ބޮކްސް އޮފީހުގައި ބޮޑު ކާމިޔާބީއެއް ހޯދަމުން އަންނަ ފިލްމު "ބޯޑާ 2" މުހިއްމު ރޯލެއް ކުޅެފައިވާ އެކްޓަރު ވަރުން ދަވަންއަށް އިންޓަނެޓު މެދުވެރިކޮށް ބަޔަކު މީހުން ޓްރޯލް ކުރަން ފެށުމުން އެކަމުގެ ދިފާއުގައި ޕްރޮޑިއުސަރު ކަރަން ޖޯހަރު ތެދުވެއްޖެއެވެ.
ބަޔަކުމީހުން ސޯޝަލް މީޑިއާގައި ވަރުންއަށް މަލާމާތްކޮށް ވާހަކަ ދައްކަންފެށީ ފިލްމު "ބޯޑާ 2"ގެ ލަވަ 'ގަރް ކަބް އާއޯގޭ' ރިލީޒްކުރުމާއެކު އެ ލަވައިގެ މަންޒަރެއްގައި ވަރުން މާ ހިނިއައިސްފައި ހުންނަ މަންޒަރަކާ ގުޅުވައިގެންނެވެ.
އެ މަންޒަރު ވައިރަލްވެ ބައެއް މީހުން އޭގެ ޓެމްޕްލޭޓްތަކެއް ސޯޝަލް މީޑިއާގައި ދައުރުކުރަން ފެށުމުން ވަރުން ވަނީ އެކްޓަރު ކުރިއަށްގެންދިޔަ ލައިވް ސެޝަނެއްގައި އެކަމާ ގުޅޭގޮތުން ވަރަށް 'ޕޮޒިޓިވް'ކޮށް ވާހަކަ ދައްކާފައެވެ.
މި ކަމާ ގުޅިގެން ވަރުންގެ ދިފާއުގައި ސޯޝަލް މީޑިއާގައި ކަރަން ކުރި ދިގު ޕޯސްޓުގައި ބުނެފައިވަނީ ވަރުންގެ ހިނިތުންވުމަށް ބަޔަކުމީހުން މަލާމާތްކުރިއިރު ފިލްމު "ބޯޑާ 2" ހޯދަމުން އަންނަ ކާމިޔާބީއާ ގުޅިގެން ވަރުން ހަގީގަތުގައި ވެސް މިއަދު ހުރީ ހެވިފައި ކަމަށެވެ.
ވަރުންގެ ދިފާއުގައި ކަރަން ސޯޝަލް މީޑިއާގައި ކުރި ޕޯސްޓް--ފޮޓޯ/އިންޑިއާޓުޑޭ
ހަގީގީ ދުނިޔޭގައި އަބަދުވެސް މޮޅުވާނީ ތެދުވެރިކަމާ އެކު މަސައްކަތްކުރާ މީހުން ކަމަށާއި ސޯޝަލް މީޑިއާގައި އަޑުގަދަކުރާ އަޑުގަދަކުރުންތައް އިސާހިތަކު މަޑުވެގެންދާނެ ކަމަށް ކަރަން ވަނީ ބުނެފައެވެ.
ވަރުން ދަވަންގެ އިތުރުން ސަނީ ޑިއޯލް، އަހާން ޝެޓީ އަދި ދިލްޖީތު ދޮސާންޖް މުހިއްމު ރޯލްތައް ކުޅެފައިވާ ވަޠަނީ ފިލްމު "ބޯޑާ 2" ރިލީޒްކުރިތީ އެންމެ ތިން ދުވަސްތެރޭ ފިލްމަށް ވަނީ 100 ކްރޯޑު ރުޕީސްގެ އާމްދަނީއެއް ލިބިފައެވެ. މިއީ ވަރުންގެ ކެރިއަރުގެ އެންމެ ކާމިޔާބު ފިލްމުތަކުގެތެރޭ ހިމެނޭ އެއް ފިލްމެވެ.
ވަރުންގެ ދިފާއުގައި ކަރަން ޖޯހަރު ވާހަކަ ދައްކާފައިވާއިރު ވަރުން ފިލްމު އިންޑަސްޓްރީއަށް ތައާރަފްވީ ވެސް ކަރަންގެ ފިލްމަކުންނެވެ. އޭގެފަހުން ކަރަންގެ ދަރުމާ ޕްރޮޑަކްޝަންސްގެ ގިނަ ފިލްމުތަކެއްގައި ވަރުން ވަނީ މަސައްކަތްކޮށްފައެވެ.