ޔުއެފާ ނޭޝަންސް ލީގުގައި ޑެންމާކާ ދެކޮޅަށް ކޯޕަންހޭގަންގައި ކުޅޭ މެޗުގެ ކުރިން، ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ޓީމުގެ ޓްރެއިނިން ކޭމްޕް ދޫކޮށް ޓީމުން ވަކިވެއްޖެއެވެ.
އުމުރުން 41 އަހަރުގެ ރޮނާލްޑޯ ކޭމްޕުން ނުކުމެގެން ދިޔައީ، ޤައުމީ ޓީމުގެ އާ ކޯޗު ޖޯޖު ޖެސޫސްއާއެކު އުފެދުނު ބޮޑު ދެބަސްވުންތަކަކަށްފަހު، މިރޭ ކުޅޭ މެޗުގެ ފުރަތަމަ އެގާރައިން ޖާގަ ނުލިބޭނެކަން ކަށަވަރުވުމުންނެވެ.
މި މައްސަލައިގެ ފެށުމަކީ މިދިޔަ އާދީއްތަ ދުވަހުގެރޭ ނޯވޭއާ ދެކޮޅަށް ކުޅެ 2-1 އިން ޕޯޗުގަލް މޮޅުވި މެޗެވެ. އެ މެޗުގައި ރޮނާލްޑޯ ބެންޗުގައި ބެހެއްޓުމަށްފަހު، މެޗުގެ ދެވަނަ ހާފުގައި އޭނާ ގާތު ވޯމްއަޕްކުރަން ބުންޏެވެ. ނަމަވެސް، މެޗު ނިމުނުއިރުވެސް ކޯޗު އޭނާ ކުޅެން އަރުވާފައެއް ނުވެއެވެ. މެޗު ނިމުމާއެކު، ސަޕޯޓަރުންނާއެކު އެހެން ކުޅުންތެރިން ވަގުތު ހޭދަކުރި ނަމަވެސް ރޮނާލްޑޯ ވަނީ ސީދާ ޗޭންޖިން ރޫމަށް ގޮސްފައެވެ.
މި ހާދިސާއަށްފަހު ހޯމަ އަދި އަންގާރަ ދުވަހު އޭނާ ދަނޑުމަތީގެ ފަރިތަކުރުންތަކުގައި ބައިވެރިނުވެ، ވަގުތު ހޭދަކުރީ ޖިމްގައެވެ. ޙާލަތު ގޯސްވަމުން ދިޔުމާއެކު، ޕޯޗުގަލް ފުޓްބޯޅަ ފެޑެރޭޝަންގެ ރައީސް ޕެޑްރޯ ޕްރޮއެންސާ ވަނީ ކޮޕަންހޭގަންއަށް ވަޑައިގެން ރޮނާލްޑޯއާއި ކޯޗު ޖެސޫސްއާ ދެމެދު އިމަޖެންސީ ބައްދަލުވުމެއް ބާއްވައި މައްސަލަ ހައްލުކުރަން މަސައްކަތް ކުރައްވާފައެވެ.
ޑެންމާކް މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ކޯޗު ޖޯޖު ޖެސޫސް ބުނީ، ނޯވޭ މެޗުގައި ރޮނާލްޑޯ ގިނައިރު ވަންދެން ވޯމްއަޕްކުރުވުމަށްފަހު ކުޅެން ނޭރުވުނީ މެޗުގެ ހާލަތު އޮތްގޮތުން ކަމަށާއި އެއީ ހެދުނު ގޯހެއް ކަމަށެވެ. ނަމަވެސް، ކޯޗުގެ ނިންމުންތަކަށް އެއްވެސް ކުޅުންތެރިއަކަށް ނުފޫޒު ނުފޯރުވޭނެ ކަމަށް އޭނާ ވިދާޅުވިއެވެ.
"އަހަރެން މީ ކޯޗަކީ. އެއްވެސް ކުޅުންތެރިއަކަށް އަހަރެންގެ ނިންމުމެއް ބަދަލެއް ނުކުރެވޭނެ. އެއީ ރޮނާލްޑޯ ކަމުގައި ވިޔަސް، ނުވަތަ ފުޓްބޯޅައިގެ އެހެން ކުޅުންތެރިއަކު ކަމުގައި ވިޔަސް. އަދި ފެޑެރޭޝަންގެ ރައީސަށްވެސް އެކަމެއް ނުކުރެވޭނެ." މެޗުގެ ކުރިން ޕޯޗުގަލްގެ ކޯޗު ޖޯޖު ޖެސޫސް ބުންޏެވެ.
ޖެސޫސް އިތުރަށް ކަށަވަރުކޮށްދިން ގޮތުގައި، ޑެންމާކާ ދެކޮޅަށް ފެށުމުން ކުޅޭނީ އެސީ މިލާންގެ ފޯވާޑް ގޮންސާލޯ ރާމޯސްއެވެ. އަދި ރޮނާލްޑޯ ބޭނުންވެއްޖެ ހާލަތެއްގައި ކުޅެން އަރުވާނެ ކަމަށާއި، ބޭނުންނުވެއްޖެނަމަ ނުކުޅުވާނެ ކަމަށްވެސް އޭނާ ބުންޏެވެ.
ކޯޗުގެ ނޫސްވެރިންގެ ބައްދަލުވުމަށްފަހު، ރޮނާލްޑޯ ވަނީ ޕާކެން ސްޓޭޑިއަމުން ފެޑެރޭޝަންގެ ވެހިކަލެއްގައި ނުކުމެގެން ގޮސް، އޭނާގެ އަމިއްލަ ޕްރައިވެޓް ޖެޓުގައި މެޑްރިޑަށް ދަތުރުކޮށްފައެވެ. އެއަށްފަހު އޭނާގެ އިންސްޓަގްރާމްގައި ހިއްސާކުރި މެސެޖެއްގައި ކޭމްޕް ދޫކޮށްލިކަން އިއުލާންކުރިއެވެ.
"ޤައުމީ ޓީމުގެ ކޯޗު ބޭއްވި ނޫސްވެރިންގެ ބައްދަލުވުމަށްފަހު، އަދި ޕޯޗުގަލް ފުޓްބޯޅަ ފެޑެރޭޝަންގެ ރައީސާ ވާހަކަދެއްކުމަށްފަހު، އަހަރެން ނިންމައިފިން ޤައުމީ ޓީމުގެ ކޭމްޕް ދޫކޮށްދާން. އަހަރެން އަބަދުވެސް ޤައުމީ ޓީމަށް ޚިދުމަތްކުރީ ފުރިހަމަ އިޚްލާޞްތެރިކަމާއެކު. ކުރިއަށްއޮތް ތަނުގައި، އަހަރެން ޓީމު ދޫކޮށް ދާންޖެހުނު ހަގީގީ ސަބަބުތަކުގެ ތެދު މައުލޫމާތު ޕޯޗުގަލްގެ ރައްޔިތުންނަށް ހާމަކޮށްދޭނަން. މިވަގުތަކީ ޕޯޗުގަލްއަށާއި މަގޭ އެކުވެރި ހުރިހާ ކުޅުންތެރިންނަށް ކާމިޔާބީއަށް އެދެންވީ ވަގުތު." ރޮނާލްޑޯގެ ސޯޝަލް މީޑިއާ ޕޯސްޓުގައިވެއެވެ.
ޕޯޗުގަލްގެ ފުޓްބޯޅަ ފެޑެރޭޝަނުން ނެރުނު ބަޔާނެއްގައި ބުނެފައިވަނީ ރޮނާލްޑޯ ކޭމްޕް ދޫކޮށް ގޮސްފައިވާކަން ކަށަވަރުވާ ކަމަށާއި، ބާކީ ތިބި 24 ކުޅުންތެރިންނާއެކު ކުރިއަށް އޮތް މެޗުތަކަށް ޓީމު ފުރިހަމައަށް ތައްޔާރުވަމުންދާ ކަމަށެވެ.
ރޮނާލްޑޯ ވަނީ މީގެ ކުރިން މިއީ އޭނާގެ ފުޓްބޯޅަ ކެރިއަރުގެ އެންމެ ފަހު ސީޒަން ކަމަށް އިޝާރާތްކޮށްފައެވެ. އަދި 2026 ގެ ވޯލްޑް ކަޕަކީ އޭނާގެ އެންމެ ފަހު ވޯލްޑް ކަޕް ކަމަށް ބުނެފައިވީ ނަމަވެސް، ކޯޗު ޖެސޫސްއާއެކު އުފެދުނު މި ބޮޑު މައްސަލައާއެކު، އޭނާ ޤައުމީ ޓީމުން ފެނިދާނެކަމާމެދު މިހާރު ވަނީ ބޮޑެތި ސުވާލުތަކެއް އުފެދިފައެވެ.