މިދިޔަ އޮގަސްޓު މަހަށް ފަހު އައި ސެޕްޓެންބަރު މަހު ވެސް ސަރުކާރު މަސްކުންފުނި މިފްކޯއިން ކިރުވި މަހާއި މަސްވެރިންނަށް ދޫކުރި ފައިސާ ދަށްވެއްޖެއެވެ.
މިފްކޯއިން އާންމުކުރި ތަފާސްހިސާބުތަކުން ދައްކާ ގޮތުގައި 451 މަސްދޯނިފަހަރުން މިދިޔަ ސެޕްޓެންބަރު މަހު 1،288.42 ޓަނުގެ މަސް މިފްކޯއަށް ކިރުވައިފައިވެއެވެ. އެއީ 1،284.1 ޓަނުގެ ކަޅުބިލަމަހާއި 10 ކިލޯއިން މަތީ ކަންނެލީގެ 0.5 ޓަނާއި 15 ކިލޯއިން މަތީގެ 3.8 ޓަނެވެ.
އެ އަދަދަށް މަސް ކިރުވައިގެން ސެޕްޓެންބަރު މަހު މަސްވެރިންނަށް މިފްކޯއިން ދޫކޮށްފައިވަނީ 27.32 މިލިއަން ރުފިޔާއެވެ.
https://x.com/mifcomv/status/2106606013881463215
ނަމަވެސް މިދިޔަ އޮގަސްޓު މަހު 535 މަސްދޯންޏަކުން ޖުމުލަ 1،488.30 ޓަނުގެ މަސް ކިރުވައި، މިފްކޯއިން 29.99 މިލިއަން ރުފިޔާ މަސްދޯނިފަހަރަށް ދޫކޮށްފައިވެއެވެ.
އެހެންކަމުން މިއީ އޮގަސްޓު މަހު މަސްވެރިންނަށް ދޫކުރި ވަރަށް ވުރެ 2.67 މިލިއަން ރުފިޔާ ދަށް އަދަދެކެވެ.
ފާހަގަކުރެވޭ ގޮތުގައި މިދިޔަ އޮގަސްޓު މަސް ނިމުނުއިރު މިފްކޯއިން ކަޅުބިލަމަސް ކިލޯއެއް ގަންނަ އަގު ވަނީ 21 ރުފިޔާއަށް ބޮޑުވެފައެވެ. އެއަށްފަހު ސެޕްޓެންބަރު މަސް ނިމުނުއިރު ކަޅުބިލަމަސް ކިލޯއެއް ގަންނަ އަގު 22 ރުފިޔާއަށް ވަނީ ބޮޑުވެފައެވެ. އެކަމަކު އެ ދެ މަސް ނިމުނުއިރު ވެސް 10 ކިލޯއާއި 15 ކިލޯއާ ދެމެދުގެ ބޮޑުކަންނެލި ކިލޯއެއް ގަންނަ އަގު ކަމަށްވާ 20 ރުފިޔާ، އަދި 15 ކިލޯއިން މަތީގެ ބޮޑުކަންނެލި ގަންނަ އަގު ހުރީ 25 ރުފިޔާގައި ހުރީ ހިފެހެއްޓިފައެވެ.
މި އަހަރު މިހާތަނަށް މިފްކޯއިން އާންމުކުރި ތަފާސްހިސާބުތަކަށް ބަލައިލާއިރު އެންމެ ގިނަ އަދަދަކަށް މަސް ކިރުވައި މަސްވެރިންނަށް ފައިސާ ދޫކުރީ އޭޕްރިލް މަހެވެ. އެ މަހު އެކަނި ވެސް 4.41 ޓަނުގެ މަސް ކިރުވައި 78.78 މިލިއަން ރުފިޔާ މަސްވެރިންނަށް ދޫކޮށްފައިވެއެވެ.
މި އަހަރު މަސްވެރިކަން އެންމެ ދަށް ކަމަށް ދައްކަނީ ޖޫން މަހެވެ. އެ މަހު 568 ޓަނުގެ މަސް ކިރުވައި މަސްވެރިންނަށް ދޫކުރީ 11.33 މިލިއަން ރުފިޔާއެވެ.