ދިވެހިރާއްޖޭގައި ނުރައްކާތެރި ކެމިކަލް ވިއްކާ ފަރާތްތަކުން ހުއްދަ ނެގުމަށާއި، ކެމިކަލް ރައްކާކުރާ ތަންތަން ރަޖިސްޓްރީކުރުމަށް ދީފައިވާ މުއްދަތު އިތުރު އެއް މަސް ދުވަހަށް އިތުރުކޮށްފިއެވެ.
ނުރައްކާތެރި ކެމިކަލާ ބެހޭ ގަވާއިދުގެ ދަށުން، ނުރައްކާތެރި ކެމިކަލް ވިއްކުމަށްޓަކައި 'ކެމިކަލް ވިއްކުމުގެ ހުއްދަ' ނެގުމަށާއި އެފަދަ ތަކެތި ސްޓޯރުކުރާ ނުވަތަ ބަހައްޓާ ތަންތަން ޕޯޓަލްގައި ރަޖިސްޓްރީކުރުމަށް ކުރިން ދިން މުއްދަތު ވަނީ ހަމަވެފައެވެ.
ނަމަވެސް އެ މުއްދަތުގެ ތެރޭގައި ހުއްދައަށް އެދުނު ފަރާތްތަކުގެ އަދަދު ނިސްބަތުން މަދުކަމަށް ފާހަގަކުރެވިފައިވާތީ، އިތުރު އެއް މަސް ދުވަހުގެ މުއްދަތެއް ދިނުމަށް ޑިފެންސް މިނިސްޓްރީން ވަނީ ނިންމާފައެވެ.
ޑިފެންސްއިން އާންމުކުރި އިޢުލާނުގައި ބުނެފައިވާ ގޮތުގައި، އިތުރުކޮށްދިން މުއްދަތުގެ ތެރޭގައި ރަޖިސްޓްރީ ނުކޮށް ކެމިކަލް ވިއްކަމުންދާ ފަރާތްތަކާމެދު ނުރައްކާތެރި ކެމިކަލާ ބެހޭ ގަވާއިދުގެ ދަށުން ފިޔަވަޅު އަޅާނެއެވެ.
އަދި އެފަދަ ފަރާތްތަކަށް ރާއްޖެއަށް ނުރައްކާތެރި ކެމިކަލް އެތެރެކުރުމުގެ ހުއްދަ އިތުރަށް ނުދެވޭނެ ކަމަށްވެސް ވަނީ އަންގާފައެވެ.
"ދިވެހިރާއްޖޭގައި ނުރައްކާތެރި ކެމިކަލް ވިއްކާ ފަރާތްތަކުން، "ކެމިކަލް ވިއްކުމުގެ ހުއްދަ"
ނެންގެވުމަށާއި، އެ ކެމިކަލްތައް ވިއްކުމަށްޓަކައި ސްޓޯ ކުރާ ނުވަތަ ބަހައްޓާ ތަންތަން މަކުޑި ޕޯޓަލްގައި ރެޖިސްޓާ ކުރެއްވުމަށް ދެވިފައިވާ މުއްދަތަށް މިއަދުން ފެށިގެން އެއް މަސް ދުވަސް އިތުރު ކުރެވިފައިވާ ކަމުގައި ދެންނެވީމެވެ." ދިފާއީ ވުޒާރާގެ އިއުލާނުގައި ވެއެވެ.
ގަވާއިދާ ހިލާފުވާ ފަރާތްތައް 50،000 ރުފިޔާއިން ފެށިގެން 1،000،000 ރުފިޔާއާ ދެމެދުގެ އަދަދަކުން ޖޫރިމަނާކުރުމާއި، ތަކެތި އަތުލައިގަތުމާއި، ވިޔަފާރި ހުއްދަ ބާތިލުކުރުމުގެ އިތުރުން ޖިނާއީ ދައުވާ އުފުލޭނެއެވެ.
މާލޭގައި ސިއްރުން އަދި ސަލާމަތީ މިންގަނޑުތަކާ ޚިލާފަށް ކެމިކަލް ގުދަން ކުރުމުގެ ސަބަބުން މީގެކުރިންވެސް ހިތާމަވެރި ހާދިސާތައް ހިނގާފައިވެއެވެ.
އެގޮތުން 2019 ވަނަ އަހަރުގެ ސެޕްޓެންބަރު މަހު ހެންވޭރު އަބަދަށްފެހި މަގުގައި ހުރި ކެމިކަލް ގުދަނެއްގައި ރޯވެ ހިނގި ނުރައްކާތެރި އަލިފާނުގެ ހާދިސާގައި މީހަކު ނިޔާވެ، އެތައް ގެއަކަށާއި ގުދަނަކަށް ބޮޑެތި ގެއްލުންތަކެއް ލިބުނެވެ.
އެ ހާދިސާއަށްފަހު މާލޭގައި ހުރި 40 އެއްހާ ގުދަން ތިލަފުއްޓަށް ބަދަލުކުރިއެވެ.
އޭގެ ފަހުންވެސް 2023 ވަނަ އަހަރު ލިލީ މަގުގައި ގަވާއިދާ ޚިލާފަށް ހިންގި ކެމިކަލް ގުދަނެއް ފެނިގެން ބަންދުކޮށްފައިވާއިރު، މިއަހަރު މާފަންނުގައި ގަސް ހެއްދުމަށް ބޭނުންކުރާ ކެމިކަލް ހުރި ގުދަނެއްގައިވެސް އަލިފާނުގެ ހާދިސާއެއް ވަނީ ހިނގާފައެވެ.
ތަފާސްހިސާބުތަކުން ދައްކާ ގޮތުގައި މާލޭގައި މިހާރު ވެސް ކެމިކަލް ގުދަންކުރާ 144 ތަނަކާއި، ކެމިކަލް ވިއްކާ 62 ފިހާރައެއް އެބަހުއްޓެވެ.
މީހުން ދިރިއުޅޭ ގެތަކުގަޔާއި ފިހާރަތަކުގެ ގުދަންތަކުގައި ގަވާއިދާ ހިލާފަށް ކެމިކަލް ގުދަންކޮށްފައިވާނަމަ އެމްއެންޑީއެފް ނުވަތަ ފުލުހުންނަށް ރިޕޯޓުކުރުމަށް ކަމާބެހޭ އިދާރާތަކުން ވަނީ އިލްތިމާސްކޮށްފައެވެ.