މަސްޖިދުއްނަބަވީއަށް ކަރަންޓު ފޯރުކޮށްދޭ މަދީނާގެ 'ތައިބާ' ކަރަންޓު ޑިސްޓްރިބިއުޝަން ސްޓޭޝަނަށް ޔަމަނުގެ ހޫތީން ޑްރޯން ހަމަލާއެއް ދީފައިވާ ކަމަށް، ޔަމަނުގައި ހަރަކާތްތެރިވާ، ސައުދީ އަރަބިއްޔާ އިސްވެ އޮންނަ ކޯލިޝަނުން ބުނެފިއެވެ.
ޔަމަނުގައި ގާއިމުކޮށްފައިވާ އަރަބި ކޯލިޝަނުގެ ތަރުޖަމާނު މޭޖާ ޖެނެރަލް ތުރުކީ އަލް-މާލިކީ ވިދާޅުވި ގޮތުގައި، އެ މަދަނީ މަރުކަޒަށް ހަމަލާ ދީފައިވަނީ އަންގާރަ ދުވަހުގެ ފަތިހު 5:11 ގައެވެ.
ކަމާބެހޭ ފަރާތްތަކުން ކުރިއަށްގެންދިޔަ ތަހުގީގުތަކުންނާއި، ހަމަލާ ދިނުމަށް ބޭނުންކުރި ޑްރޯންގެ ބައިތައް ތަހުލީލުކުރުމުގެ އިތުރުން، އޮޕަރޭޝަނަލް ރިވިއުތަކަށް ބިނާކޮށް، މި ހަމަލާ ރާވައި ހިންގުމުގައި ހޫޘީންގެ ބައިވެރިވުން އޮތްކަން ކަށަވަރުވެފައިވާ ކަމަށް އަލް-މާލިކީ ވިދާޅުވިއެވެ.
އެ ހަމަލާގެ ސަބަބުން ކަރަންޓު ސްޓޭޝަނުގެ އެއް ޓްރާންސްފޯމަރު ބޭނުންނުކުރެވޭ ވަރަށް ހަލާކުވި ނަމަވެސް، މުޅި ކަރަންޓު ވިއުގައަށް އެއްވެސް އަސަރެއް ކޮށްފައިނުވާ ކަމަށް އޭނާ ފާހަގަކުރެއްވިއެވެ. އަދި މި ހާދިސާގައި އެއްވެސް މީހަކަށް އަނިޔާއެއް ލިބިފައިނުވާ ކަމަށާއި، މަސްޖިދުއްނަބަވީ ހިމެނޭ ސަރަހައްދުގެ ކަރަންޓުގެ ޚިދުމަތް މެދުކެނޑިފައިނުވާ ކަމަށް ވެސް ކޯލިޝަނުން ބުނެފައިވެއެވެ.
މި ހަމަލާ ދީފައިވަނީ، މައްކާގެ ދެކުނުން ދިޔަ ހޫޘީންގެ ޑްރޯނެއް ސައުދީ އަރަބިއްޔާގެ ވައިގެ ދިފާއީ ނިޒާމުން ވައްޓާލިތާ ކުޑަ ދުވަސްކޮޅެއް ފަހުން ކަމަށް އެ ގައުމުގެ ނޫސްތަކުން ފާހަގަކޮށްފައިވެއެވެ.
މިދިޔަ މަހުގެ ތެރޭގައި ސަޢޫދީ ޢަރަބިއްޔާގެ ވެރިރަށް ރިޔާޟަށާއި ރަތްކަނޑުގެ އައްސޭރިފަށުގައި ހުރި ހަކަތަ އުފައްދާ މަރުކަޒުތަކަށް ޑްރޯނާއި ބެލިސްޓިކް މިސައިލް ބޭނުންކޮށްގެން ދިން ވަރުގަދަ ހަމަލާތަކުގެ ޒިންމާ ހޫޘީން ވަނީ ރަސްމީކޮށް ނަގައިފިއެވެ.
ހޫޘީން ބުނާ ގޮތުގައި، ސައޫދީ އިސްވެ އޮންނަ ކޯލިޝަނުން ޔަމަނުގެ ހުޅަނގު އުތުރުގެ ބަނދަރުތަކާއި އެއާޕޯޓްތައް ބަންދުކޮށްފައިވާތީ، އެކަމުގެ ބަދަލުހިފުމުގެ ގޮތުން އެ މީހުން ވަނީ ކަނޑުގެ ދަތުރުފަތުރަށް ހުރަސްއަޅައި ބްލޮކޭޑެއް ގާއިމުކޮށްފައެވެ. އެމެރިކާއާއި އިސްރާއީލުން އީރާނާ ދެކޮޅަށް ފަށާފައިވާ ހަނގުރާމައިގެ ސަބަބުން ހޮރްމޫޒް ކަނޑުއޮޅި ބަންދުވެފައިވާއިރު، ސައޫދީ އަރަބިއްޔާއިން ތެޔޮ ބޭރުކުރުމަށް މައިގަނޑު ގޮތެއްގައި ބަރޯސާވަމުން އަންނަނީ ރަތްކަނޑުގެ މި ސަރަހައްދަށެވެ.