ފީފާ ވޯލްޑް ކަޕް 2026 ގެ ފުރަތަމަ ސެމީ ފައިނަލް މެޗުގައި ބައްދަލުކުރަނީ ދުނިޔޭގެ ފުޓްބޯޅައިގެ ގަދަ ދެ ބާރު ކަމަށްވާ ފްރާންސާއި ސްޕެއިނެވެ.
އެމެރިކާގެ ޓެކްސަސްގައި ކުޅޭ މި މެޗަކީ ފުޓްބޯޅަ ސަޕޯޓަރުންގެ ބޮޑު ސަމާލުކަމެއް ލިބިފައިވާ، ހުރިހާ ގޮތަކުންވެސް ފޯރިގަދަވާނެ ކުރިމަތިލުމެކެވެ.
ޖެހިޖެހިގެން ތިންވަނަ ވޯލްޑް ކަޕް ފައިނަލަށް ދިއުމަށް ފްރާންސް މަސައްކަތް ކުރަމުންދާއިރު، ސްޕެއިން ނުކުންނަނީ 2010 ވަނަ އަހަރަށްފަހު ފުރަތަމަ ފަހަރަށް ތަށި ނެގުމުގެ އުއްމީދުގައެވެ.
ފްރާންސުން ވަނީ މިފަހަރުގެ ވޯލްޑް ކަޕުގެ ގްރޫޕް ސްޓޭޖުގެ ހުރިހާ މެޗަކުން މޮޅުވެ، ގްރޫޕްގެ އެއްވަނަ 9 ޕޮއިންޓާއެކު ހޯދާފައެވެ. ގްރޫޕް މެޗުތަކުގައި 10 ގޯލު ޖަހައި، ބައިކޮޅަށް ވަނީ އެންމެ 2 ގޯލެވެ.
ނޮކްއައުޓް ބުރުގައި ސުވިޑަން، ޕެރަގުއޭ އަދި މޮރޮކޯ ބަލިކޮށް ސެމީ ފައިނަލުން ޖާގަ ހޯދިއިރު، ނޮކްއައުޓް ތިން މެޗުގައިވެސް ބައިކޮޅަށް ގޯލެއް ވަދެފައެއް ނުވެއެވެ.
ސްޕެއިން ވަނީ ގްރޫޕް ސްޓޭޖުގެ އެއްވަނަ 7 ޕޮއިންޓާއެކު ހޯދާފައެވެ (2 މޮޅު، 1 އެއްވަރު). ގްރޫޕް ސްޓޭޖުގައި އެއްވެސް ގޯލެއް ބައިކޮޅަށް ނުވަދެ ދެއްކި ވަރުގަދަ ޑިފެންސިވް ރެކޯޑާއެކު، ނޮކްއައުޓް ބުރުގައި ޕޯޗުގަލް އަދި ބެލްޖިއަމް ފަދަ ވަރުގަދަ ޓީމުތައް ބަލިކޮށް ސެމީ ފައިނަލަށް ދަތުރުކުރިއެވެ.
މެޗު ކުޅޭ ސްޓޭޑިއަމް: ޑަލާސް ސްޓޭޑިއަމް
އެމެރިކާގެ ޓެކްސަސްގެ އާލިންގްޓަންގައިވާ ޑަލާސް ސްޓޭޑިއަމަކީ ފީފާ ވޯލްޑް ކަޕް 2026 ގައި އެންމެ ގިނަ މެޗު ހޯސްޓްކުރާ ދަނޑެވެ.
ފީފާގެ ސްޕޮންސަޝިޕް ގަވާއިދުތަކުގެ ދަށުން މުބާރާތުގެ ވަގުތުގައި މި ދަނޑަށް ކިޔަނީ "ޑަލާސް ސްޓޭޑިއަމް" އެވެ. މިއީ އެންމެ ޒަމާނީ ފެންވަރުގެ، "ރީޓްރެކްޓަބަލް ރޫފް" (ލައްޕައި ހުޅުވޭ ފުރާޅު) އަދި ފުރިހަމައަށް އެއާކޮންޑިޝަން ކުރެވިފައިވާ، ވޯލްޑް ކަޕް މުބާރާތުގައި 70,000 އަށްވުރެ ގިނަ ސަޕޯޓަރުންނަށް ވަދެވޭ ދަނޑެކެވެ.
މި މުބާރާތުގައި ޑަލާސް ސްޓޭޑިއަމްގައި ޖުމްލަ 9 މެޗު ކުޅޭއިރު، އޭގެ ތެރޭގައި ގްރޫޕް ސްޓޭޖުގެ 5 މެޗުގެ އިތުރުން، ރައުންޑް އޮފް 32 ގެ 2 މެޗާއި، ރައުންޑް އޮފް 16 ގެ މެޗެއްގެ އިތުރުން، ފޯރިގަދަ ސެމީ ފައިނަލް މެޗު ހިމެނެއެވެ.
ގްރޫޕް ސްޓޭޖުގައި މި ދަނޑުގައި ކުޅެވުނު މެޗުތަކަށް ބަލާއިރު، ޖޫން 14 ގައި ކުޅެވުނު ގްރޫޕް އެފްގެ މެޗުން ނެދަލޭންޑްސް އާއި ޖަޕާން 2-2 އިން އެއްވަރުވިއިރު، ޖޫން 17 ގައި ގްރޫޕް އެލްގައި އިންގްލޭންޑުން ވަނީ 4-2 އިން ކްރޮއޭޝިއާ ބަލިކޮށްފައެވެ.
މީގެ އިތުރުން ޖޫން 22 ގައި ގްރޫޕް ޖޭގައި އާޖެންޓީނާއިން 2-0 އިން އޮސްޓްރިއާ ބަލިކުރިއިރު، ޖޫން 25 ގައި ގްރޫޕް އެފްގައި ޖަޕާނާއި ސުވިޑަން ކުޅުނު މެޗު ނިމުނީ 2-2 އިން އެއްވަރުވެގެންނެވެ. ގްރޫޕް ސްޓޭޖުގެ ފަހު މެޗުގައި ޖޫން 27 ގައި އާޖެންޓީނާއިން ވަނީ 3-1 އިން ޖޯޑަން ބަލިކޮށްފައެވެ.
ނޮކްއައުޓް ބުރުގެ މެޗުތަކަށް ބަލާއިރު، ޖޫން 30 ގައި ކުޅެވުނު ރައުންޑް އޮފް 32 ގެ މެޗުން ނޯވޭއިން 2-1 އިން އައިވަރީ ކޯސްޓް ބަލިކުރިއިރު، ޖުލައި 3 ގައި ކުޅުނު ރައުންޑް އޮފް 32 ގެ މެޗުގައި 1-1 އިން އެއްވަރުވުމުން ޕެނަލްޓީ ޖަހައިގެން 4-2 އިން އޮސްޓްރޭލިއާގެ މައްޗަށް މިސްރުން ކުރިހޯދިއެވެ.
އަދި ޖުލައި 6 ގައި ކުޅުނު ގަދަ 16 ގެ މެޗުގައި ސްޕެއިން ވަނީ 1-0 އިން ޕޯޗުގަލް ބަލިކޮށް ސެމީ ފައިނަލުން ޖާގަ ހޯދާފައެވެ. މި ދަނޑުގައި ކުޅެވޭ އެންމެ ފަހު މެޗަކީ ޖުލައި 14 ގައި ފްރާންސް އާއި ސްޕެއިން ބައްދަލުކުރާ ސެމީ ފައިނަލް މެޗެވެ.
ހެޑް-ޓު-ހެޑް
މުޅި ތާރީޚަށް ބަލާއިރު ފްރާންސް އާއި ސްޕެއިން ވަނީ އެކި މުބާރާތްތަކާއި އެކުވެރިކަމުގެ މެޗުތަކުގައި 38 ފަހަރު ބައްދަލުކޮށްފައެވެ. މީގެ ތެރެއިން 18 މެޗުން ސްޕެއިން ވަނީ މޮޅުވެފައެވެ. ފްރާންސް 13 މެޗުން މޮޅުވެފައިވާއިރު، 7 މެޗު ވަނީ އެއްވަރުވެފައެވެ.
ވޯލްޑް ކަޕްގެ ތާރީޚުގައި މި ދެ ޓީމު ކުރިން ބައްދަލުކޮށްފައިވަނީ އެންމެ ފަހަރަކު އެވެ. އެއީ 2006 ވަނަ އަހަރުގެ ވޯލްޑް ކަޕްގެ ރައުންޑް އޮފް 16 ގައެވެ. އެ މެޗު 3-1 އިން ކާމިޔާބުކުރީ ފްރާންސެވެ. ނަމަވެސް އެންމެ ފަހުން ބޭއްވި ޔޫރޯ 2024 ގެ ސެމީ ފައިނަލްގައި ފްރާންސް 2-1 އިން ބަލިކޮށް ފައިނަލަށް ދިޔައީ ސްޕެއިންއެވެ.
ދެ ޓީމުގެ ތާރީޚީ ކާމިޔާބީތައް
ފްރާންސަކީ ވޯލްޑް ކަޕް ދެ ފަހަރު (1998, 2018) އަދި ޔޫރޯ މުބާރާތް ދެ ފަހަރު (1984, 2000) ކާމިޔާބުކޮށްފައިވާ ގައުމެކެވެ. އެމީހުންގެ ކުޅުމުގެ ސްޓައިލް ބިނާވެފައިވަނީ ވަރުގަދަ ޑިފެންސާއި، އަވަސް ކައުންޓަރ އެޓޭކްތަކުގެ މައްޗަށެވެ.
ފްރާންސުން 2018 ގެ ވޯލްޑް ކަޕް ޓްރޮފީ އުފުލާލަނީ--
ސްޕެއިންއަކީ 2010 ވަނަ އަހަރުގެ ވޯލްޑް ކަޕް ޗެމްޕިއަނުންގެ އިތުރުން ޔޫރޯ މުބާރާތް 4 ފަހަރު (1964, 2008, 2012, 2024) ހޯދާފައިވާ ޔޫރަޕުގެ އެންމެ ކާމިޔާބު ޓީމެވެ.
2010 ވަނަ އަހަރު ބޭއްވި ފީފާ ވޯލްޑް ކަޕުގެ ޗެމްޕިއަންކަން ހޯދި ސްޕެއިން ޓީމު--
ސްޕެއިންގެ ކުޅުން ބިނާވެފައިވަނީ ބޯޅަ ހިފަހައްޓައިގެން ކުޅޭ ގޮތަށެވެ. ނުވަތަ މެދުތެރޭގެ ވަރުގަދަ ކޮންޓްރޯލްގެ މައްޗަށެވެ. މިއީ ކޮންމެ މުބާރާތެއްގައި ވެސް ސްޕެއިންގެ އެންމެ ވަރުގަދަ ޑިޕާޓްމަންޓެވެ.
އަންދާޒާ ކުރެވޭ ލައިންއަޕް
ފްރާންސް (4-2-3-1 ފޯމޭޝަން)
މައިކް މައިގްނާން (ގޯލްކީޕަރު)، ޖޫލްސް ކުންޑޭ، ވިލިއަމް ސާލީބާ، ދަޔޯޓް އުޕަމެކާނޯ، ތިއޯ ހެނާންޑޭޒް، އަދްރިއަން ރަބިއޯ، މަނޫ ކޯނޭ، އޮސްމާން ދެމްބެލޭ، މައިކަލް އޮލީސޭ، ބްރެޑްލީ ބާކޯލާ، ކީލިއަން އެމްބާޕޭ.
ސްޕެއިން (4-3-3 ފޯމޭޝަން)
އުނާއި ސިމޮން (ގޯލްކީޕަރު)، ދާނީ ކުރްވަހާލް، ރޮބިން ނޯމަންޑް، އައިމެރިކް ލަޕޯޓް، މާކް ކުކުރެޔާ، ރޮޑްރީ، ދާނީ އޮލްމޯ، ފަބިއަން ރުއިޒް، ލަމީން ޔަމާލް، އަލްވާރޯ މޮރާޓާ، ނިކޯ ވިލިއަމްސް.
މެޗުގެ ކުރިން ކޯޗުންގެ ބަސް
ޑިޑިއޭ ޑިޝޯމްޕްސް (ފްރާންސްގެ ކޯޗު):
"ސްޕެއިނަކީ މުޅި މުބާރާތުގައިވެސް އެންމެ ބޯޅަ ހިފަހައްޓައިގެން ކަންކަން ކޮންޓްރޯލްކުރާ ޓީމު. އެމީހުންގެ މެދުތެރެއަކީ ވަރަށް ނުރައްކާތެރި ބައެއް. ނަމަވެސް އަހަރެމެންގެ ޓީމުގައި ބޮޑެތި މެޗުތައް ކާމިޔާބުކުރުމުގެ ތަޖުރިބާއާއި އެޓޭކިންގް ވަސީލަތްތައް އެބައޮތް. އަހަރެމެން ނުކުންނާނީ ފައިނަލަށް ދިޔުމުގެ ފުރިހަމަ އުއްމީދާއެކު."
ލުއިސް ޑި ލަ ފުއެންޓޭ (ސްޕެއިންގެ ކޯޗު)
"ފްރާންސްގައި ދުނިޔޭގެ ފެންވަރުގެ ކުޅުންތެރިން އެބަތިބި. ކީލިއަން އެމްބާޕޭ އާއި އޮސްމާން ދެމްބެލޭ ފަދަ އަވަސް ފޯވާޑުން ހުއްޓުވުމަކީ ފަސޭހަ ކަމެއް ނޫން. ނަމަވެސް އަހަރެމެންގެ ކުޅުންތެރިންގެ ކޮންފިޑެންސް ވަރަށް ރަނގަޅު. އަހަރެމެންގެ އަމިއްލަ ސްޓައިލްގައި ބޯޅަ ހިފަހައްޓައިގެން މެޗު ކާމިޔާބުކުރަން މަސައްކަތް ކުރާނަން."
ފީފާ ވޯލްޑް ކަޕުގެ ސެމީ ފައިނަލުގައި ފްރާންސާއި ސްޕެއިން ބައްދަލުކުރާ މެޗު ކުޅުމަށް ހަމަޖެހިފައިވަނީ ރާއްޖެގަޑިން މިރޭ 00:00 ގައެވެ.