އެމްޑީޕީގެ ޗެއާޕާސަން އިންތިޚާބު ކާމިޔާބުކުރެއްވި ކުރީގެ ރައީސް މުހައްމަދު ނަޝީދަށް، އެމަނިކުފާނާ ދެކޮޅަށް ވާދަކުރެއްވި ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް މަރުހަބާ ވިދާޅުވެއްޖެއެވެ.
'އެކްސް' ގައި ކުރެއްވި ޕޯސްޓެއްގައި މީކާއީލް ވިދާޅުވީ އިރުކޮޅެއް ކުރިން ރައީސް ނަޝީދަށް ފޯނުކުރައްވައި، އެމަނިކުފާނު ހޯއްދެވި ފުރިހަމަ ކާމިޔާބަށް މަރުހަބާ ދެންނެވި ކަމަށެވެ. އަދި އެމްޑީޕީ އެކަތިގަނޑެއްގެ ގޮތުގާ ބާއްވައި، 2028 އެމްޑީޕީއަށް ކާމިޔާބުކޮށްދިނުމަށް އާ އަޒުމެއްގައި މަސައްކަތްކުރައްވާނެ ކަމަށް މީކާއީލް ވިދާޅުވިއެވެ. އަދި ޕާޓީގެ އާންމު މެންބަރުންނާ އެކު ދެމިހުންނަވާނެ ކަމުގެ ޔަގީންކަން މީކާއީލް ވަނީ އަރުވައިފައެވެ.
ވާދަވެރި ކެމްޕެއިނަކަށް ފަހު ނަޝީދު މި އިންތިޚާބު ކާމިޔާބުކުރެއްވީ މީކާއީލާ ވާދަކުރެއްވުމަށް ފަހެވެ.
މިއަދު މެންދުރު 14:30 ގައި ވޯޓުލާން ފެށި އެ އިންތިޚާބުގެ ވޯޓުލުން ނިމުނީ މިރޭ 21:00 ހާއިރެވެ. މިހާތަނަށް ވަގުތީ ނަތީޖާއިން ދައްކާ ގޮތުގައި ކުރީގައި އުޅުއްވަނީ ނަޝީދެވެ.
މިއީ އެމްޑީޕީގެ އެތެރޭގައި އުފެދިފައިވާ ދެ ފެކްޝަނުގެ މެދުގައި އޮތް ވާދަވެރިކަން އަނެއްކާ ވެސް ފެންނާނެ އިންތިޚާބެއް ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ. މި އިންތިޚާބަކީ ކުރިން އެ މަޤާމުގައި ހުންނެވި ފައްޔާޒު އިސްމާޢީލް މަޤާމުން އިސްތިއުފާ ދެއްވުމާ ގުޅިގެން ބާއްވާ އިންތިޚާބެކެވެ. ފައްޔާޒު މިހާރު ހުންނެވީ ރައީސް ނަޝީދަށް ތާއީދު ކުރައްވައިގެންނެވެ.