ރާއްޖޭގެ ފަތުރުވެރިކަމުގެ ސިނާޢަތް ކުރިއެރުވުމުގައި އެންމެ އަވައްޓެރި ޤައުމުގެ ހައިސިއްޔަތުން އިންޑިއާއަކީ މުހިންމު މާކެޓެއް ކަމަށާއި، އިންޑިއާގެ ހުރިހާ ފަންތިއެއްގެ ދަތުރުވެރިންނަށް ވެސް އެކަށޭނަ ފުރުސަތުތައް ރާއްޖޭގައި އެބަހުރި ކަމަށް ވިޒިޓް މޯލްޑިވްސް ކޯޕަރޭޝަންގެ މެނޭޖިން ޑިރެކްޓަރު އަދި ސީއީއޯ އަބްދުﷲ ޔާސިރު ވިދާޅުވެއްޖެއެވެ.
އިންޑިއާގެ ޓްރެވަލް ނޫހެއް ކަމަށްވާ "ޓީ3" އަށް ދެއްވި ޚާއްސަ އިންޓަވިއުއެއްގައި ޔާސިރު ވިދާޅުވީ، ރާއްޖޭގެ ފަތުރުވެރިކަމުގެ ކުރިއެރުމަށްޓަކައި އިންޑިއާގެ މާކެޓަށް އަބަދުވެސް ފުރުސަތުތައް ހުޅުވިފައި އޮންނަންޖެހޭ ކަމަށެވެ. އެގޮތުން، އިންޑިއާއަކީ ރާއްޖެއާ އެންމެ ކައިރީގައި އޮތް ގައުމަށްވުމުން، ދަތުރުފަތުރުގެ ގޮތުން ލިބޭ ފަސޭހަކަމަކީ އިންޑިއާގެ ފަތުރުވެރިންނަށް ލިބޭ ބޮޑު ފައިދާއެއްކަން އޭނާ ފާހަގަކުރެއްވިއެވެ.
ޔާސިރު ވިދާޅުވީ، އިންޑިއާގެ އެކި ސިޓީތަކުން މަދު ވަގުތުކޮޅެއްގެ ތެރޭގައި ރާއްޖެއަށް އާދެވޭއިރު، ރާއްޖޭގެ ފަތުރުވެރިކަމުގެ އުފެއްދުންތައް ބައްޓަންކުރެވިފައިވަނީ ތަފާތު އެކި ބަޖެޓުތަކަށް އެކަށޭނަ ގޮތަށް ކަމަށެވެ. އެގޮތުން ގެސްޓްހައުސްތަކުން ފެށިގެން އެންމެ މަތީ ފެންވަރުގެ އަލްޓްރާ-ލަގްޒަރީ ރިސޯޓުތަކާ ހަމައަށް ހުރިހާ ފަންތިއެއްގެ ދަތުރުވެރިންގެ ބޭނުންތައް ފުއްދައިދެވޭނެ އިންތިޒާމު ރާއްޖޭގައި ހަމަޖެހިފައިވާކަމަށް ވިދާޅުވިއެވެ.
މީގެއިތުރުން، އިންޑިއާއިން ރާއްޖެއަށް ތަކުރާރުކޮށް ޒިޔާރަތްކުރާ ފަތުރުވެރިންގެ އަދަދު އިތުރުވަމުން އަންނަކަން ފާހަގަކުރައްވައި ޔާސިރު ވިދާޅުވީ، ރާއްޖޭގެ ފަތުރުވެރިކަމުގެ އުފެއްދުންތަކަށް އިންޑިއާގެ މާކެޓުން އޮތް ޝައުގުވެރިކަން ކުރިއަށް އޮތް ތަނުގައި އިތުރަށް ބޮޑުވެގެންދާނެ ކަމަށް އުންމީދުކުރައްވާ ކަމަށެވެ.
ފަތުރުވެރިކަމާ ބެހޭ ވުޒާރާގެ ތަފާސްހިސާބުތައް ދައްކާގޮތުން، މި އަހަރުގެ ޖެނުއަރީ މަހުން ފެށިގެން މި ނިމުނު މަހުގެ 29ގެ ނިޔަލަށް އިންޑިއާއިން ރާއްޖެއަށް 90،392 ފަތުރުވެރިން ޒިޔާރަތްކޮށްފައިވެއެވެ. މިއީ ރާއްޖެއަށް ޒިޔާރަތްކުރި ޖުމްލަ ފަތުރުވެރިންގެ 5.8 އިންސައްތައެވެ. މިއާއެކު އިންޑިއާ އޮތީ ރާއްޖެއަށް ހަ ވަނައަށް އެންމެ ގިނައިން ފަތުރުވެރިން އަންނަ ގައުމުގެ ގޮތުގައެވެ.