕިލްގާއޮންކަރް އަދި ސަޔާމީ ޚޭރް ވެސް މުހިންމު ރޯލްތައް ކުޅެފައިވެއެވެ.
މަލަޔާޅަމް އެކްޓަރު މޯހަންލާލް, ސައިފް އަލީ ޚާން ޑައިރެކްޓަރު ޕްރިޔާދަރުޝަންއާ އެކު -- ފޮޓޯ/ އެންޑީޓީވީ
ފިލްމު "ހައިވާން" އަކީ 2016 ވަނަ އަހަރު ޕްރިޔަދަރްޝަން އުފެއްދި ކާމިޔާބު މަލަޔާޅަމް ފިލްމު "އޮއްޕަމް"ގެ ހިންދީ ރީމޭކެކެވެ. މަލަޔާޅަމް ފިލްމުގައި ކުޅަދާނަ އެކްޓަރު މޯހަންލާލް އަދާކުރި ލޮލަށް ނުފެންނަ މީހެއްގެ ރޯލުން، ހިންދީ ރިމޭކްގައި ފެންނާނީ ސައިފް އަލީ ޚާންއެވެ. މި ފިލްމުގެ ވާހަކަ ބިނާވެފައި ވަނީ މީހަކު މަރާލާތަން ފެންނަ މީހަކު، ގާތިލެއްގެ ކިބައިން ކުޑަކުއްޖަކު ސަލާމަތްކުރުމަށް ކުރާ މަސައްކަތުގެ މައްޗަށެވެ.
ޚާއްސަ ކަމެއްގެ ގޮތުން، މި ފިލްމުގެ ހިންދީ ރީމޭކުން މަލަޔާޅަމް ފިލްމުގެ އެކްޓަރު މޯހަންލާލްގެ ޚާއްސަ ފެނިލުމެއް ވެސް ފެންނާނެއެވެ. ސައިފް އާއި މޯހަންލާލް އާއެކު ފިލްމުގެ ސެޓުގައި ނަގާފައިވާ ފޮޓޯއެއް ހިއްސާކުރަމުން ޕްރިޔާދަރުޝަން ބުނީ، އެ ދެ ތަރިންނާ އެކު އަލުން މަސައްކަތްކޮށްލަން ލިބުމަކީ، ލިބުނު ބޮޑު އުފަލެއް ކަމަށެވެ.