ވަންޕްލަސް ކުންފުނީގެ ކުރިއަށް އޮތް ފްލެގްޝިޕް ފޯނު "ވަންޕްލަސް 16" އާ ބެހޭ ގޮތުން ގިނަ މައުލޫމާތުތަކެއް ލީކުވެ، އެ ފޯނު މިހާރު ޓެސްޓުކުރަމުންދާ ކަމަށް ރިޕޯޓުތައް ބުނަން ފަށައިފިއެވެ.
ޗައިނާގެ މަޝްހޫރު ސޯޝަލް މީޑިއާ ޕްލެޓްފޯމެއް ކަމަށްވާ ވީބޯގައި ލީކުކޮށްލާފައިވާ މި މައުލޫމާތުތަކުން އެނގޭ ގޮތުގައި، އާ ފޯނާއެކު ޑިސްޕްލޭ އަދި ކެމެރާގެ ދާއިރާއިން ބޮޑެތި ބަދަލުތަކެއް ފެންނާނެއެވެ.
މި ފޯނުގެ އެންމެ ފާހަގަކޮށްލެވޭ އެއް ބަދަލަކީ 185ހާޓްޒްގެ މަތީ ރިފްރެޝް ރޭޓެއް އެކުލެވޭ ޑިސްޕްލޭއެއް ބޭނުންކޮށްގެން ޓެސްޓުކުރަމުންދިއުމެވެ. މިއީ މިހާތަނަށް ވަންޕްލަސް ފޯނަކުން ފެންނާނެ އެންމެ މަތީ ރިފްރެޝް ރޭޓެވެ.
މީގެ ކުރިން ނެރުނު ވަންޕްލަސް 15 ފޯނުގައި ބޭނުންކޮށްފައިވަނީ 165ހާޓްޒް ގެ ސްކްރީނެކެވެ. މީގެ އިތުރުން މި ފޯނުގެ ސްކްރީންގެ ވަށައިގެންވާ ބޭޒަލްސް ނުވަތަ އަރިމަތީ ދުނިތައް ވަރަށް ތުނިކޮށް، އެންމެ އެއް މިލިމީޓަރަށް ކުޑަކޮށްލާނެ ކަމަށް ބެލެވެއެވެ.
ކެމެރާގެ ބަޔަށް ބަލާއިރު، މި ފޯނުގައި 200 މެގަޕިކްސެލްގެ ސެންސަރަކާއެކު 3އެކްސް ޕެރިސްކޯޕް ޓެލެފޮޓޯ ކެމެރާއެއް ހިމަނާފައިވާނެ ކަމަށް ރިޕޯޓުތައް ބުނެއެވެ. އޭގެ އިތުރުން، އާޓިފިޝަލް އިންޓެލިޖެންސް (އޭއައި)ގެ ފީޗާތަކަށް އަވަހަށް ފުރުސަތު ހޯދައިދިނުމުގެ ގޮތުން ޚާއްސަ "އޭއައި ބަޓަނެއް" ވެސް މި ފޯނުގައި ހިމެނުމަށް ދަނީ ސާވޭކުރަމުންނެވެ.
މި ފޯނުގެ ޕްރޮސެސަރަކަށް ބޭނުންކުރާނީ ކުއަލްކޮމްގެ އެންމެ ފަހުގެ "ސްނެޕްޑްރެގަން 8 އެލީޓް ޖެން 6 ޕްރޯ" ޗިޕްސެޓް ކަމަށް ލަފާކުރެވެއެވެ. އަދި ބެޓެރީގެ ގާބިލުކަން އިތުރުކުރުމުގެ ގޮތުން 7,000 މިލީއެމްޕަޔާ އާ ގާތްކުރާ ބޮޑު ބެޓެރީއެއް މި ފޯނުގައި ހިމެނުން އެކަށީގެންވެއެވެ.
ވަންޕްލަސް ކުންފުނިން ރަސްމީކޮށް ވަންޕްލަސް 16 ނެރޭނެ ތާރީޚެއް އަދި އިޢުލާން ނުކުރި ނަމަވެސް، މި އަހަރުގެ ފަހު ކުއާޓަރުގެ ތެރޭގައި މި ފޯނު ބާޒާރަށް ނެރޭނެ ކަމަށް ބެލެވެއެވެ.