ރާއްޖޭގައި ވިއްކާ ބޯފެނުގެ ބައެއް ބްރޭންޑުތަކުގައި ނުރައްކާތެރި ކެމިކަލެއް ހިމެނޭ ކަމަށް ބުނެ ސޯޝަލް މީޑިއާގައި ދައުރުވަމުންދާ ޕޯސްޓަކީ އެއްވެސް ހަގީގަތެއް ނެތް ދޮގު ވާހަކަތަކެއް ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ބުނެފިއެވެ.
ސޯޝަލް މީޑިއާގައި ދައުރުވަމުންދާ ޕޯސްޓެއްގައި ބުނެފައިވަނީ، ދުނިޔޭގެ ސިއްހަތު ޖަމްއިއްޔާ (ޑަބްލިޔުއެޗްއޯ) ގެ ރިޕޯޓަކާ ހަވާލާދީ، ރާއްޖޭގައި އުފައްދާ "ތާޒާ" އަދި "ބޮނަކުއާ" ފަދަ ބްރޭންޑުތަކުގެ ފެނުގައި "ޑައިހައިޑްރޮޖަން މޮނޮކްސައިޑް" ނަމަކަށް ކިޔާ ނުރައްކާތެރި ކެމިކަލެއް އެކުލެވޭ ކަމަށެވެ. އަދި މި މާއްދާގެ ސަބަބުން ވިހަވެއްޖެނަމަ 119 އަށް ގުޅުމަށް ވެސް އެ ޕޯސްޓުގައި ލިޔެފައިވެއެވެ.
މިކަމާ ގުޅިގެން އެމްއެފްޑީއޭ އިން ބުނީ، "ޑައިހައިޑްރޮޖަން މޮނޮކްސައިޑް" އަކީ ސައިންޓިފިކް ނުވަތަ ކެމިކަލް ނަމްތަކުން ފެނަށް ކިޔާ ނަން ކަމަށެވެ. އެހެންކަމުން، ބަންދުކޮށްފައި ހުންނަ ފެނުގައި މި މާއްދާ ހުރުމަކީ ނުރައްކަލެއްގެ ގޮތުގައި ދެއްކުމަށް މަސައްކަތް ކުރުމަކީ އާންމުންނަށް ކަންކަން އޮޅޭ ގޮތަށް ފަތުރާފައިވާ ވަރަށް ބޮޑު ކުށްހީއެއް ކަމަށް އެ އޮތޯރިޓީން ފާހަގަކުރިއެވެ.
މީގެއިތުރުން އެމްއެފްޑީއޭ އިން ބުނީ، އާންމު ސިއްހަތާ ގުޅުންހުރި މިފަދަ މުހިންމު ކަންކަމަކީ ސަމާސާއަކަށް ހަދައިގެން ވާހަކަ ދައްކަންޖެހޭ ކަންކަން ނޫން ކަމަށެވެ. އަދި މަޖަލަކަށް ނުވަތަ ސަމާސާއަކަށް ވިޔަސް މިފަދަ ދޮގު ޚަބަރުތައް ހަދައި، ފެތުރުމަކީ އާންމުންގެ މެދުގައި ކަންބޮޑުވުމާއި ބިރުވެރިކަން އުފެދިދާނެ ކަމެއް ކަމަށްވާތީ، އެފަދަ ކަންކަން ނުކުރުމަށް ވަނީ އިލްތިމާސްކޮށްފައެވެ.
އެހެންކަމުން، ސޯޝަލް މީޑިއާގައި ފެތުރޭ މިފަދަ ދޮގު މައުލޫމާތުތަކަށް ސަމާލުވެ، ސިއްހީ ކަންކަމާ ގުޅޭގޮތުން އިތުބާރު ހުރި ރަސްމީ މަސްދަރުތަކުން މައުލޫމާތު ހޯދުމަށް އެމްއެފްޑީއޭ އިން ވަނީ އާންމުންނަށް ނަސޭހަތްތެރިވެފައެވެ.