2026 ވަނަ އަހަރު ބާއްވާ ފީފާ ވޯލްޑް ކަޕްގެ ބްރޯޑްކާސްޓިން ރައިޓްސް ނުވަތަ މެޗުތައް ދެއްކުމުގެ ހުއްދަ ހޯދުމުގެ މުހިންމު މަޝްވަރާތަކެއް، ތައިލެންޑްގެ ކެބިނެޓުން މިއަދު ބާއްވަން ނިންމައިފިއެވެ.
ތައިލެންޑް ސަރުކާރުގެ މަސްދަރުތަކުން ހާމަކޮށްފައިވާ ގޮތުގައި، މި މަޝްވަރާތަކަކީ އެމެރިކާ، ކެނެޑާ އަދި މެކްސިކޯގައި އަންނަ މަހުގެ 11 އިން ޖުލައި 19 އަށް ބާއްވާ މި މުބާރާތުގެ މެޗުތައް ތައިލޭންޑްގެ ރައްޔިތުންނަށް ހިލޭ ބަލާލުމުގެ ފުރުސަތު ހޯދައިދިނުމަށް ކުރާ މަސައްކަތެކެވެ.
މުބާރާތް ފެށެން ކުޑަދުވަސްކޮޅަކަށް ވެފައިވާތީ، މިކަމަކީ ކެބިނެޓުގެ އެންމެ އިސް އެޖެންޑާގެ ގޮތުގައި ވަނީ ހިމަނާފައެވެ.
ތައިލެންޑްގެ ބޮޑުވަޒީރު އަދި ދާޚިލީ ވަޒީރު އަނޫޓިން ޗާންވީރާކުލް ވިދާޅުވީ، ސަރުކާރުގެ އަމާޒަކީ ދުނިޔޭގެ ފެންވަރުގެ މި ފުޓްބޯޅަ މުބާރާތް ރައްޔިތުންނަށް އެއްވެސް އަގަކާ ނުލައި ބަލާލެވޭނެ އިންތިޒާމު ހަމަޖެއްސުން ކަމަށެވެ.
އަދި ސަރުކާރުން ބްރޯޑްކާސްޓިން ރައިޓްސް ސީދާ ގަނެވޭ ގޮތް ނުވި ނަމަވެސް، އަމިއްލަ ކުންފުނިތަކާ ގުޅިގެން އެކަން ހައްލުކުރުމަށް މަސައްކަތް ކުރަމުންދާ ކަމަށް އޭނާ ވިދާޅުވިއެވެ.
މި މަޝްވަރާތަކުގެ ސަބަބުން ޒުވާނުން ކުޅިވަރަށް ޝައުގުވެރިވެ، މުޅި ގައުމަށް އުފާވެރިކަން ލިބޭނެ ކަމަށް ސަރުކާރުން ގަބޫލުކުރެއެވެ.
މިދިޔަ ހަފުތާގައި ބޮޑުވަޒީރު ވަނީ ތައިލޭންޑްގެ ނޭޝަނަލް ބްރޯޑްކާސްޓިން އެންޑް ޓެލެކޮމިއުނިކޭޝަންސް ކޮމިޝަން (އެންބީޓީސީ) ގެ ޗެއާމަނާ ބައްދަލުކުރައްވައި، މެޗުތައް ދެއްކޭނެ ގޮތްތަކާ ބެހޭގޮތުން ވާހަކަދައްކަވާފައެވެ.
މިއަދުގެ ކެބިނެޓް ބައްދަލުވުމަށްފަހު، މިކަމަށް ހިނގާނެ ބަޖެޓާއި، މެޗުތައް ބްރޯޑްކާސްޓް ކުރާނެ ގޮތުގެ ތަފްސީލީ މައުލޫމާތުތައް ރަސްމީކޮށް އިއުލާން ކުރާނެ ކަމަށް ބެލެވެއެވެ.
ތައިލޭންޑަކީ އަބަދުވެސް ވޯލްޑް ކަޕް މެޗުތައް ރައްޔިތުންނަށް ހިލޭ ދެއްކުމަށް ބޮޑު އިސްކަމެއް ދޭ ގައުމެކެވެ.