އިންޑިއާގެ އެންމެ މުއްސަނދި މަހުޖަނުންގެތެރޭ ހިމެނޭ މުކޭޝް އަމްބާނީގެ ހަގު ދަރިފުޅު، އާނަންތު އަމްބާނީއަށް އިނގިރޭސިވިލާތުގެ ނިއުކާސަލް ޔުނިވާސިޓީން އެރުވި "ޕްރޮފެސާޝިޕް އޮފް ޕްރެކްޓިސް"ގެ ޝަރަފަކީ ފައިސާ ދީގެން ހޯދާފައިވާ އެއްޗެއް ނޫން ކަމަށާއި، އެ ޔުނިވާސިޓީއަށް އޭނާގެ ފަރާތުން ނުވަތަ އޭނާއާ ގުޅުންހުރި ކުންފުންޏަކުންވެސް އެއްވެސް މާލީ އެހީއެއް ނުވަތަ ޑޮނޭޝަނެއް ލިބިފައިނުވާ ކަމަށް އެ ޔުނިވާސިޓީން ކަށަވަރުކޮށްދީފިއެވެ.
ޔޫކޭގެ ދަ ޓެލެގްރާފް ނޫހަށް މަޢުލޫމާތު ދެއްވަމުން ނިއުކާސަލް ޔުނިވާސިޓީގެ ތަރުޖަމާނަކު ވިދާޅުވީ، އާނަންތުއަށް މި ޝަރަފު އެރުވީ ތިމާވެށި ޙިމާޔަތްކުރުމާއި، ދިރުންތަކުގެ ނަޞްލު ރައްކާތެރިކުރުމަށް އޭނާ ކުރާ މަސައްކަތްތަކުގެ އަގުވަޒަންކުރުމުގެ ގޮތުން ކަމަށެވެ.
ޚާއްސަކޮށް، "ވަންތާރާ" ނަމުގައި އޭނާ ހިންގާ ވަައިލްޑްލައިފް ރެސްކިއު އަދި ކޮންސަވޭޝަން މަޝްރޫއާއި، ރިލަޔަންސް ގްރޫޕް ތިމާވެއްޓާ ރައްޓެހި ގްރީން އެނާޖީއަށް ބަދަލުކުރުމަށް އެގްޒެކެޓިވް ލީޑަރުގެ ހައިސިއްޔަތުން އަނަންތު ކުރާ މަސައްކަތްތައް އެ ޔުނިވަސިޓީއިން ވަނީ ފާހަގަކޮށްފައެވެ. ޢުމުރުން 31 އަހަރުގެ އަނަންތަށް އެރުވި މި ޝަރަފަކީ އެ ޔުނިވާސިޓީގެ އެކަޑެމިކް އުޞޫލުތައް ކަނޑައެޅުމުގައި ބައިވެރިވުމުގެ ޙައްޤު ނުވަތަ އެކަޑެމިކް ކޮލިފިކޭޝަނެއް ލިބިދޭ މަޤާމެއް ނޫންކަމަށްވެސް ޔޫކޭގެ ދަ ޓެލެގްރާފް ނޫހުގައި ބަޔާންކޮށްފައިވެއެވެ.
ޔުނިވަސިޓީން މި މަޢުލޫމާތު ހާމަކޮށްފައިވަނީ، އަނަންތުއަށް މި ޝަރަފު ދިނުމާ ގުޅިގެން ތިމާވެށީގެ ދާއިރާގައި ޙަރަކާތްތެރިވާ ބައެއް ފަރާތްތަކުގެ ނުރުހުން ޔުނިވަސިޓީއަށް އަމާޒުވެފައިވާ ކަމަށް ބުނެ "ދަ ގާޑިއަން" ނޫހުން ޝާއިއުކުރި ރިޕޯޓަކާ ގުޅިގެންނެވެ. ދަ ގާޑިއަންގައި ބުނެފައިވަނީ، ޔުނިވަސިޓީގެ މި ނިންމުމާ މެދު އެކަޑެމިކް މުވައްޒަފުންނާއި، އިންޑިއާގެ އިތުރުން ބައިނަލްއަޤުވާމީ ތިމާވެށި ރައްކާތެރިކުރާ ފަރާތްތަކުން ހައިރާންކަމާއި ފާޑުކިޔުން އަމާޒުކޮށްފައިވާ ކަމަށެވެ.
އަނަންތު އަމްބާނީ އިންޑިއާގެ ބޮޑުވަޒީރު ނަރެންދްރަ މޯދީއާ އެކު ވަންތާރާގައި--ފޮޓޯ/ޓެލެގްރާފްއިންޑިއާޔުނިވަސިޓީ އޮފް ސަސެކްސްގެ އިންސްޓިޓިއުޓް އޮފް ޑިވެލޮޕްމަންޓް ސްޓަޑީޒްގެ ކްލައިމެޓް، އެންވަޔަރަންމަންޓް އެންޑް ސަސްޓެއިނަބިލިޓީ ޑިޕާޓްމަންޓުގެ ވެރިޔާ ޕްރޮފެސަރު ލައިލާ މެހެތާ ވިދާޅުވީ، ދައުލަތުން ޔުނިވަސިޓީތަކަށް ދޭ މާލީ އެހީ ކުޑަވަމުންދާ ދަނޑިވަޅެއްގައި، ކޯޕަރޭޓްތަކާއި ބިލިއަނަރުންގެ ފައިސާއިން އެކަޑެމިކް ދާއިރާގެ މިނިވަންކަން ގެއްލިގެންދިއުމުގެ ބޮޑު ނުރައްކަލެއް އެބައޮތް ކަމަށެވެ. އޭނާ ފާހަގަކުރެއްވި ގޮތުގައި ޔުނިވަސިޓީތަކަކީ ބޮޑެތި ކޯޕަރޭޝަންތަކަށް އެކަޑެމިކް ސައްހަކަން ދޭންޖެހޭ ތަންތަނެއް ނޫނެވެ.
އޭގެ އިތުރުން "އޮއިލް ޗޭންޖް އިންޓަނޭޝަނަލް"ގެ ރިސާޗް ކޯ-ޑިރެކްޓަރު ލޯން ސްޓޮކްމަންވެސް ވަނީ، ތެލާއި ގޭހުގެ ވަޞީލަތްތައް ބޭނުންކުރުން ހުއްޓާލަންޖެހިފައިވާ ދަނޑިވަޅެއްގައި، ދައުލަތުގެ ޚަރަދުގައި ހިންގާ މުއައްސަސާތަކުން މިއަށްވުރެ ޒިންމާދާރުވާންޖެހޭނެ ކަމަށް ބުނެފައެވެ. ނަމަވެސް، މި ފާޑުކިޔުންތަކަކީ ނޫސްވެރިން އިސްވެ ސުވާލުކޮށްގެން ހޯދާފައިވާ ޚިޔާލުތަކެއްކަމެއް ނުވަތަ އަމިއްލައަށް ހުށަހެޅި ފާޑުކިޔުންތަކެއްކަމެއް ސާފެއް ނޫނެވެ.
ދަ ގާޑިއަންގެ ރިޕޯޓުގައި އިންޑިއާގެ ބޮޑުވަޒީރު ނަރެންދުރަ މޯދީ އާއި އަމްބާނީ އާއިލާއާ އޮތް ގުޅުމަށްވެސް އަލިއަޅުވާލާފައިވެއެވެ. އިންޑިއާގެ އެންމެ މުއްސަނދި މަހުޖަނު މުކޭޝް އަމްބާނީއަކީ ތެލާއި ގޭހުގެ ވިޔަފާރިން ބޮޑު ނަފާއެއް ހޯދާފައިވާ، އަދި ވެރިކަންކުރާ ބާރަތިޔާ ޖަނަތާ ޕާޓީ (ބީޖޭޕީ)އާ ބަދަހި ގުޅުމެއް ބާއްވަވާ ފަރާތެއް ކަމަށް އެ ރިޕޯޓުގައި ބަޔާންކޮށްފައިވެއެވެ.
އަނަންތު ވަނީ އިންޑިއާގެ ގުޖުރާތުގައި އޭނާގެ އާއިލީ ތެޔޮ ސާފުކުރާ ކާރުޚާނާ ކައިރީގައި 3,500 އޭކަރުގެ ބޮޑު އަމިއްލަ ޒޫއެއް "ވަންތާރާ"ގެ ނަމުގައި ޤާއިމުކޮށްފައެވެ. އެތަނުގައި 150,000 އަށްވުރެ ގިނަ ސޫފާ ސޫފިތަކާއި ޖަނަވާރު އުޅޭއިރު، އޭގެ ތެރޭގައި 200 ސިންގާ އާއި 250 މިނިކާވަގުގެ އިތުރުން 900 ކްރޮކޮޑައިލް ހިމެނެއެވެ.
މި ނިންމުމަށް ތާއީދުކުރައްވައި ޔޫކޭގެ ކޮންސަވޭޓިވް ޕާޓީގެ ވިޔަފާރިވެރިޔާ ލޯޑް ރާމީ ރޭންޖަރު ވިދާޅުވީ، މިއީ އިންޑިއާއަށް ޙަސަދަވެރިވެގެން ދައްކާ ވާހަކަތަކެއް ކަމަށެވެ. އަދި އަމްބާނީ އާއިލާއަކީ އިންޑިއާގެ އިޤްތިޞާދު އާ އުސްމިންތަކަކަށް ގެންގޮސްދީފައިވާ އާއިލާއެއްކަމަށެވެ.
ނިއުކާސަލް ޔުނިވަސިޓީގެ "ކިންގްސް ހޯލް"ގައި ބޭއްވި ރަސްމިއްޔާތުގައި، އާނަންތު ސިފަކޮށްފައިވަނީ ތިމާވެށީގެ ސަސްޓެއިނަބިލިޓީ އާއި ސާފު ހަކަތައަށް ބަދަލުވުމުގެ ދާއިރާގެ ބައިނަލްއަޤްވާމީ ލީޑަރެއްގެ ގޮތުގައެވެ. އެ ރަސްމިއްޔާތުގައި ވާހަކަދައްކަމުން އާނަންތު ބުނީ، ތިމާވެށި ޙިމާޔަތްކުރުމަކީ ޤައުމުތަކާއި ޖީލުތަކުގެ އިމުން ބޭރުން އެންމެން ގުޅިގެން ކުރަންޖެހޭ ހަރަކާތަކަށް ހަދަންޖެހޭ ކަމަށެވެ. އަދި މިއީ ކުރީގެ މަސައްކަތްތަކަށް ލިބުނު އިނާމެއްގެ އިތުރުން، އިންސާނުންނާއި ތިމާވެށި އެކުގައި އާލާވާނެ މުސްތަގުބަލެއް ބިނާކުރުމަށް ލިބުނު އިތުރު ޒިންމާއެއް ކަމަށް އޭނާ ވަނީ ބުނެފައެވެ.