ބޮޑު ދަރަނި އަދާކުރަންޖެހޭ މި އަހަރުގެ ފުރަތަމަ ދެ މަސް ދުވަހުގެ ތެރޭގައި ދަރަނި އަނބުރާ ދެއްކުމާއި ލޯނުތަކުގެ އިންޓްރެސްޓަށް ދައުލަތުގެ ބަޖެޓުން އެއް ބިލިއަނަށްވުރެ ގިނަ ރުފިޔާ ޚަރަދުކޮށްފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން އެނގިއްޖެއެވެ.
މި އަހަރު ބޭރުގެ ދަރަންޏަށް ބިލިއަނަކަށް ވުރެ ގިނަ ޑޮލަރު ދައްކަން ޖެހެއެވެ. އޭގެ ތެރޭގައި އެއް ފަހަރާ ދައްކަންޖެހޭ 600 މިލިއަން ޑޮލަރުގެ ދަރަންޏެއް ހިމެނެއެވެ.
ފިނޭންސް މިނިސްޓްރީން މިދިޔަ މަހުގެ 26 ވަނަ ދުވަހާ ހަމައަށް ހާމަކޮށްފައިވާ ތަފާސްހިސާބުތަކުން އެނގޭ ގޮތުގައި މި އަހަރުގެ ފުރަތަމަ ދެ މަސް ދުވަހުގެ ތެރޭގައި ލޯންތައް އަނބުރާ ދައްކަން ދައުލަތުގެ ބަޖެޓުން 636.1 މިލިއަން ރުފިޔާ ވަނީ ޚަރަދުކޮށްފައެވެ. މި އަހަރު ޖުމުލަ ލޯންތައް އަނބުރާ ދައްކަން ބަޖެޓުން 12.9 ބިލިއަން ރުފިޔާ ހޭދަކުރަން ބަޖެޓުގައި ހިމަނާފައިވެއެވެ.
މި އަހަރުގެ ބަޖެޓު ފޮތް: މި އަހަރުގެ ބަޖެޓުގެ 62 އިންސައްތައަކީ ހިންގުމުގެ ޚަރަދު -- ފޮޓޯ/ މަޖިލިސް
އަދި، ލޯންތަކުގެ އިންޓްރެސްޓާއި ފައިނޭންސިން ޚަރަދުގެ ގޮތުގައި މިހާތަނަށް 412.2 މިލިއަން ރުފިޔާ ވަނީ ހޭދަކޮށްފައެވެ. އެ ކަމަށް ވެސް މި އަހަރު ބަޖެޓުން 5.5 ބިލިއަން ރުފިޔާ ހޭދަކުރަން ވަނީ ހިމަނާފައެވެ.
އެހެންވެ، މި އަހަރުގެ ބަޖެޓުން ބޮޑު ބައެއް ދަރަންޏަށް ހޭދަކުރަން ޖެހެއެވެ.
މި އަހަރު ސަރުކާރުން ޖުމުލަ 1.1 ބިލިއަނަށްވުރެ ބޮޑު އަދަދެއް ދަރަނި ދައްކަން ޚަރަދުކުރަން ޖެހޭއިރު، އެ ދަރަންޏާ ގުޅޭ ގޮތުން ބައިނަލްއަގުވާމީ މާލީ އިދާރާތަކުން ކަންބޮޑުވުން ފާޅުކުރަމުން އަންނަތާ ކިތަންމެ ދުވަހެކެވެ. އެ ދަރަނި ނުދެއްކިދާނެކަމުގެ ކަންބޮޑުވުން އެ ފަރާތްތަކުން ފާޅުކޮށްފައިވެއެވެ.
މި އަހަރަށް ސަރުކާރުން 64 ބިލިއަން ރުފިޔާގެ ރިކޯޑު ބަޖެޓެއް ހުށަހެޅީ ވެސް އެހެންވެ ކަމަށް ފިނޭންސް މިނިސްޓްރީން މީގެ ކުރިން ބުނެފައިވެއެވެ.
ދަރަނި ދެއްކުމާ ގުޅޭ ގޮތުން ނޫސްވެރިއަކު ކުރި ސުވާލަށް ޖަވާބުދެއްވަމުން ހޯމަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ރައީސް ޑރ. މުހައްމަދު މުއިއްޒު ވިދާޅުވީ، އޭޕްރީލް މަހު އެއް ފަހަރާ ދައްކަންޖެހޭ ބޮޑު ދަރަނި ދެއްކޭނެކަމުގެ ޔަގީންކަން އެބައޮތް ކަމަށެވެ. އެ ގޮތުން، އެ ދަރަނި އަދާކުރަން ފައިސާ ރައްކާކޮށްފައިވާނެ ކަމަށާއި މިހާރު ވެސް އެ ދަރަނި އަދާކުރުމުގެ ގާބިލުކަން ސަރުކާރުގައި އެބަހުރި ކަމަށް އެ މަނިކުފާނު ވިދާޅުވިއެވެ.