ޕްރިމިއާ ލީގުގެ މާލީ ގަވާއިދުތަކާ ހިލާފުވެގެން މެންޗެސްޓާ ސިޓީއާ ދެކޮޅަށް ހުށަހެޅުނު 115 މައްސަލައިގެ ތެރެއިން 114 ކުށެއް ސާބިތުވިކަން މިނިވަން ކޮމިޝަނުން އިއުލާންކުރުމާ ގުޅިގެން، މެންޗެސްޓާ ޔުނައިޓެޑްގެ ކުރީގެ ކެޕްޓަން ރޯއީ ކީން ސިޓީގެ ކުޅުންތެރިންނަށާއި މެނޭޖްމަންޓަށް ވަރުގަދަ ރައްދެއް ދީފިއެވެ.
އައިޓީވީގެ ކުޅިވަރު ޕްރޮގްރާމެއްގައި ވާހަކަދައްކަމުން ކީން ބުނީ، އޭނާއަކީ އެ ދުވަސްވަރު ސިޓީއަށް ކުޅެ ކާމިޔާބީތައް ހޯދި ކުޅުންތެރިއެއް ނަމަ، އެ ހޯދި މެޑަލްތައް ވަގުތުން "ކުނިގޮޑަށް" އުކާލާނެ ކަމަށެވެ.
"އަހަރެންނަކީ އެ ދުވަސްވަރު އެ ކްލަބަށް ކުޅެ، އެންމެންގެ ތައުރީފު ލިބުނު ކުޅުންތެރިއެއް ނަމަ 100 އިންސައްތަ ޔަގީން، އަހަރެން އެ މެޑަލްތައް ގެންގޮސް އުކާލާނީ ކުނިގޮޑަށް." ކީން ބުންޏެވެ.
ކީން އިތުރަށް ބުނީ، ކްލަބުން މަކަރުހަދާފައިވާކަން އެނގިތިބެ ކުރި ކަމެއްގެ ސަބަބުން ގިނަ ބަޔަކަށް އޭގެ އަސަރުކުރާނެކަން ކްލަބުގެ ވެރިންނަށް އެނގޭނެ ކަމަށެވެ. އަދި ދަނޑުމަތީގައި ހޯދި ކާމިޔާބީއެކޭ ބުނެ ކުރީގެ ބައެއް ކުޅުންތެރިން ދައްކާ ވާހަކަތަކަށް އޭނާ ރައްދުދިނެވެ.
"ކުރީގެ ބައެއް ކުޅުންތެރިން އެމީހުން ކާމިޔާބީ ހޯދީ ދަނޑުމަތީގައި ކަމަށް ބުނެ ދައްކަނީ އެއްވެސް އޮށްޓަރެއް ނެތް ވާހަކަތަކެއް. އެއީ ސާފުކޮށް މަކަރުހެދުން. އެތަނުގައި (ސިޓީގައި) ހިންގީ މަކަރާއި ހީލަތް. ކްލަބުގެ ވެރިން މަކަރުހެދުމުން، ކުޅުންތެރިންނާއި މެނޭޖަރަށް ކުރިއަށް އޮތް ތަނުގައި ކްލަބަށް އިތުބާރުކުރުން ވާނީ ވަރަށް އުނދަގޫ ކަމަކަށް." ކީން ބުންޏެވެ.
މެންޗެސްޓާ ސިޓީން ޕްރިމިއާ ލީގުގެ ޓްރޮފީ އުފުލާލަނީ-- އޭނާއާއެކު ޝޯގައި ބައިވެރިވި އާސެނަލްގެ ކުރީގެ ފޯވާޑް އިއާން ރައިޓްވެސް ވަނީ މިއީ ބޮޑު ޖަރީމާއެއްކަމަށް ބުނެފައެވެ. އަދި މީގެ ކުރިން ފުޓްބޯޅައިގައި ނުފެންނަ ފަދަ ހަރުކަށި އަދަބެއް ސިޓީއަށް ދިނުމަށް އޭނާ ވަނީ ގޮވާލާފައެވެ.
މި މައްސަލައަކީ 2008 ވަނަ އަހަރު އަބޫދާބީ ޔުނައިޓެޑް ގްރޫޕުން މެންޗެސްޓާ ސިޓީ ގަނެ، ކްލަބުގެ މާލީ ހާލަތު ބަދަލުކޮށްލުމަށްފަހު 2009 އިން 2018 އަށް ހިންގި މާލީ އޮޅުވާލުންތަކާ ގުޅޭ މައްސަލައެކެވެ.
މިނިވަން ކޮމިޝަނުން ކުރި ތަހުގީގުން ދެއްކި ގޮތުގައި ސިޓީން ވަނީ "ޝޭމް ކޮންޓްރެކްޓްތައް" ނުވަތަ ހަގީގަތެއް ނެތް އެއްބަސްވުންތައް ހަދައި، ކްލަބަށް ލިބޭ އާމްދަނީ 830 މިލިއަން ޕައުންޑަށްވުރެ އިތުރުކޮށް ދައްކާފައެވެ. ކްލަބުގެ ވެރިންގެ އަމިއްލަ ކުންފުނިތަކުން ކްލަބަށް ސިއްރު މާލީ އެހީތެރިކަން ފޯރުކޮށްދިނުމަށްފަހު، އެއީ އާންމު ވިޔަފާރިތަކުން ލިބުނު އިސްތިހާރުގެ އާމްދަނީގެ ގޮތުގައި މާލީ ހިސާބުތަކުގައި ވަނީ ހިމަނާފައެވެ.
މި އަމަލުތަކުގެ ސަބަބުން، ޕްރިމިއާ ލީގުގެ "ފިނޭންޝިއަލް ފެއާ ޕްލޭ" އަދި ޔުއެފާގެ މާލީ ގަވާއިދުތަކުގެ އިމުން ބޭރުން ސިޓީއަށް ބޮޑެތި ޚަރަދުތަކެއްކޮށް، ދުނިޔޭގެ އެންމެ މަތީ ފެންވަރުގެ ކުޅުންތެރިންނާއި މެނޭޖަރުން ހޯދުމުގެ ފުރުސަތު މަގުފަހިވިއެވެ. މި ނުވަ ސީޒަންގެ ތެރޭގައި ސިޓީން ވަނީ ޕްރިމިއާ ލީގުގެ ތަށިތަކާއެކު ޖުމްލަ 8 ބޮޑު މުބާރާތުގެ ތަށި އުފުލާފައެވެ.
މިނިވަން ކޮމިޝަނުން ކުށް ސާބިތުވިކަމަށް ނިންމި ނަމަވެސް، މެންޗެސްޓާ ސިޓީއަށް މި ނިންމުން އިސްތިއުނާފު ކުރުމުގެ ފުރުސަތު ވަނީ ދީފައެވެ. ސިޓީން ވަނީ މި ނިންމުމާމެދު ހައިރާންވެ، މާޔޫސްވާކަން ހާމަކޮށް، މައްސަލަ އިސްތިއުނާފު ކުރާނެ ކަމަށް ބުނެފައެވެ.