2026 ވަނަ އަހަރުގެ ފީފާ ވޯލްޑް ކަޕަށް ތައްޔާރުވުމުގެ ގޮތުން ބްރެޒިލްގެ ގައުމީ ޓީމުން އެކުލަވާލި 55 ކުޅުންތެރިންގެ ވަގުތީ ސްކޮޑުގައި، އެ ގައުމުގެ އެންމެ ނުފޫޒުގަދަ އެއް ކުޅުންތެރިޔާ ކަމަށްވާ ނޭމާ ޖޫނިއާ ހިމަނައިފިއެވެ.
ބްރެޒިލްގެ ކޯޗު ކާލޯ އަންޗެލޮޓީ މި ލިސްޓު އިއުލާންކޮށްފައިވަނީ، ނޭމާގެ ފިޓްނަސްއާ މެދު ސުވާލު އުފެދިފައިވާ ދަނޑިވަޅެއްގައެވެ.
2023 ވަނަ އަހަރު އުރުގުއާއީއާ ދެކޮޅަށް ކުޅުނު މެޗުގައި ކަކުލަށް ލިބުނު ސީރިއަސް އަނިޔާއަކަށްފަހު، ގާތްގަނޑަކަށް ތިން އަހަރު ދުވަހު ގައުމީ ޓީމާ ދުރުގައި ހުރުމަށްފަހު، މިއީ އޭނާ އަލުން ޓީމާ ގުޅޭ ފުރަތަމަ ފަހަރެވެ.
ނޭމާ މި ލިސްޓުގައި ހިމެނުމަކީ ގިނަ ބަޔަކަށް ލިބުނު ސިހުމެކެވެ. ސަބަބަކީ ކޯޗު އަންޗެލޮޓީ މީގެ ކުރިން ބުނެފައިވަނީ ވޯލްޑް ކަޕަށް ނަގާނީ ސައްތައިން ސައްތަ ފިޓް ކުޅުންތެރިން ކަމަށް ވާތީއެވެ.
މިދިޔަ މާރިޗު މަހު ފްރާންސް އަދި ކްރޮއޭޝިއާއާ ދެކޮޅަށް ކުޅުނު އެކުވެރިކަމުގެ މެޗުތަކަށް ނޭމާ ނުނެގުމުން، އޭނާގެ ބައިނަލްއަގުވާމީ ކެރިއަރު ނިމުނީ ކަމަށް ގިނަ ބަޔަކު ގަބޫލުކުރިއެވެ.
ނަމަވެސް އޭގެ ފަހުން ނޭމާ ވަނީ ވަރަށް ބުރަ މަސައްކަތުން ފިޓްނަސް ރަނގަޅުކޮށް، އޭނާގެ ކުރީގެ ކްލަބު ކަމަށްވާ ސަންޓޯސްއާ ގުޅި، ކުޅުނު 13 މެޗުގައި 9 ލަނޑު ޖެހުމުގައި ބައިވެރިވެފައެވެ.
ބްރެޒިލްގެ ވަގުތީ ސްކޮޑުގައި ހިމެނުނު ނަމަވެސް، ވޯލްޑް ކަޕަށް ދާ ފައިނަލް 26 ކުޅުންތެރިންގެ ސްކޮޑުން ޖާގަ ހޯދުމަށް ނޭމާއަށް އަދި ބޮޑު ގޮންޖެހުމެއް އެބައޮތެވެ.
އަންޗެލޮޓީ މިހާރު ކުރަންޖެހޭނެ އެންމެ އުނދަގޫ މަސައްކަތަކީ މި 55 ކުޅުންތެރިންގެ ތެރެއިން އެންމެ މޮޅު 26 ކުޅުންތެރިން ހޮވުމެވެ.
ނޭމާއަށް އޮތް ފުރުސަތަކީ އޭނާއަކީ އަދިވެސް ބްރެޒިލް ޓީމަށް ކާމިޔާބީ ހޯދައިދެވޭނެ ފެންވަރު ހުރި ކުޅުންތެރިއެއްކަން ކޯޗަށް ސާބިތުކޮށްދިނުމެވެ.
ބްރެޒިލްގެ އުންމީދަކީ މިފަހަރުގެ މުބާރާތް ކާމިޔާބުކޮށް، ހަވަނަ ފަހަރަށް ވޯލްޑް ކަޕްގެ ތަށި އުފުލާލުމެވެ.