ފުލުހުންގެ ބެލުމުގެ ދަށަށް ގެނެސްފައިވާ 4،285 ކާޓޫނު ސިނގިރެޓާއި، 232 ފޮށި ސިނގިރެޓުގެ އިތުރުން 93.60 ކިލޯގެ ދުންފަތް ދޫނިދޫގައި ނައްތާލައިފިއެވެ.
މި ގިނަ އަދަދެއްގެ ތަކެތި ނައްތާލުމުގެ މަސައްކަތް ފުލުހުން ކުރިއަށް އިއްޔެއެވެ. މިއީ ފުލުހުންގެ ބެލުމުގެ ދަށުގައި ހުރި ގިނަ އަދަދެއްގެ މަނާ ތަކެތި ނައްތާލުމަށް ކުރިއަށްގެންދާ ސިލްސިލާ މަސައްކަތްތަކުގެ ތެރެއިން ކުރިއަށްގެންދިޔަ ހަރަކާތެކެވެ.
މި ތަކެއްޗަކީ 30 ޖަނަވަރީ 2025 ގައި ފުލުހުން ހިންގި ޚާއްސަ އޮޕަރޭޝަނެއްގައި ހިފަހައްޓާފައިވާ ތަކެއްޗެވެ. ފުލުހުން ބުނި ގޮތުގައި، މި ތަކެތި އަތުލައިގަނެފައިވަނީ މާލޭގެ ހެންވޭރު ގެއެއްގެ އެޕާޓްމަންޓެއްގައި ހިންގަމުންދިޔަ އޮފީހެއްގެ ތެރެއިންނެވެ. އެތަނުގައި ގާނޫނާ ހިލާފަށް ސިނގިރެޓް އުފައްދާ މެޝިން ބަހައްޓައިގެން، ސިނގިރެޓް އުފައްދަމުންދިޔަ ކަމަށް ތުހުމަތުކުރެވޭ މައްސަލައާ ގުޅިގެން ފުލުހުން ވަނީ އެ ތަކެތި އެ އިދާރާގެ ބެލުމުގެ ދަށަށް ގެންގޮސްފައެވެ.
މި މައްސަލައިގައި އަތުލައިގަތް މެޝިނަރީއާއި ގިނަ އަދަދެއްގެ ތަކެތީގެ ސަބަބުން، މިއީ ފުޅާ ދާއިރާއެއްގައި ސިއްރުން ހިންގަމުންދިޔަ އޮޕަރޭޝަނެއްކަން ފުލުހުން ވަނީ ފާހަގަކޮށްފައެވެ.
މި ތަކެތި ނައްތާލާފައިވަނީ، ފުލުހުންގެ ބެލުމުގެ ދަށަށް ގެނެވޭ މިފަދަ ތަކެތި ނައްތާލުމުގައި އަމަލުކުރާނެ ރަސްމީ އުސޫލުގެ ދަށުންނެވެ. އަދި މި މަސައްކަތް ކުރިއަށް ގެންގޮސްފައިވަނީ އެކަމަށްޓަކައި ޚާއްސަކޮށް އެކުލަވާލާފައިވާ ކޮމިޓީއެއްގެ ސީދާ ބެލުމުގެ ދަށުން ކަމަށް ފުލުހުން ބުނެފައިވެއެވެ.
ގާނޫނާ ހިލާފަށް ދުންފަތުގެ ބާވަތްތައް އުފައްދައި ވިއްކުމަކީ ރާއްޖޭގައި މަނާކަމަކަށް ވާއިރު، މިފަދަ އަމަލުތައް ހުއްޓުވުމަށް ފުލުހުން ދަނީ ޚާއްސަ ސަމާލުކަމެއް ދީގެން މަސައްކަތް ކުރަމުންނެވެ. ރާއްޖޭގެ މާކެޓްގައި އޭރު ވަގު ސިނގިރޭޓް އިންތިޚާއަށް އިތުރުވީ ސަރުކާރުން ކުއްލިއަކަށް ސިނގިރޭޓްގެ ޑިއުޓީ ވަރަށް ބޮޑަށް ބޮޑު ކުރުމުންނެވެ. ސަރުކާރުން މި ފަހުން ވަނީ އެ ޑިއުޓީ ދެގުނަ ކުޑަކޮށްފައެވެ.