މިރޭ އެމްޑީޕީގެ ދެ ރައީސުންނާއި ކުރީގެ ރައީސް އަބްދުﷲ ޔާމީން އަބްދުލްގައްޔޫމް ބައްދަލުކުރައްވާއިރު، އެ ބޭފުޅުންގެ ޚިޔާލު ތަފާތުވުންތައް އެއް ފަރާތަށް ޖައްސަނީ ގައުމުގެ ހައްގުގައި ކަމަށް ޔާމީން ރޭ ވިދާޅުވެއްޖެއެވެ.
ކޯޓު އަމުރަކާ ޚިލާފުވި ކަމަށް ބުނާ މައްސަލައެއްގައި ދެ ނޫސްވެރިން ވަނީ ޖަލަށްލާފައެވެ.
އެ މައްސަލައިގައި ކަންބޮޑުވުން ފާޅުކުރަނިކޮށް، ކުރީގެ ތިން ރައީސުން ޚިޔާލު ތަފާތުވުންތައް އެއްކިބާކޮށް، އެކުގައި ގައުމު ސަލާމަތްކުރަން ނުކުންނަވަން އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް ވަނީ ގޮވާލައްވާއެވެ. އެ ގޮވާލެއްވުމަށް ތާއިދުކުރައްވައި، ތިން ރައީސުން މިރޭ ބައްދަލުކުރައްވާނެއެވެ.
އެ ކަމަށް އިޝާރަތްކުރައްވައި ޕީއެންއެފްގެ ރޭގެ ޖަލްސާގައި ޔާމީން ވިދާޅުވީ، ކޮންމެ ރައީސެއްގެ ވެރިކަމުގައި ވެސް ނޫސްވެރިކަމުގެ މިނިވަންކަން ހިފެހެއްޓި ކަމަށާއި އެއީ ތަބީއީ ކަމެއް ކަމަށެވެ.
ކުރީގެ ރައީސް ޔާމީން: ވިދާޅުވީ، ތިން ރައީސުންގެ ޚިޔާލު ތަފާތުވުންތައް އެއް ފަރާތަށް ޖައްސަނީ ގައުމުގެ ހައްގުގައި ކަމަށް --- ފޮޓޯ/ ޗެނަލް13
ނަމަވެސް، ނޫސްވެރިންނަށް މިނިވަންކަން ދިނުމުގައި އެ ވެރިކަންތަކުގައި ކަންތައް ކޮށްފައި ހުރި ގޮތަށް ވެސް ބަލަން ޖެހޭނެ ކަމަށް އެ މަނިކުފާނު ވަނީ ވިދާޅުވެފައެވެ. ޔާމީން ވަނީ އިއްޔެ ސަރުކާރުގެ އިސް ތަރުޖަމާނު ހުސައިން ޝަރީފް (މުންދު) ވިދާޅުވި ވާހަކައަކަށް ވެސް އިޝާރަތްކުރައްވާފައެވެ.
އިއްޔެ މުންދު ވިދާޅުވީ، ކޮންމެ ރައީސަކީ އަނެއް ރައީސަކު ހައްޔަރުކުރައްވައި 'މެއިން ރައިވަލް' ކަމަށް ވިދާޅުވި ބޭފުޅުން ކަމަށެވެ. އެ ވާހަކަ ދޮގުކުރައްވައި، ޔާމީން ވަނީ މުންދުއަށް ރައްދެއް ދެއްވާފައެވެ.
އެ ގޮތުން، ކުރީގެ ރައީސް އިބްރާހިމް މުހައްމަދު ޞާލިހުގައި ސަރުކާރުގައި އެ މަނިކުފާނު ޖަލަށްލުމުން ހިތްހަމަޖެހިވަޑައިނުގެން ނަމަވެސް، ޞާލިހާ 'އެއްގަލަކަށް' އެރީ އެއަށް ވުރެ ބޮޑު ގޯހަކުން ގައުމު ސަލާމަތްކުރަން ކަމަށް ޔާމީން ވިދާޅުވިއެވެ.
މީގެ އިތުރުން، ތިން ރައީސުން އެކުގައި ބައްދަލުކުރައްވާ ސަބަބު ވެސް އެ މަނިކުފާނު ވަނީ ކިޔައިދެއްވާފައެވެ.
ހައްޔަރުކުރި ނަމަވެސް އަޅުގަނޑުމެންގެ ޚިޔާލު ތަފާތުވުންތައް އެއް ފަރާތަށް މި ޖައްސަނީ މުޅި ގައުމުގެ ހައްގުގައި. އެ ތިން ރައީސުންގެ ތެރޭގައި އުފެދިގެން މި އުޅުނު މަސްލަހަތަށް ވުރެ، ރައްޔިތުންނަށް މިހާރު ވެރިކަމުގައި މި ހުރި މީހާ ހުރެގެން ކުރާ އުނދަގޫ މާ ބޮޑު، ކުރީގެ ރައީސް އަބްދުﷲ ޔާމީން އަބްދުލްގައްޔޫމް
ޔާމީން އެފަދައިން ވިދާޅުވިއިރު މިއީ އެމްޑީޕީގެ ކުރީގެ ދެ ރައީސުންނާ އެކު ޔާމީން މަޝްވަރާކުރައްވާ ފުރަތަމަ ފަހަރެވެ. އެއީ، މި ވަގުތު ސިޔާސީ މައިދާނުގައި ތިއްބެވި އެންމެ ނުފޫޒު ގަދަ ތިން ރައީސުން ކަމަށްވުމުން މިއީ ތާރީޚީ ކަމެކެވެ.