ބޮލީވުޑްގެ ބަތަލާ ކަރީނާ ކަޕޫރު ޚާން ދާދިފަހުން މަސައްކަތް ނިންމާލި ފިލްމު "ދާއިރާ" މި އަހަރުގެ ސެޕްޓެމްބަރު މަހު ސިނަމާތަކަށް ގެންނަން ނިންމިކަން އިއުލާނުކޮށްފިއެވެ.
މެގްނާ ގުލްޒާރު ޑައިރެކްޓްކޮށް ދެކުނު އިންޑިއާގެ އެކްޓަރު ޕްރިތުވީރާޖް ސުކުމަރަން މުހިއްމު ރޯލަކުން ފެންނާނެ "ދާއިރާ" އަކީ ކަރީނާގެ 25 އަހަރުވީ ފިލްމީ ކެރިއަރުގެ 68 ވަނަ ފިލްމެވެ.
އިންވެސްޓިގޭޓިވް ކްރައިމް ތުރިލާއެއް ކަމަށްވާ މި ފިލްމުގައި ޕްރިތުވީރާޖް އަދި ކަރީނާ ފެންނާނީ ފުލުސް އޮފިސަރުންގެ ރޯލްތަކުންނެވެ. މި ފިލްމު ސިނަމާތަކަށް ގެންނަ ތާރީޚު އިއުލާނުކުރިއިރު ފިލްމުގެ ޝޫޓިންގް ކުރިއަށްދިޔަ ދުވަސްވަރުގެ ބައެއް މަންޒަރުތައް ދައްކުވައިދޭ ވީޑިއޯއެއްވެސް ބެލުންތެރިންނާ ވަނީ ހިއްސާކޮށްފައެވެ.
ޕްރިތުވީރާޖް އާއި ކަރީނާ އަލަށް އެކީގައި މަސައްކަތްކުރާ ފިލްމު "ދާއިރާ" ސިނަމާތަކަށް ގެންނާނީ ސެޕްޓެމްބަރު މަހުގެ 18 ވަނަ ދުވަހުއެވެ.
ފިލްމު "ދާއިރާ"ގެ ލީޑް ތަރިން އެ ފިލްމުގެ ޑައިރެކްޓަރު މޭގްނާ ގުލްޒާރުއާ އެކު--ފޮޓޯ/ޕީޕިންގްމޫން
ފިލްމާ ގުޅޭގޮތުން ދެކުނު އިންޑިއާގެ ކުޅަދާނަ އެކްޓަރު ޕްރިތުވީރާޖް ބުނީ، "ދާއިރާ" އަކީ މުޅިން ތަފާތު ވާހަކައެއް ބެލުންތެރިންނަށް ކިޔައިދޭނެ ފިލްމެއް ކަމަށެވެ. ހަމައެއާއެކު މިއީ ކެރިއަރުގައި މިހާތަނަށް ކުޅުނު ވަރަށް ޗެލެންޖިންގް ކެރެކްޓާއެއްގެ ގޮތުގައި ޕްރިތުވީރާޖް ސިފަކޮށްފައިވެއެވެ.
އިންޑިއާގެ މަޝްހޫރު ޅެންވެރިޔާ ގުލްޒާރު އަދި ކުރީގެ ބަތަލާ ރާކީ ގުލްޒާރުގެ ދަރިފުޅު މޭގްނާ ގުލްޒާރަކީ ހިންދީ ސިނަމާގެ އެންމެ ކުޅަދާނަ އަންހެން ފިލްމު ޑައިރެކްޓަރުންގެތެރޭ ހިމެނޭ މީހެކެވެ.
މޭގްނާގެ މަގުބޫލު ފިލްމުތަކުގެތެރޭ، "ތަލްވާރު"، "ރާޒީ" އަދި 2023ގައި އެންމެ މޮޅު ފީޗަ ފިލްމު ކެޓަގަރީން ނެޝަނަލް އެވޯޑު ލިބުނު ފިލްމު "ސާމް ބަހާދުރު" ހިމެނެއެވެ.