ސަރުކާރުން ޖަލަށްލާފައިވާ 'އަދަދު' ނޫހުގެ ދެ ނޫސްވެރިން ވަގުތުން މިނިވަންކޮށް، އެ ނޫސްވެރިންގެ މައްޗަށް ހިންގަމުންދާ ޝަރީއަތްތައް ހުއްޓާލުމަށް ރާއްޖޭގެ ކުރީގެ ތިން ރައީސުން ކަމަށްވާ ރައީސް އިބްރާހީމް މުޙައްމަދު ޞާލިޙާއި، ރައީސް މުޙައްމަދު ނަޝީދު އަދި ރައީސް ޢަބްދުﷲ ޔާމީން ޢަބްދުލްޤައްޔޫމް ސަރުކާރަށް ގޮވާލައްވައިފިއެވެ.
މި ތިން ރައީސުން މިކަމަށް ގޮވާލެއްވީ ގައުމުގެ މިހާރުގެ ހާލަތާ ގުޅޭގޮތުން މަޝްވަރާ ކުރެއްވުމަށްފަހު ބޭއްވި ގުޅިފައިވާ ނޫސްވެރިންގެ ބައްދަލުވުމެއްގައެވެ.
މިއީ ގައުމުގެ ހާލަތު ރަނގަޅު ކުރުމަށްޓަކައި ތިން ރައީސުން ގުޅިގެން ކުރައްވާ މަސައްކަތުގެ ތެރެއިން ހުށަހެޅުއްވި ފުރަތަމަ ޑިމާންޑެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް ޔާމީން ވިދާޅުވީ، މި ސަރުކާރުން ނޫސްވެރިކަމުގެ މިނިވަންކަމަށް ބޮޑެތި ހުރަސްތަކެއް ކުރިމަތިކުރަމުންދާ ކަމަށެވެ. އެގޮތުން ނޫސްވެރިންނަށް އަމާޒުކޮށް 'ގެގް އޯޑަރެއް' ނެރެފައިވާކަން ފާހަގަކުރައްވައި، އެ އޯޑަރުގެ ދަށުން މިހާރުވެސް ދެ ނޫސްވެރިއަކު ޖަލަށްލާފައިވާ ކަމަށާއި، އިތުރު ދެ ނޫސްވެރިއެއްގެ މައްޗަށް ޝަރީއަތް ހިންގަމުންދާ ކަމަށް އެމަނިކުފާނު ވިދާޅުވިއެވެ.
ރައީސް ޔާމީން އިތުރަށް ވިދާޅުވީ، ވޭތުވެދިޔަ 20 އަހަރު ސިޔާސީ މައިދާނުގައި މަސައްކަތް ކުރެއްވި ތިން ބޭފުޅުންގެ ހައިސިއްޔަތުން، ގައުމުގެ މަސްލަހަތު ރައްކާތެރިކުރުމުގެ ޒިންމާއެއް އެބައޮތް ކަމަށެވެ.
"އަޅުގަނޑުމެންގެ އެތެރޭގެ ކޮންޝެންސް އެބަ ބުނޭ، ރާއްޖޭގެ ސްޓްރެސް ލެވެލް މިވަރަށް އުފުލިގެންދާއިރު އަޅުގަނޑުމެންގެ ޒިންމާއެއް އެބަ އޮތް،" ޔާމީން ވިދާޅުވިއެވެ.
ތިން ރައީސުން ބޭއްވި ނޫސްވެރިންގެ ބައްދަލުވުމުގައި ރައީސް ޞާލިޙު ވާހަކަފުޅުދައްކަވަނީ -- ސަން ފޮޓޯ/ ޝާތިއު އަބްދުﷲ
ކުރީގެ ރައީސް އިބްރާހީމް މުޙައްމަދު ޞާލިޙު ވިދާޅުވީ، ތިން ރައީސުން އެކީގައި ނުކުންނަވަން ޖެހިވަޑައިގަތީ ގައުމު މިހާރު އޮތް ހާލަތުން ސަލާމަތް ކުރުމަށް އިސްވެ ކަންތައްތަކެއް ކުރަން ޖެހިއްޖެ ކަމަށް ގަބޫލުކުރެއްވޭތީ ކަމަށެވެ.
ސޯލިހު ވިދާޅުވީ ގައުުމުގެ ކަންކަން ދަނީ ހީކުރި ވަރަށް ވުރެ ވެސް ގޯސް މަގުން ކަމަށާއި އެހެން ކަމުން ގައުމު ސަލާމަތް ކުރުމަކީ މިއަދު ހަމަ ކޮންމެ ރައްޔިތަކުމެ ކުރަން ޖެހޭނޭ ކަމެއް ކަމަށެވެ.
ސޯލިހު ވިދާޅުވީ މިވަގުތު އެންމެ މުހިންމު ކަމެއް ދީގެން އެންމެ އިސްކަމެއްގެ ގޮތުގައި ކުރަން ޖެހޭނޭ ކަމަކީ ސަރުކާރު ޖަވާބުދާރީ ކުރަން، ޚިޔާލުފާޅުކުރުމުގެ މިނިވަން ކަމަށް އޮތް ހުރަސް ނައްތާލުން ކަމަށެވެ. އެގޮތުން މިވަގުތުން ވަގުތައް ޖަލަށްލާފައިވާ އަދަދު ނޫހުގެ ދެ ނޫސްވެރިން ދޫކޮށް ލުމަށާއި އިތުރު ދެ ނޫސްވެރިއެއްގެ މައްޗައް ހިންގާ ޝަރީއަތް ވަގުތުން ހުއްޓާލުމަށް ވަނީ ގޮވާލައްވާފައިއެވެ.
ކުރީގެ ތިން ރައީސުން މަޝްވަރާކޮށް އެކުގައި މަސައްކަތް ކުރައްވަން ނިންމަވައި އެއްބަސްވުމަކަށް އައީ ރައީސް ޑރ. މުޙައްމަދު މުޢިއްޒުގެ ސަރުކާރުން ރައްޔިތުންގެ އަސާސީ ހައްގުތަކަށް އަރައިގަނެ، ޝަރުއީ ދާއިރާއަށާއި ރައްޔިތުންގެ މަޖިލީހަށް ނުފޫޒު ފޯރުވަމުންދާ ކަމަށް ވިދާޅުވެފައެވެ. މި އެއްބަސްވުމުގެ މައިގަނޑު ބޭނުމަކީ ގައުމުގެ މިނިވަން މުއައްސަސާތަކުގެ މުސްތަގިއްލުކަން ގެއްލި، ޑިމޮކްރަސީގެ ހަމަތައް ފޮހެވުމުންދާތީ ގައުމު އަލުން ހަމަމަގަށް އެޅުން ކަމަށް ވިދާޅުވިއެވެ. އަދި ސަރުކާރުގެ ތެރޭގައި ހުރި ނުރަނގަޅު ކަންކަން އިސްލާހު ކުރުމަށް ސަރުކާރު ނުކުޅެދިފައިވާ ކަމަށް ވެސް ވިދާޅުވިއެވެ.