މިއަދުން ފެށިގެން ދެ އަހަރުގެ މުއްދަތަކަށް ކާބޯތަކެތީގެ ޚިދުމަތްދޭ ތަންތަނުގެ ރަޖިސްޓްރޭޝަން ފީ، 50 ޕަސެންޓަށް ކުޑަކޮށްފިއެވެ.
ރާއްޖޭގެ ކާބޯތަކެއްޗާ ބެހޭ އިދާރާ, އެމްއެފްޑީއޭއިން މިއަދު ކުރި އިއުލާނެއްގައި ވަނީ، ކާބޯތަކެތީގެ ޚިދުމަތްދޭ ތަންތަން ރަޖިސްޓްރީކުރުމުގައި އެ އިދާރާއިން ނަގަަމުން އަންނަ ރަޖިސްޓްރޭޝަން ފީއާއި ކެޓަގަރީ ފީ ކުޑަކުރަން ނިންމާފައިވާ ކަމަށެވެ.
އެގޮތުން، މިއަހަރުން ފެށިގެން ދެ އަހަރު ދުވަހުގެ މުއްދަތަކަށް، ކާބޯތަކެތީގެ ޚިދުމަތްދޭ ތަންތަނުގެ ރަޖިސްޓްރޭޝަން ފީ އާއި ކެޓަގަރީ ފީ 50 ޕަސެންޓަށް ކުޑަކުރަން ނިންމާފައިވާކަމަށް، އިއުލާނުގައިވެއެވެ.
ކާބޯތަކެތީގެ ޚިދުމަތްދޭ ތަންތަނުގެ ރަޖިސްޓްރޭޝަން ފީ 50 ޕަސެންޓަށް ކުޑަކުރަން ނިންމިއިރު، ފާހަގަކުރެވޭ ގޮތުގައި ހަކުރާއި ކޮފީ ހިމެނޭހެން މިދިޔަ ނޮވެންބަރު މަހު، އަސާސީ ތަކެތީގެ އަގު ވަނީ އުފުލިފައެވެ. އެގޮތުން އަގު އުފުލުނު ތަކެތީގެ ތެރޭގައި ހަކުރާއި ޖޭމާއި ޗޮކްލެޓާއި މެޓާ ފަދަ ބާވަތްތައް ވެސް ހިމެނެއެވެ. އެއީ 3.84 ޕަސެންޓްގެ އިތުރުވުމެކެވެ.
އަދި އޮކްޓޫބަރު މަހާ އަޅައިބަލާއިރު، ނޮވެންބަރު މަހު އަގު ބޮޑުވެފައިވާ ތަކެތީގެ ތެރޭގައި ވެސް ހަކުރާއި ޖޭމާއި ޗޮކްލެޓްގެ އިތުރުން ސީރިއަލް ހިމެނެއެވެ. އެއީ 0.63 ޕަސެންޓްގެ އިތުރުވުމެކެވެ.
ތަފާތު ބުއިންތަކުގެ އަގަށް އޮކްޓޫބަރުން ނޮވެންބަރަށް އައި ބަދަލަށް ބަލާއިރު، ސްޓެޓިސްޓިކްސް ބިއުރޯއިން ވަނީ، ސައިފަތާއި އެފަދަ އެހެނިހެން އުފެއްދުންތަކުގެ އަގު 1.25 ޕަސެންޓް އުފުލިފައިވާ ކަމަށް ބުނެފައެވެ. އަދި ކޮފީއާއި ކޮފީގެ ބަދަލުގައި ބޭނުންކުރާ އެފަދަ އެހެން ތަކެތީގެ އަގު ވަނީ 0.97 ޕަސެންޓް އުފުލިފައެވެ.
ސްޓެޓިސްޓިކްސް ބިއުރޯއިން ތަކެތީގެ އަގުތައް އުފުލޭވަރު ބެލުމަށް 'ކޮންޒިއުމާ ޕްރައިޒް އިންޑެކްސް (ސީޕީއައި)'ގެ ނަމުގައި ވެސް ތަފާސްހިސާބު އާންމުކުރާއިރު، އޭގެ އިތުރަށް، އަސާސީ ކާބޯތަކެތީގެ އަގުތައް ދެނެގަތުމަށް ޚާއްސަ، އެސެންޝަލް ކޮމޮޑިޓީ ޕްރައިޒް އިންޑެކްސް ތައާރަފުކުރަން ނިންމާފައިވާކަން އިކޮނޮމިކް މިނިސްޓަރު މުހައްމަދު ސައީދު އިއުލާންކުރެއްވީ މިދިޔަ އޯގަސްޓު މަހެވެ. ސައީދު ވިދާޅުވީ އެ އިންޑެކްސްގެ ތެރެއިން، އާންމުކޮށް ގޭބީސީތަކުން ބޭނުންކުރާ ބާވަތްތަކުގެ އަގުތައް ދެނެގަނެވި، އަގުތައް ކޮންޓްރޯލްކުރުމަށް އަޅަންޖެހޭ ފިޔަވަޅުތައް އެޅުމަށް މަގުފަހިވާނެ ކަމަށެވެ.
ރާއްޖެއަކީ އިމްޕޯޓަށް ބަރޯސާވެފައިވާ ގައުމަކަށްވާއިރު، ދައުލަތުން ތެލަށްފަހު އެންމެ ގިނައިން ޚަރަދުކުރަނީ ކާބޯތަކެތި އެތެރެކުރުމަށެވެ. ރާއްޖޭގެ ދަރަނި ބޮޑުވެ، ޑޮލަރު ދައުރުވާ މިންވަރު ދަށްވުމުގެ ސަބަބުން ވެސް، ވިޔަފާރިތަކަށް އޭގެ އަސަރުކޮށް ތަކެތީގެ އަގު އުފުލުމަށް ދަނީ މަގުފަހިވަމުންނެވެ.