އީރާނުން އަވަށްޓެރި ގައުމުތަކަށް ދިން ހަމަލާތަކަށް މާފަށް އެދި، އެ ގައުމުތައް މެދުވެރިކޮށް އީރާނަށް ހަމަލާ ނުދޭހާ ހިނދަކު ރައްދު ހަމަލާ ނުދޭން ނިންމައިފިއެވެ.
އީރާނުން އެގޮތަށް ނިންމާފައި ވަނީ އެ ގައުމަށް އެމެރިކާއާއި އިސްރާއީލުން ހަމަލާ ދޭން ފެށުމުން، އެ ގައުމުން ވެސް ރައްދުގައި ހަމަލާ ދޭން ފެށިތާ ހަފުތާއެއް ފަހުންނެވެ.
އެމެރިކާއާއި އިސްރާއީލުން ގުޅިގެން އީރާނަށް ދިން ހަމަލާތަކުގެ ރައްދުގައި އީރާނުން ވަނީ މެދުއިރުމަތީގެ ގައުމުތަކުގައިހުރި އެެމެރިކާގެ އަސްކަރީ ތަންތަނަށާއި އާންމުން ސަރަަހައްދުތަކަށާއި ހަކަތަ އުފައްދާ ކާރުޚާނާތަކަށާއި އެއާޕޯޓުތަކަށްވެސް ވަރުގަދަ ހަމަލާތަކެއް ދީފައެވެ.
އަވަށްޓެރި ގައުމުތަކަށް ހަމަލާ ނުދޭން ނިންމި ނަމަވެސް އިސްރާއީލަށާއި އެމެރިކާއަށް ހަމަލާ ދިނުން ހުއްޓާނުލާނެ ކަމަށް އީރާނުގެ ރައީސް މަސްއޫދު ޕެޒެޝްކިއަން ވަނީ ވިދާޅުވެފައެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާނުން އެއްވެސް ޝަރުތަކާ ނުލައި އަމާން ދިނުމަށް ވިދާޅުވެފައެވެ.
ނަމަވެސް ޕެޒެޝްކިއަން ވަނީ، އެއީ އެމެރިކާއިން ދެކޭ ހުވަފެނެއް ކަމަށް ސިފަކުރައްވައި، އެ ''ހުވަފެނައިގެން ދާން ޖެހޭނީ ކަށްވަޅަށް'' ކަމަށް ވިދާޅުވެފައެވެ.
މިދިޔަ ހޮނިހިރު ދުވަހު އިސްރާއީލުން އިސްވެ އީރާނަށް ދޭން ފެށި ހަމަލާތަކުގައި އީރާނުގެ އެންމެ މަތީ ލީޑަރު އާޔަތުﷲ އަލީ ޚާމަނާއީ ވަނީ އަވަހާރަކޮށްލައިފައެވެ. އީރާނުގެ އިތުރު އިސް އޮފިޝަލުންވެސް ހަމަލާތަކުގައި އަވަހާރަވެފައިވާއިރު، އީރާނުގެ މަރުވި މީހުންގެ އަދަދު ހާހަަކަށްވުރެ އިތުރެވެ.
އީރާނުން މެދުއިރުމަތީގެ ގައުމުތަކަށް ދޭން ފެށި ހަމަލާތަކާ ގުޅިގެން އެ ސަރަހައްދުގެ ވައިގެ ބަނދަރު ބަންދުކުރުމުން، ބައިނަލްއަގުވާމީ ދަތުރުތަކަށް ބޮޑު ލޮޅުމެއް އައެވެ. އަދި މެދުއިރުމަތިން ތެޔޮ ސަޕްލައި ކުރަން ބޭނުންކުރާ މުހިންމު މަގެއް ކަމަށްވާ ހޮރްމުޒް ކަނޑުއޮޅި ބަންދުކުރުމުން، ދުނިޔޭގެ ސަޕްލައި ޗެއިންއަށް ބުރޫއަރައި، ތެލާއި ގޭހުގެ އަގު ވަނީ އުފުލިފައެވެ.