ފީފާ ވޯލްޑް ކަޕުގައި ބައިވެރިވާ އީރާންގެ ވަފުދުގެ ތެރެއިން ވިސާ ލިބުމުގައި ބޮޑެތި ދަތިތަކެއް ކުރިމަތިވެފައިވާ އޮފިޝަލުންގެ ތެރެއިން ހަތަރު މީހަކަށް އެމެރިކާގެ ވިސާ އެންމެ ފަހުން ލިބިއްޖެއެވެ.
ވިސާ ނުލިބުނު އީރާންގެ ވަފުދުގެ 15 މެންބަރުންގެ ތެރެއިން 10 މީހަކު މެކްސިކޯއަށް ދިޔުމަށްފަހު އަލުން ވިސާއަށް އެދި ހުށަހެޅި އިސްތިއުނާފު ކާމިޔާބުވެ، ވިސާ ލިބުނު މީހުންގެ ތެރޭގައި ހިމެނެނީ ޓީމުގެ އެނަލިސްޓަކާއި ފެޑެރޭޝަނުގެ އިންޓަރނޭޝަނަލް ޑިޕާޓްމަންޓުގެ ދެ އޮފިޝަލުންނެވެ.
ނަމަވެސް، އިސްތިއުނާފު ކުރި މީހުންގެ ތެރެއިން ބާކީ ތިބި ހަ މީހަކަށް އަލުން ވިސާ ދިނުމަށް ވަނީ އިންކާރުކޮށްފައެވެ.
އޭގެ ތެރޭގައި އީރާން ފުޓްބޯޅަ ފެޑެރޭޝަންގެ ރައީސް މަހުދީ ތާޖާއި، އެ ފެޑެރޭޝަނުގެ ނައިބު ރައީސަކާއި، ދެ އެޑްމިނިސްޓްރޭޓަރުންގެ އިތުރުން މީޑިއާ އޮފިސަރަކާއި ސެކިއުރިޓީ އޮފިސަރަކު ހިމެނެއެވެ.
މެކްސިކޯގައި ކުރިއަށްދިޔަ އީރާނުގެ ފަރިތަކުރުންތަކުގެ ތެރެއިން--
މީގެ އިތުރުން ދެވަނަ މީޑިއާ އޮފިސަރަކު ވަނީ ފުރަތަމަ ފަހަރު ވިސާ ރިޖެކްޓުވުމާ ގުޅިގެން ދެވަނަ ފަހަރަށް ހުށަނޭޅުމަށް ނިންމާފައެވެ. އެހެންކަމުން، އީރާންގެ ޓީމު އެމެރިކާގައި ކުޅޭ މެޗުތަކަށް އެތެރެވުމުގެ ހުއްދަ ނުލިބި ބާކީ އަދިވެސް 11 މީހުން އެބަތިއްބެވެ.
އީރާނުން މިދިޔަ ހަފުތާގައި ތުހުމަތުކޮށްފައިވާ ގޮތުގައި އެ ގައުމުގެ ގައުމީ ފުޓްބޯޅަ ޓީމުގެ ބެކްރޫމް ސްޓާފުންގެ ތެރޭގައި ހިމެނޭ މުހިންމު މެންބަރުންނަށް ވިސާ ދިނުމަށް އެމެރިކާއިން ގަސްތުގައި އިންކާރުކުރެއެވެ.
މިއީ ވޯލްޑް ކަޕުގައި ބައިވެރިވުމަށް އީރާންގެ ކުޅުންތެރިންނަށް އެމެރިކާއަށް އެތެރެވުމުގެ ހުއްދަދީފައިވާ ކަމަށް ވޮޝިންޓަނުން ބުނެފައިވަނިކޮށް ކުރި ތުހުމަތެކެވެ. އެމެރިކާ އާއި އީރާނާ ދެމެދު އުފެދިފައިވާ ސިޔާސީ ނުތަނަވަސްކަމުގެ ސަބަބުން، ރައްކާތެރިކަމަށްޓަކައި އީރާނުން ވަނީ އެ ޤައުމުގެ ވޯލްޑް ކަޕް ބޭސް ކޭމްޕްވެސް މެކްސިކޯއަށް ބަދަލުކޮށްފައެވެ.
ކެނެޑާ، މެކްސިކޯ އަދި އެމެރިކާ ގުޅިގެން ބާއްވާ މި މުބާރާތުގައި އީރާނުން ކުޅޭ ފުރަތަމަ މެޗުގައި މި މަހުގެ 15 ވަނަ ދުވަހު ލޮސް އެންޖެލިސްގައި ނިއުޒިލެންޑާ ބައްދަލުކުރާނެއެވެ. އޭގެ ފަހުން މި މަހުގެ 21 ގައި ބެލްޖިއަމާ ދެކޮޅަށް އެ ސިޓީގައި ކުޅުމަށްފަހު، މި މަހުގެ 26 ގައި ސިއެޓްލްގައި މިސްރާ ބައްދަލުކުރާނެއެވެ.
އޮފިޝަލުންގެ އިތުރުން އީރާންގެ ސަޕޯޓަރުންނަށް ވޯލްޑް ކަޕުގެ ގްރޫޕް ސްޓޭޖު މެޗުތަކަށް ކަނޑައަޅާފައިވާ ޓިކެޓު އެލޮކޭޝަންވެސް އެމެރިކާގެ އޮފިޝަލުން ވަނީ މި ހަފުތާގެ ކުރީކޮޅު ބާތިލުކޮށްފައެވެ.
ނަމަވެސް ފީފާއިން ބުނެފައިވަނީ އީރާންގެ ސަޕޯޓަރުންނަށް މެޗުތަކަށް ވަނުމުގެ ފުރުސަތު އެންމެ ފުޅާދާއިރާއެއްގައި ހޯދައިދިނުމަށް މަސައްކަތް ކުރަމުންދާ ކަމަށެވެ.
މި ވިސާގެ މައްސަލަ ހަމައެކަނި ކުރިމަތިވެފައިވަނީ އީރާނަކަށް އެކަންޏެއް ނޫނެވެ. ބައެއް އެހެން ގައުމުތަކުގެ ސަޕޯޓަރުންނަށްވެސް އެމެރިކާއަށް އެތެރެވުން މަނާކޮށްފައިވާއިރު، ވޯލްޑް ކަޕުގައި ރެفުރީކަން ކުރުމަށް ހަމަޖެހިފައިވާ ސޯމާލިއާގެ ރެފުރީ އުމަރު އަރޮޓާންއަށްވެސް އެމެރިކާއަށް އެތެރެވުމުގެ ހުއްދަ ވަނީ ނުލިބިފައެވެ.