ޕީއެސްޖީގެ ވެރިޔާ އިސްވެހުރެ ''ވޯލްޑް ފުޓްބޯލް ކްލަބްސް'' ގެ ނަމުގައި އިދާރާއެއް އުފައްދަނީ

ޕީއެސްޖީގެ ވެރިޔާ ނާސިރު އަލް ހެލައިފީ--

ދުނިޔޭގެ ބޮޑެތި ފުޓްބޯޅަ ކްލަބްތަކުގެ މަސްލަހަތު ހިމާޔަތްކުރުމަށްޓަކައި "ވޯލްޑް ފުޓްބޯލް ކްލަބްސް" (ޑަބްލިއުއެފްސީ) ގެ ނަމުގައި ބައިނަލްއަގުވާމީ އާ ޖަމިއްޔާއެއް އުފެއްދުމުގެ މަސައްކަތް ޔޫރަޕްގެ ފުޓްބޯޅަ ކްލަބްތަކުގެ އިސްވެރިން ފައްޓަވައިފިއެވެ.

މި އިސްނެންގެވުން ރަސްމީކޮށް އިއުލާންކުރެއްވީ ޔޫރަޕިއަން ކްލަބްސް ބޮޑީ (އީއެފްސީ) ގެ ޗެއާމަން އަދި ޕީއެސްޖީގެ ރައީސް ނާސިރު އަލް ޚެލައިފީއެވެ.

ކޯޕަންހޭގަންގައި ބޭއްވި އީއެފްސީގެ ޖެނެރަލް އެސެމްބްލީގައި ވާހަކަދައްކަވަމުން އަލް ޚެލައިފީ ވިދާޅުވީ، ދުނިޔޭގެ އެކި ކޮޅުތަކުގައިވާ ކްލަބްތަކަކީ މިހާރު ބައިނަލްއަގުވާމީ ބޮޑެތި ބްރޭންޑްތަކަކަށް ވެފައިވާއިރު، އެ ފަރާތްތަކުގެ އަޑު ދުނިޔޭގެ ފުޓްބޯޅައިގެ މައި އިދާރާތަކުގައި އިއްވޭނެ ހަރުދަނާ މުއައްސަސާއެއް ބޭނުންވާ ކަމަށެވެ.

މިގޮތުން އަލަށް އުފައްދާ ޑަބްލިއުއެފްސީ ވެގެންދާނީ ފީފާގެ ސަރަހައްދީ ހަ ކޮންފެޑެރޭޝަނާ އެއް ހަމައެއްގައި، ކްލަބްތަކުގެ ހައްގުތަކާއި ވިޔަފާރީގެ މަސްލަހަތުތައް ހިމާޔަތްކުރާނެ "ހަތްވަނަ ތަނބު" ނުވަތަ މައި ބާރަށެވެ.

މި ނިންމުން ނިންމަންޖެހުނު އެންމެ ބޮޑު ސަބަބެއްގެ ގޮތުގައި އަލް ޚެލައިފީ ފާހަގަކުރެއްވީ، ބައިނަލްއަގުވާމީ މުބާރާތްތަކުގައި ކްލަބްތަކުގެ ހިއްސާ ބޮޑުވުމެވެ. މިސާލެއްގެ ގޮތުން 48 ޓީމު ވާދަކުރާ ވޯލްޑް ކަޕްގައި ކުޅޭ ކުޅުންތެރިންގެ ތެރެއިން ގާތްގަނޑަކަށް %70 (857 ކުޅުންތެރިން) އަކީ ޔޫރަޕްގެ ކްލަބްތަކަށް ކުޅޭ ކުޅުންތެރިންކަމަށްވާއިރު، ކްލަބްތަކުގެ ބަހެއް ނެތި ފީފާއިން މުބާރާތްތައް އިތުރުކޮށް ކަލަންޑަރު ތަރުތީބުކުރަމުންދިއުމަކީ ގަބޫލުކުރެވޭނެ ކަމެއް ނޫންކަމަށް އޭނާ ވިދާޅުވިއެވެ.

ފުޓްބޯޅަ ދިރާސާކުރާ ފަރާތްތަކުން ދެކޭގޮތުގައި މިއީ ފީފާގެ ރައީސް ޖިއާނީ އިންފަންޓީނޯއާ ދެކޮޅަށް، މުބާރާތްތަކުން ލިބޭ އާމްދަނީ ބެހުމުގައްޔާއި ނިންމުންތައް ނިންމުމުގައި ކްލަބްތަކުގެ ބާރުގަދަކުރުމަށްޓަކައި އެޅި ސިޔާސީ ފިޔަވަޅެކެވެ.

މި ޖަމިއްޔާ ވީ އެންމެ އަވަހަކަށް ވުޖޫދަށް ގެނައުމަށް މަސައްކަތް ކުރަމުންދިޔަ ނަމަވެސް، މީގެ ހިންގާނެ ގޮތުގެ ތަފްސީލީ އޮނިގަނޑެއް އަދި އާންމެއް ނުކުރެއެވެ. މިގޮތުން ޑަބްލިއުއެފްސީގެ ގާނޫނީ ހައިސިއްޔަތަކީ ކޮބައިކަމާއި، ޔޫރަޕުން ބޭރުގެ ކްލަބްތަކަށް މީގެއިން މެންބަރުކަން ލިބޭނެ އުސޫލުތަކެއް އަދި ސާފެއް ނުވެއެވެ.

ނަމަވެސް، މި ހުށަހެޅުމާއެކު ދުނިޔޭގެ ފުޓްބޯޅައިގެ ބާރުތަކުގެ މެދުގައި އޮތް ސިޔާސީ ހަމަނުޖެހުންތައް އިތުރަށް ބޮޑުވެ، ކުރިއަށްއޮތް ތަނުގައި ފީފާއާއި ކްލަބްތަކާ ދެމެދު ބޮޑެތި ބަހުސްތަކެއް ހިނގާނެ ކަމަށް ގިނަ ބަޔަކު ލަފާކުރެއެވެ.



comment ކޮމެންޓް