ސަރުކާރު ހިންގާ ޕީއެންސީގެ ފުލް މެޖޯރިޓީ އޮތް މާލޭ ސިޓީ ކައުންސިލްގެ މިއަދުގެ ރަސްމީ ބައްދަލުވުން ވެސް ކޯރަމް ހަމަ ނުވެގެން ބޭއްވޭގޮތް ނުވެގެން ނިންމާލައިފިއެވެ.
ކައުންސިލަށް އިންތިޚާބު ކޮށްފައިވާ, ޕީއެންސީގެ މެންބަރުން ހާޒިރު ނުވާތީ ސިޓީ ކައުންސިލްގެ ޖަލްސާތައް ނުބޭއްވުން މި ފަހަކަށް އައިސް ވަނީ ވަރަށް އާއްމު ވެފައެވެ. އެގޮތުން ރައީސް ޑރ. މުޙައްމަދު މުއިއްޒު މާލޭގެ މޭޔަރަކަށް ހުންނެވިއިރު, އެކި ފަރާތްތަކަށް ދޫކޮށްފައިވާ މާލޭގެ ބިންތަކުގެ މައްސަލައާއި މާލޭ މަސް މާރުކޭޓް ދިނުމުގައި ހިޔާނާތް ވެފައިވާ ކަމަށް ތުހުމަތު ކުރެވޭ މައްސަލަ އެޖެންޑާ ކުރި ޖަލްސާތައް ވެސް ކޯރަމް ހަމަ ނުވެގެން ވަނީ ނުބޭއްވިފައެވެ.
އެމްޑީޕީން ތުހުމަތު ކުރާގޮތުގައި ޖަލްސާތަކުގެ ކޯރަމް ޕީއެންސީން ގަސްތުގައި ނަގާލަނީ އެ މައްސަލަތައް ބެލިޔަ ނުދިނުމަށެވެ.
މިއަދަށް ތާވަލު ކުރި ސިޓީ ކައުންސިލްގެ ރަސްމީ ޖަލްސާއަށް އެޖެންޑާ ކޮށްފައި އޮތީ, އެމްޑީޕީގެ ކައުންސިލަރުން ކަމަށްވާ, މަރްޔަމް ނާޒިމާ މުޙައްމަދު ފާއިޒާއި މުޙައްމަދު ސައިފް ފާތިޚް, ހުށަހަޅުއްވާފައިވާ ބޯހިޔާވަހިކަމާ ގުޅޭ މައްސަލައެކެވެ.
އެ މައްސަލާގައި ބުނެފައިވަނީ މި ސަރުކާރުން ހުޅުވާލާފައިވާ ބޯހިޔާވަހިކަމާ ގުޅޭ ސްކީމުގެ ޝަރުތުތައް ކަނޑައެޅިއިރު އެ ކައުންސިލްގެ އެއްވެސް މަޝްވަރާއެއް ހޯދާފައި ނުވާ ކަމަށެވެ. އެ ޝަރުތުތަކުގައި ކަންބޮޑުވުންތަކެއް ހުރިއިރު އެ ކަމަށް ބަދަލު ގެނައުމަށް ސަރުކާރަށް ލަފާ ދިނުމާއި ފެންނަ ގޮތެއް އަންގަން މަޝްވަރާ ކުރަން އެޖެންޑާގައި ހިމަނާފައިވެއެވެ.
މާލޭގެ މޭޔަރު އާދަމް އާޒިމް ރިޔާސަތު ބެލެހެއްޓެވި މިއަދުގެ ޖަލްސާއަށް ހާޒިރުވީ, 19 ކައުންސިލަރުންގެ ތެރެއިން އެންމެ އަށް ކައުންސިލަރުންނެވެ. އެހެންވެ ކޯރަމް ހަމަ ނުވާތީ ޖަލްސާ ބޭއްވޭ ގޮތެއް ނުވިއެވެ.
ރޯދައަށް ފަހު އޭޕްރީމް މަހުގައި އަނެއްކާ ވެސް ކައުންސިލްތަކަށް ކައުންސިލަރުން އިންތިޚާބު ކުރުމުގެ އިންތިޚާބު އޮތްއިރު ސަރުކާރާއި އިދިކޮޅު އެމްޑީޕީން ވެސް އަންނަނީ ފޯރިގަދަ ކެމްޕެއިނެއް ކުރަމުންނެވެ. ސަރުކާރުން ބުނަނީ ތަރައްގީ ގެނެވޭނީ ސަރުކާރަށް ތާއީދު ކުރާ ކެންޑިޑޭޓުން ހޮވައިގެން ކަމަށެވެ. އެމްޑީޕީން ބުނަނީ ސަރުކާރު ޒިންމާދާރު ކުރުވުމަށް އިދިކޮޅު ފަރާތްތަކަށް ފުރުސަތު ދޭން ޖެހޭ ކަމަށެވެ.