ކުރީގެ ރައީސް އަބްދުﷲ ޔާމީން އަބްދުލްގައްޔޫމާއި، ކުރީގެ ރައީސް މުހައްމަދު ނަޝީދާއި، ކުރީގެ ރައީސް އިބްރާހީމް މުހައްމަދު ސޯލިހުގެ ސިޓީފުޅެއް، ރާއްޖޭގެ ތަރައްގީގެ މުހިންމު ބައިވެރިންނަށާއި ޑިޕްލޮމެޓިކް މިޝަންތަކަށް މިރޭ ފޮނުވައިފިއެވެ.
ތިން ރައީސުންގެ ގުޅިފައިވާ އެއްބަސްވުމާ ގުޅޭ އެ ސިޓީފުޅުގައި ވަނީ މި މަހުގެ 10 ވަނަ ދުވަހު ދިވެހިރާއްޖޭގެ ކޯޓަކުން 'ގެގް އޯޑަރެއް' ނެރެފައިވާއިރު މިއީ ރާއްޖޭގެ ޑިމޮކްރެޓިކް ތާރީޚުގައި މިހާ ފުޅާ ދާއިރާއެއްގައި ކަންކަން މަނާކުރި ފުރަތަމަ ފަހަރުކަން ފާހަގަކުރައްވައިފައެވެ.
އޭގެ ދެ ދުވަސް ފަހުން، 'އަދަދު' ގެ ދެ ނޫސްވެރިން ކަމަށްވާ މުޙައްމަދު ޝަހުޒާނާއި، ލީވާން އަލީ ނަސީރު، އެ އަމުރާ ޚިލާފުވި ކަމަށް ބުނެ، ޖަލަށްލުމަށް ހުކުމްކޮށްފައިވާކަން ވެސް އެ ސިޓީފުޅުގައި ވަނީ ފާހަގަކުރައްވައިފައެވެ. މިއީ 2008 ގެ ޑިމޮކްރެޓިކް ގާނޫނުއަސާސީ އަށް އަމަލުކުރަން ފެށި ފަހުން ރާއްޖޭގައި ނޫސްވެރިން ޖަލަށްލީ ފުރަތަމަ ފަހަރުކަމަށް އެ ސިޓީފުޅުގައި ބަޔާންކުރައްވާފައިވެއެވެ.
މި ދުވަސްތަކުގެ ތެރޭގައި، ނޫސްވެރިން ދޫކޮށްލުމަށް ގޮވާލައި މާލޭގެ މަގުމައްޗަށް ނުކުތް މުޒާހަރާގެ ބައިވެރިން ވެސް ހައްޔަރުކުރި ކަމަށާއި، ރާއްޖޭގެ ޑިމޮކްރެޓިކް ދަތުރުގައި ބައިވެރިވެވަޑައިގެންފައިވާ ބައިވެރިންގެ ހައިސިއްޔަތުން، އެއީ ނުހަނު ބޮޑު ކަންބޮޑުވުމެއް ކަމަށް އެ ސިޓީފުޅުގައި ބަޔާންކުރައްވާފައިވެއެވެ.
މިނިވަން ނޫސްވެރިކަމަކީ އަޅުގަނޑުމެން އެކުގައި ބިނާކުރި ޑިމޮކްރަސީގެ އެންމެ ސާފު އެއް ނިޝާން. ނޫސްވެރިކަމަށް ހުރަސްއެޅުމަކީ ގައުމު ފަހަތަށް ޖެހޭ ކަމެއް. އޭގެ ތެރޭގައި ރައްޔިތުންގެ މަޖިލީހުގެ ބާރު ކަނޑުވާލުމާއި، މިނިވަން މުއައްސަސާތައް ބަލިކަށިކުރުމާއި، އަދި ސަރުކާރަށް ތާއީދުކުރާ ކޮމިޝަނަކަށް މީޑިއާތައް ހުއްޓުވުމުގެ ބާރުދޭ 'މީޑިއާ އެކްޓް' ފާސްކުރުން ހިމެނޭ، ތިން ރައީސުންގެ ސިޓީފުޅު
ހަމައެއާއެކު ނިމިދިޔަ ކައުންސިލް އިންތިޚާބުން ލިބުނު ނާކާމިޔާބީއާއި، ގާނޫނުއަސާސީއަށް ބަދަލު ގެނައުމަށް ބޭއްވި ރިފަރެންޑަމްގައި 69 އިންސައްތަ ރައްޔިތުން ދެކޮޅު ހެދުމުން، އެކަމާ މެދު ވިސްނުމުގެ ބަދަލުގައި، ސަރުކާރުން މިހާރު މަސައްކަތްކުރަނީ ސަރުކާރު ޖަވާބުދާރީކުރުވާ މުއައްސަސާތަކަށް ދޭ ހަމަލާތައް ވަރުގަދަކުރުމަށް ކަމަށް އެ ސިޓީފުޅުގައި ފާހަގަކުރައްވާފައިވެއެވެ.
އަދި ރާއްޖޭގެ އިގްތިސާދު އޮތީ ވަރަށް ނާޒުކު ހާލަތެއްގައި ކަމަށާއި، ރިޒާވް ހުސްވެ، ދަރަނި ނުއުފުލޭ މިންވަރަށް ބޮޑުވެފައިވާއިރު، ބޭރުގެ ބައިވެރިންނަށާއި ދަރަނި ދިން ފަރާތްތަކަށް ދައްކަންޖެހޭ ފައިސާ ދެއްކުމުގައި އޮތް ފުރުސަތު ވަނީ ވަރަށް ކުޑަވެފައި ކަމަށް އެ ސިޓީފުޅުގައި ވަނީ ވިދާޅުވެފައެވެ.
މިފަދަ އިސްރާފު ބޮޑު އަދި ގާބިލުކަން ކުޑަ ސަރުކާރެއްގެ އަތްމަތީގައި ގައުމު އޮތުމާއި، ޑިމޮކްރަސީ ބަލިކަށިވުމަކީ އެންމެ ބޮޑު ކަންބޮޑުވުން ކަމަށް އެ ސިޓީފުޅުގައި ވަނީ ފަހަގަކުރައްވައިފައެވެ.
އަޅުގަނޑުމެންގެ ވެރިކަންތަކުގެ ސިޔާސީ ތަފާތުތަކުން އެއްކިބާވެ، އަޅުގަނޑުމެންގެ ރައްޔިތުން ބިނާކުރި ޑިމޮކްރަސީގެ ދިފާއުގައި އަޅުގަނޑުމެން މިވަނީ އެކަތިގަނޑަކަށް ވެފައި، ތިން ރައީސުންގެ ސިޓީފުޅު
އެ ސިޓީ ނިންމަވައިލައްވަމުން ތިން ރައީސުން ވިދާޅުވެފައި ވަނީ ރާއްޖޭގެ ޑިމޮކްރެޓިކް މުސްތަގުބަލަށްޓަކައި މަސައްކަތްކުރާ ބައިވެރިންގެ ހައިސިއްޔަތުން، ސަރުކާރަށް ބާރުފޯރުވައި، ނަހަމަ ގޮތުގައި ބަންދުކޮށްފައިވާ ހުރިހާ ނޫސްވެރިންނާއި، މުޒާހަރާތަކާ ގުޅިގެން ހައްޔަރުކުރި އެންމެން ވަގުތުން ދޫކޮށްލުމަށާއި، އެމީހުންގެ މައްޗަށް ކުރާ ނާހަމަ ދައުވާތައް ހުއްޓާލުމަށް ބާރުއެޅުއްވުމަށް އިލްތިމާސްކުރައްވާ ކަމަށެވެ.