މިދިޔަ ހަފުތާގައި ސްކޭމްގެ 36 މައްސަލަ ރިޕޯޓުކޮށްފައިވާ ކަމަށާއި، އެ މައްސަލަތަކުގައި ގެއްލުނު ފައިސާގެ އަދަދު 454،767.32 ރުފިޔާއަށް އަރާކަމަށް ފުލުހުން މިއަދު ބުނެފިއެވެ.
ކުރީ ހަފުތާއާ އަޅާބަލާއިރު މިދިޔަ ހަފުތާގައި ސްކޭމްތަކުގައި ގެއްލުނު ފައިސާގެ އަދަދު ވަނީ އިތުރުވެފައެވެ. އެ ހަފުތާގައި ސްކޭމުތަކުން ގެއްލިފައިވަނީ 358،000 ރުފިޔާއެވެ.
ފުލުހުން އާންމުކޮށްފައިވާ މިދިޔަ ހަފުތާގެ ތަފާސްހިސާބުތަކަށް ބަލާއިރު، މިދިޔަ ހަފުތާގައި ވެސް އެންމެ ގިނަ މީހުންނަށް ލަނޑު ލިބިފައި ވަނީ އީ ކޮމާސް ޕްލެޓްފޯމްތައް މެދުވެރިކޮށް ހިންގި ސްކޭމްތަކުންނެވެ. އެ ސްކޭމުތަކުން ގެއްލުނު ހަތަރު ލައްކައަށް ވުރެން ގިނަ ރުފިޔާގެ ތެރެއިން 218،645.00 ފުލުހުން ވަނީ އަނބުރާ ހޯދާފައެވެ.
މީގެ ތެރޭގައި ހިމެނެނީ އޮންލައިން މެސެޖިންގް ޕްލެޓްފޯމްތަކާއި، އައިބޭ، ޓިކްޓޮކް، ފޯން ކޯލް، ފިޝިންގް ލިންކު އަދި ފޭސްބުކް މާކެޓްޕްލޭސް މެދުވެރިކޮށް ހިންގާފައިވާ ސްކޭމްތައް ކަމަށް ފުލުހުން ބުންޏެވެ.
މިދިޔަ ހަފުތާގައި ފުލުހުންނަށް ހުށަހަޅާފައިވާ ސްކޭމްތަކުގެ ބާވަތްތަކަށް ބަލާއިރު، އީ ކޮމާސް ސްކޭމްގެ 18 މައްސަލަ ހިމެނެއެވެ. މީގެ އިތުރުން ފައިސާ މާރުކުރުމުގައި ހިންގާފައިވާ ސްކޭމްގެ ހަތް މައްސަލައެއް ހުށަހަޅާފައިވާއިރު، އިމްޕާސަނޭޝަންގެ ހަތަރު މައްސަލައަކާއި ބުކިންގް ކެންސަލޭޝަން އަދި ރީފަންޑް ސްކޭމްގެ ތިން މައްސަލައެއްގެ އިތުރުން އިންވެސްޓްމެންޓް ސްކޭމްގެ އެއް މައްސަލަ ހުށަހަޅާފައިވާކަމަށް ފުލުހުންގެ ތަފާސްހިސާބުތަކުން ދައްކައެވެ. އަދި އެހެނިހެން ދެ މައްސަލައެއް ހުށަހަޅާފައިވާކަމަށް ތަފާސްހިސާބުތަކުން ދައްކައެވެ.
މިދިޔަ ހަފުތާގައި ފުލުހުން ބޭއްވި ނޫސްވެރިންގެ ބައްދަލުވުމެއްގައި ފުލުހުން ވަނީ ރާއްޖޭގެ ސްކޭމް ރިކަވަރީ ރޭޓު، ނުވަތަ މަކަރާއި ހީލަތުގެ ސަބަބުން ލިބޭ ގެއްލުން އިޔާދަ ކުރެވޭ މިންވަރަކީ "ގްލޯބަލް ބެސްޓެއް" ގެ ގޮތުގައި ސިފަކޮށް، އެ ދާއިރާއިން ރާއްޖެއާ ވާދަކުރަނީ އިނގިރޭސިވިލާތާއި އެމެރިކާއާ ކަމަށް ބުނެފައެވެ.
އެގޮތުން، އަހަރުގެ މިހާތަނަށް ބަލާއިރު ސްކޭމްތަކުގައި ގެއްލުން ލިބުނު 852 މީހުންނަށް ވަނީ އެ މީހުންގެ އަތުން ގެއްލުނު ފައިސާ އެއްކޮށް ރައްދުކޮށްފައި ކަމަށް ފުލުހުން ބުންޏެވެ. އަދި 320 މީހުންގެ އަތުން ގެއްލުނު ފައިސާއިން ބައެއް ފުލުހުން ހޯދައި ރައްދުކޮށްދީފައިވާކަމަށް ފުލުހުންގެ ތަފާސްހިސާބުތަކުން ދައްކައެވެ.
ރާއްޖޭގައި ސްކޭމް މައްސަލަތައް އިތުރުވަމުން އަންނާތީ ފުލުހުން އަބަދުވެސް ދަނީ މިކަންކަމަށް ސަމާލުވުމަށް އިލްތިމާސްކޮށް، ސްކޭމްތަކުން ރައްކާތެރިވުމަށް ކުރަންވީ ކަންކަމުގެ އިރުޝާދުތައް ދެމުންނެވެ.