ރާއްޖޭގެ ދެކުނުގެ އަތޮޅުތައް މިއަދު ވައިގެ މަގުން ގުޅާލުމަކީ, ފަތުރުވެރިން ގައުމުގައި ހޭދަކުރާ މުއްދަތު އިތުރުކުރަން ލިބުނު ފުރުސަތެއް ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެއެވެ.
އައްޑޫ ސިޓީގައި މިއަދު ބޭއްވި ރަސްމިއްޔާތެއްގައި، އެ ސިޓީއާއި ފުވައްމުލަކާއި ގއ. އަތޮޅާއި ގދ. އަތޮޅު ވަނީ ގައުމީ އެއާލައިން މޯލްޑިވިއަންގެ ދަތުރުތަކުން ގުޅާލާފައެވެ. އެ ދަތުރުތައް އަންނަ މަހު ފަށާނެ ކަމަށް އެ އެއާލައިނުން ވަނީ ބުނެފައެވެ.
އެ ރަސްމިއްޔާތުގައި މިނިސްޓަރު އިހުސާން ވިދާޅުވީ، ރައްޔިތުންނަށް ޚިދުމަތެއް ދިނުމުން، އެ ޚިދުމަތުން އެ މީހާގެ ހަޔާތަށް ފަސޭހަކަމެއް ގެނުވާނެ ކަމުގެ އިހުސާސް މިހާރު ތިއްބެވި ވެރިންނަށް ވާ ކަމަށާއި، އެއީ މި ސަރުކާރުގެ ތަފާތުކަން ކަމަށެވެ.
މިނިސްޓަރު ވިދާޅުވީ މިއަދު ފެށި މަޝްރޫއުގެ ސަބަބުން އައްޑޫ އަތޮޅުގައި ހުންނަ އައްޑޫ މީހާއަށް ވެސް ފުވައްމުލަކުގައި ލިބެން އޮންނަ ޚިދުމަތެއް ހޯދުމަށް 20 ވަރަކަށް މިނެޓުން ދެވޭނޭ ކަމަށެވެ. މިއީ މީގެ ކުރީން، ކަނޑު މަޑު ދުވަހެއްގައި ވެސް ފަސް ގަޑިއިރުން ނުވަތަ ދޮޅުގަޑިއިރުން ކުރެވޭ ދަތުރުތައްކަން އިހުސާން ވަނީ ފާހަގަކުރައްވާފައެވެ.
"އަޅުގަނޑުމެންގެ ހަޔާތަށް ތަރައްގީއޭ މިކިޔާ އަސްލު އިހުސާސްގެނެވޭ ނިންމުމެއް މި ނިންމުމަކީ. އެ ވަރުގެ ޚިދުމަތެއް މިއަދު މި ފެށިގެންދަނީ،" އައްޑޫއަށް ނިސްބަތްވެވަޑައިގަންނަވާ އިހުސާނު ވިދާޅުވިއެވެ.
ވައިގެ މަގުން ދެކުނުގެ އަތޮޅުތައް ގުޅާލުން: އެ ދަތުރުތައް އަންނަ މަހު ފަށާނެ -- ފޮޓޯ/ މޯލްޑިވިއަން
މިނިސްޓަރު ވިދާޅުވީ ރާއްޖޭގެ ދެކުނުގެ ޓޫރިޒަމަށް ބަލާއިރު، އަދި ރާއްޖޭގެ ޓޫރިޒަމަށް ބަލާއިރު ވެސް އެންމެ ބޮޑު ގޮންޖެހުމަކަށް ވެފައި އޮންނަނީ، ފަތުރުވެރީން ރާއްޖެ އައިސް މަޑުކުރާ މުއްދަތު އިތުރުނުވުން ކަމަށެވެެ. ގިނަ ފަހަރަށް ރާއްޖޭގައި ފަތުރުވެރީން ހޭދަކުރަނީ ގާތްގަނޑަކަށް ފަސް ދުވަސްކަން އޭނާ ފާހަގަކުރެއްވިއެވެ.
ފަސް ދިމާލެއްގައި އޮންނަ ފަސް ވައްތަރެއްގެ މަހެއް ބަލާފައި އަވީގަ ލެވިގެން މީހުންތައް ދަނީ. އެކަމު ކުރާނެ ބައިވަރު އެކްސްޕީރިއެންސް އެބަހުރި މިތަންތާގައި. އައްޑޫގެ ސަގާފަތް، އައްޑޫގެ ތާރީޚް، އައްޑޫގެ އެންވަޔަރަމެންޓުގައި ހުރި ޔުނީކް ފީޗާސްތައް އެކްސްޕީރިއެންސް ކުރަން ނަގާފާނެ ތިން ދުވަސް ވަރު ވެސް. ފުވައްމުލަކަށް ގޮސް އެ ތަނުގައި އޮތް ޚާއްސަ ޑައިވިން އެކްސްޕީރިއަންސް ކޮށްލަން އަނެއް ދެ ދުވަސް. އަދި ޖެހިގެންއޮތް ހުވަދޫ އަތޮޅުގެ ރަށްތަކުގެ ރީތިކަން ބަލައިލަން ހައެއްކަ ދުވަސް ވެސް ހޭދަކުރެވިދާނެ. ހޯމް މިނިސްޓަރު އަލީ އިހުސާން
އެހެންކަމުން، މިހާރު މި ލިބުނީ، ފަތުރުވެރިންގެ ބެޑް ނައިޓްސް ނުވަތަ ރާއްޖޭގައި ހޭދަ ކުރާ މުއްދަތު އިތުރުކުރަން ފުރުސަތެއް ކަމަށް އިހުސާން ވިދާޅުވިއެވެ. އަދި މިއީ ދެކުނުގައި ގުޅިފައިވާ ޓޫރިޒަމްގެ ނިޒާމެއް އުފެދުން ކަމަށާއި މީގެ ކުރިން މިގޮތަށް އަތޮޅުތައް ގުޅުވާލަން އުނދަގޫވުމުންނާއި އަގުބޮޑުވުމުން އެކަން ކުރަން ބޭނުންނުވެ އޮތީ ކަމަށް އޭނާ ވިދާޅުވިއެވެ.
މިނިސްޓަރު ވިދާޅުވީ މިއީ ދެކުނުގެ ރައްޔިތުންނަށް، އަދުގެ ރައީސް ޑރ. މުޙައްމަދު މުއިއްޒު ހޯއްދަވައިދެއްވި، ރައްޔިތުން އެތައް ދުވަހަކު ބޭނުންވެފައި ތިބި ތަރައްގީއެއް ކަމަށެވެ.
މިދިޔަ އޮކްޓޫބަރު މަހުގެ ކުރީކޮޅު ސަރުކާރަށް އައްޑޫގެ ހަންކެޑެ ނެގުމަށްފަހު އާ މަޝްރޫއެއް ހިންގަން ސަރުކާރުން ހުޅުވާލި ފުރުސަތުގައި ތުރުކީގެ އިންވެސްޓަރަކަށް ފުރުސަތުދީފައެވެ.
ރާއްޖޭގެ ދެކުނަށް ބޭރު ގައުމުތަކުން ސީދާ ދަތުރުތައް މަދުވުމުންނާއި، މާލޭން އެ އަތޮޅުތަކަށް ދަތުރުކުރުމަށް އަގު ބޮޑުވުމުން ދެކުނުގައި ފަތުރުވެރިކަން ފުޅާ ކުރަން އޮތީ ގޮންޖެހުންތައް ކުރިމަތިވެފައެވެ.