ވެރިކަމުގައި އެމްޑީޕީގެ ސަރުކާރެއް އޮންނަ އިރު އެ ޕާޓީގެ އިސްފަރާތަކީ ޗެއާޕާސަން ކަމަށާއި އެ ޕާޓީގެ ވެރިކަމެއްގައި ރައީސްގެ އިސް މުޝީރަކަށް ޕާޓީގެ ޗެއާޕާސަން އައްޔަންކުރަންޖެހޭ ގޮތަށް ހެދުމަށް، އެމްޑީޕީގެ އަސާސީ ގަވައިދަށް ބަދަލު ގެންނަން ހުށަހަޅައިފިއެވެ.
މިރޭ ފަށާ އެމްޑީޕީގެ ކޮންގްރެސްގައި އެ ޕާޓީން މިހާރު އަމަލުކުރަމުންދާ އަސާސީ ގަވައިދަށް ބަދަލު ގެނައުމާއި އެ ބަދަލުތަކަށް ބަހުސްކުރުން އޮންނާނެއެވެ. އެކަމާ މެދު ހޮނިހިރު ދުވަހު ބަހުސްކޮށް އެ ދުވަހުގެރޭ ވޯޓަށް އަހާނެއެވެ.
އެގޮތުން ވެސް އެމްޑީޕީގެ އަސާސީ ގަވައިދަށް ގެންނަން ހުށަހެޅި ފާހަގަކޮށްލެވޭ ބަދަލުތަކުގެ ތެރެއިން ބައެއް ބަދަލުތަކުގެ ތެރޭ ހިމެނެނީ އެ އިރެއްގައި ހުންނަވާ ރައީސުލްޖުމްހޫރިއްޔާއަކީ އެމްޑީޕީގެ މެންބަރެއް ނަމަ އެ ޕާޓީގެ އިސް ފަރާތަކީ އޭނާކަން އޮތް އޮތުން އުނިކުރަން ހުށަހެޅުމާއި އެ ޕާޓީގެ ރައީސާއި ނައިބު ރައީސްގެ މަގާމު އުނިކުރުމާއި ޕާޓީގެ ޗެއާޕާސަން ދައުލަތުގެ މުސާރަ ލިބޭ އެއްވެސް މަގާމެއް އަދާކޮށްގެން ނުވާނެ ކަމެވެ.
މީގެ އިތުރުން އެމްޑީޕީއަށް ޑެޕިއުޓީ ޗެއާޕާސަނެއް އިތުރުކުރުމަށް ވެސް ވަނީ ހުށަހަޅައިފައެވެ. އެގޮތުން ސިޔާސީ ޑެޕިއުޓީ ޗެއާޕާސަންގެ މަގާމު އިތުރުކުރަން ހުށަހަޅައި، އެއް ނައިބު ޗެއާޕާސަންކަމަށް އަންހެން މެންބަރަކު ކަނޑައަޅަން ވެސް ވަނީ ހުށަހަޅައިފައެވެ.
މި ބަދަލުތައް ގެނެސްފިނަމަ އެމްޑީޕީގެ ޗެއާޕާސަންގެ މަގާމުގެ ބާރު ވަރުގަދަވެގެން ދާނެއެވެ.
އައު އަސާސީ ގަވައިދުގައިވާ ގޮތުން، އެމްޑީޕީގެ އިދާރާގެ މުވައްޒަފުން އެތެރޭގެ އިންތިޚާބުތަކުގައި ވާދަކޮށް ކެމްޕެއިންތަކުގައި އަމަލީގޮތުން ހަރަކާތްތެރިވުން މަނާވާނެއެވެ. އޭގެ ތެރޭގައި އެ ޕާޓީގެ ޗެއާޕާސަނާއި ޑެޕިއުޓީ ޗެއާޕާސަނުން ވެސް ހިމެނެއެވެ.
އެކަމަކު އެތެރޭގެ އިންތިޚާބެއްގައި އިދާރީ މުވައްޒަފުން ވާދަކުރަން އެދޭ ނަމަ އެ އިންތިޚާބެއް ބޭއްވުމުގެ މަދުވެގެން އެއް މަސް ކުރިން ޗެއާޕާސަނަށް އަންގަން ޖެހޭނެ ކަމަށާއި އެ މުވައްޒަފަކާ މަސްލަހަތު ފުށޫއަރާ މީހަކު އިންތިޚާބެއްގައި ވާދަކުރާނަމަ ނުވަތަ އެފަދަ ކަމެއްގެ ސަބަބުން އިންތިޚާބުގެ އިންސާފުވެރިކަމާމެދު ސުވާލު އުފެދޭ ނަމަ އެ މުވައްޒަފަކު ވަގުތީގޮތުން މަގާމުގެ މަސްއޫލިއްޔަތު އަދާކުރުމުގެ ބާރު އެ އިންތިޚާބެއް ރާވައި ހިންގާ ކޮމިޓީއަށް ލިބިގެންވާ ގޮތަށް ހެދުމަށް ވެސް ވަނީ ހުށަހަޅައިފައެވެ.
އެ ހުށަހެޅުން ފާސްވެއްޖެ ނަމަ އެމްޑީޕީގެ ޗެއާޕާސަނަކަށް ހުންނަ ބޭފުޅަކަށް އެމްޑީޕީގެ އެތެރޭގެ އިންތިޚާބުތަކަށް ނުފޫޒު ނުފޯރުވޭނެއެވެ.
އެމްޑީޕީއަކީ މިވަގުތު ރާއްޖޭގައި އޮތް ދެވަނައަށް އެންމެ މެންބަރުން ގިނަ ޕާޓީއެވެ. އެގޮތުން މިހާތަނަށް އެ ޕާޓީގައި 55،399 މެންބަރުން ތިބިކަން އިލެކްޝަންސް ކޮމިޝަންގެ ދަފުތަރުން އެނގެއެވެ.