ތުރުކީގެ ފުޓްބޯޅަ ރެފްރީންގެ ކަންކަމަށް ނުފޫޒު ފޯރުވި ކަމުގެ ތުހުމަތުގައި އެ ގައުމުގެ ރެފްރީންގެ ކޮމިޓީގެ ރައީސް ފެރްހާތު ގުންދޮގްދޫ އާއި އިތުރު ހަ މީހަކު ހައްޔަރުކޮށްފިއެވެ.
އަލް ޖަޒީރާއިން ރިޕޯޓުކުރި ގޮތުގައި މިކަން ހާމަކުރެއްވީ އެ ގައުމުގެ ޖަސްޓިސް މިނިސްޓަރު އަކިން ގުރްލެކްއެވެ.
މިނިސްޓަރު ގުރްލެކް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ރެފްރީން ކްލެސިފައި ކުރުމާއި، މެޗުތަކަށް ރެފްރީން ހަމަޖެއްސުމާއި، މާކްސް ދިނުމާއި، މަގާމުތަކަށް އައްޔަންކުރުމުގެ އިތުރުން ގަވާއިދުތަކާ ގުޅޭ އިމްތިހާނުތަކަށް ނުފޫޒު ފޯރުވާފައިވާ ކަމަށް ކުރެވޭ ތުހުމަތުތައް ތަހުގީގު ކުރަމުން އަންނަ ކަމަށެވެ. އަދި ހައްޔަރު ކުރެވުނު މީހުންގެ ތެރޭގައި ރެފްރީންގެ ކޮމިޓީގެ ރައީސްގެ އިތުރުން އެ ކޮމިޓީގެ ނައިބު ރައީސް ވެސް ހިމެނޭ ކަމަށް ވަނީ ހާމަކުރައްވާފައެވެ.
މި ތަހުގީގާ ގުޅިގެން ތުހުމަތުކުރެވޭ ފަރާތްތަކުގެ ދިރިއުޅޭ ގެތަކާއި، ވަޒީފާ އަދާކުރާ ތަންތަނުގެ އިތުރުން އޮފީސްތައް ވެސް ފާސްކޮށްފައިވާ ކަމަށް މިނިސްޓަރު ވިދާޅުވިއެވެ.
މިނިސްޓަރު ގުރްލެކް އިތުރަށް ވިދާޅުވީ، ތުރުކީގެ ފުޓްބޯޅައަށް އޮތް އިތުބާރު ގެއްލޭ ގޮތަށް ދެކެވޭ ވާހަކަތަކުގެ ހަގީގަތް ހާމަކޮށް، ޒިންމާވާންޖެހޭ ފަރާތްތައް ގާނޫނުގެ ކުރިމައްޗަށް ގެނައުމަށްޓަކައި ކުރާ މަސައްކަތުގައި ދެމިތިބޭނެ ކަމަށެވެ.
މީގެ އެއް އަހަރު ކުރިން ވެސް ތުރުކީގެ ފުޓްބޯޅަ ފެޑެރޭޝަން (ޓީއެފްއެފް) އިން ވަނީ ގަވާއިދާ ހިލާފަށް ބެޓިން ކުޅުނު މައްސަލައެއްގައި 149 ރެފްރީން ސަސްޕެންޑް ކޮށްފައެވެ.
އެ މައްސަލައިގެ ތަހުގީގުން ދެއްކި ގޮތުގައި ޕްރޮފެޝަނަލް ލީގުތަކުގައި ހަރަކާތްތެރިވާ 571 ރެފްރީންގެ ތެރެއިން 371 ރެފްރީންގެ ބެޓިން އެކައުންޓް ހުރިއިރު، 152 މީހަކު އަމަލީ ގޮތުން ބެޓް ކޮށްފައިވެއެވެ. އަދި އެ މައްސަލައިގައި 14 ފުޓްބޯޅަ ކުޅުންތެރިން ހިމެނޭހެން 29 މީހަކު ހައްޔަރުކޮށް، 1000 އަށް ވުރެ ގިނަ ކުޅުންތެރިން ސަސްޕެންޑް ކުރިއެވެ.
ނަމަވެސް، މިދިޔަ އަހަރު ފެންމަތިވި ބެޓިން މައްސަލައާއި މިހާރު ކުރިއަށްދާ ތަހުގީގާ އެއްވެސް ގުޅުމެއް ވާކަމަށް މިނިސްޓަރު ގުރްލެކް ވިދާޅެއް ނުވެއެވެ.