ޔޫރަޕުގެ ބައެއް މަންޒިލަތަކުން ރާއްޖެއަށް ދަތުރުކުރާ ބައެއް އެއާލައިންތަކުގެ ބިޒްނަސް ކްލާސް ޓިކެޓުގެ އަގު 2،000 ޑޮލަރަށް ވުރެ ދަށްކޮށްފިއެވެ.
ޓްރެވަލް ވެބްސައިޓެއް ކަމަށްވާ އިންސައިޑްފްލަޔާއިން ރިޕޯޓުކޮށްފައިވާ ގޮތުގައި، އޭޝިއާގެ މަންޒިލްތަކަށާއި ރާއްޖެއަށް ބިޒްނަސް ކްލާހުގައި ދަތުރުކުރާ ފަރާތްތަކަށް 2،120 ޑޮލަރަށް ވުރެ ހެޔޮކޮށް މިހާރު ޓިކެޓު ލިބެން ހުންނާނެއެވެ. މީގެ ތެރޭގައި އިއްތިހާދު އެއާވޭސް އަދި އޮމާން އެއާ ހިމެނޭ ކަމަށް އެ ވެބްސައިޓުން ބުނެފައިވެއެވެ.
އެގޮތުން، އިއްތިހާދު އެއާވޭސްއިން އަޔަލޭންޑުގެ ޑަބްލިންއިން ވެލާނާ އިންޓަނޭޝަނަލް އެއާޕޯޓަށް ކުރާ ދަތުރުތަކުގެ ދެކޮޅު ޓިކެޓު 1،474 ޕައުންޑް (ގާތްގަނޑަކަށް 1،950 ޑޮލަރު) އަށް ވިއްކަމުންދާ ކަމަށް އެ ރިޕޯޓުގައި ފާހަގަކޮށްފައިވެއެވެ.
އޮމާން އެއާއިން ރާއްޖެއަ ދަތުރުތައް ފެށުން-- ފޮޓޯ/ އެމްއޭސީއެލްއިންސައިޑްފްލަޔާއިން ބުނި ގޮތުގައި، ޔޫރަޕުން ރާއްޖެއަށް އާންމުކޮށް ބިޒްނަސް ކްލާހުގައި ދަތުރުކުރާ އަގުތައް 3،000 ޕައުންޑް (3،950 ޑޮލަރު) އަށް ވުރެ މައްޗަށް ދެއެވެ. އެހެންކަމުން، މިހާރު ވިއްކަމުންދާ 1،474 ޕައުންޑުގެ ޓިކެޓަކީ އާންމު އަގުތަކާ އަޅައި ބަލާއިރު ވަރަށް ބޮޑު ތަފާތެކެވެ.
މި ޕްރޮމޯޝަނަލް އަގުތަކުގައި ޓިކެޓު ލިބެން ހުންނާނީ އަންނަ އަހަރުގެ ޖެނުއަރީ މަހުން ފެށިގެން މާޗު މަހުގެ ނިޔަލަށް ކުރާ ބައެއް ދަތުރުތަކަށެވެ. ނަމަވެސް، މިއީ ވަކި މުއްދަތަކަށް ހުޅުވާލާފައިވާ ފުރުސަތަކަށް ވުމުން، އެއްވެސް އެންގުމަކާ ނުލައި އަގުތަކަށް ބަދަލު އައުމަކީ އެކަށީގެންވާ ކަމެއް ކަމަށް އެ ވެބްސައިޓުން ބުނެފައިވެއެވެ.
ޓިކެޓު ގަތުމުގެ ކުރިން ދަތުރުކުރާ ރޫޓާއި، ލިބޭ ޚިދުމަތްތަކުގެ އިތުރުން އެއާލައިންގެ ޝަރުތުތައް ބެލުމަށް ވެސް އެ ފަރާތުން އިރުޝާދުދީފައިވެއެވެ. މީގެ އިތުރުން، އިއްތިހާދު އެއާވޭސްގެ ވެބްސައިޓުން ދައްކާ ގޮތުގައި، ޑަބްލިންއިން މާލެއަށް އިކޮނޮމީ ކްލާހުގައި ކުރާ ދަތުރުތަކުގެ ދެކޮޅު ޓިކެޓު ބައެއް ދުވަސްތަކުގައި 647 ޔޫރޯއާއި 672 ޔޫރޯއާ ދެމެދުގެ އަގުތަކެއްގައި ލިބެން ހުރެއެވެ.
މި ޕްރޮމޯޝަނަލް އަގުތަކުގެ ސަބަބުން ޔޫރަޕުގެ މާކެޓުން ރާއްޖެއަށް ޕްރީމިއަމް ކްލާހުގައި ދަތުރުކުރާ ފަތުރުވެރިންނަށް ލުއިފަސޭހަތަކެއް ލިބޭނެ ކަމަށް އިންސައިޑްފްލަޔާއިން ފާހަގަކޮށްފައިވެއެވެ. ރާއްޖޭގެ ފަތުރުވެރިކަމުގެ ސިނާއަތަކީ ބައިނަލްއަގުވާމީ ވައިގެ ދަތުރުފަތުރުގެ މައްޗަށް ބޮޑަށް ބަރޯސާވާ ސިނާއަތަކަށް ވާއިރު، އެއާލައިންތަކުގެ ޓިކެޓުގެ އަގުތަކަށް އަންނަ ބަދަލުތަކާއި ޕްރޮމޯޝަންތަކަކީ ރާއްޖޭގެ މާކެޓަށް އޭގެ އަސަރުކުރާނެ ކަންކަމެވެ.
ތަފާސްހިސާބުތައް ދައްކާ ގޮތުން ޔޫރަޕަކީ ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ އެއް ސަރަހައްދެވެ. ނަމަވެސް، މިހާރު އިއުލާންކޮށްފައިވާ ހެޔޮ އަގުތަކަކީ ވަކި މަންޒިލްތަކަކުން ފުރާ ދަތުރުތަކަށާއި ވަކި ދުވަސްތަކަކަށް ޚާއްސަކޮށްފައިވާ އަގުތަކެއް ކަމުން، މިއީ ރާއްޖެއަށް ކުރާ ހުރިހާ ބިޒްނަސް ކްލާސް ދަތުރުތަކެއްގެ އަގު އާންމުކޮށް ދަށްވުން ކަމުގައި ނުބެލުމަށް އެ ވެބްސައިޓުން ވަނީ ބުނެފައެވެ.