އެމްޑީޕީގެ ގައުމީ މަޖިލީހުގެ މެންބަރު، ހުޅުމާލެ އުތުރު ދާއިރާގެ ރައީސް އަދި ކުރިއަށް އޮތް ލޯކަލް ކައުންސިލް އިންތިޚާބުގައި ހުޅުމާލޭ އުތުރު ދާއިރާއަށް އެމްޑީޕީގެ ޓިކެޓްގައި ވާދަކުރާ ފާތިމަތު ޒަހިއްޔާ (ޒާޔާ), ފުލުހަށް ހާޒިރުވާން ޗިޓް ފޮނުވުމަށް ފަހު, އެކަން ފަސްކުރިކަން މިއަދު އަންގައިފިއެވެ.
އިއްޔެ ޒާޔާއަށް ފުލުހުން ފޮނުވި ޗިޓްގައި ބުނެފައިވަނީ އޭނާ ފުލުހަށް ހާޒިރު ކުރަނީ ސޯޝަލް މީޑިއާ މެދުވެރިކޮށް ފުލުހުންނަށް އިންޒާރު ދިން ކަމުގެ ތުހުމަތުގައި ކަމަށެވެ. ހާޒިރު ކުރާ ބޭނުމަކީ އެ މައްސަލައިގެ ތުހުމަތުގައި ސުވާލުކޮށް ބަޔާން ނެގުމަށް ކަމަށް ޗިޓުގައި ވަނީ ބުނެފައެވެ.
ޗިޓުގައި ޒާޔާ ފުލުހުންގެ އިދާރާއަށް ހާޒިރުވުމަށް އަންގާފައި ވަނީ، މިއަދު 14:00އަށެވެ.
ނަމަވެސް ޒާޔާ މިއަދު ސޯޝަލް މީޑިއާގައި ކުރި ޕޯސްޓެއްގައި ބުނެފައި ވަނީ އޭނާ ފުލުހުންގެ އިދާރާއަށް ހާޒިރު ކުރުން ފަސްކޮށްފައިވާކަން ފުލުހުން މިއަދު ގުޅައި އަންގާފައިވާ ކަމަށެވެ. އަދި ހާޒިރު ކުރާނެ ދުވަހެއް ފަހުން އަންގާނެކަން ފުލުހުން ބުނި ކަމަށް ވެސް އޭނާގެ ޕޯސްޓްގައިވެއެވެ.
ސޯޝަލް މީޑިއާގައި ކުރި ޕޯސްޓާ ގުޅޭ މައްސަލައިގައި، ޒާޔާގެ ފޯނު މިދިޔަ އަހަރުގެ އޮކްޓޫބަރު ހަތެއްގައި ފުލުހުން ހިފެހެއްޓިއެވެ. އެއަށްފަހު ފޯނު ދޫކޮށްލީ އެ މަހު 12ގައެވެ.
އޭރު ފޯނު ހިފަހައްޓާފައި ވަނިކޮށް، ސޯޝަލް މީޑިއާގައި ޒާޔާގެ ޒާތީ ވީޑިއޯތަކެއް ލީކުވި މައްސަލައެއް ވެސް ފެންމަތިވިއެވެ. އެ މައްސަލަ ކަމާ ބެހޭ އިދާރާތަކަށް ވަނީ ހުށަހަޅާފައެވެ.
މީގެ އިތުރުން، އޮކްޓޫބަރު މަހުގެ ތިންވަނަ ދުވަހު، އިދިކޮޅު އެމްޑީޕީން ބޭއްވި "ލޫޓުވައިފި" މުޒާހަރާއާ ގުޅުވައި ވެސް ޒާޔާ ފުލުހަށް ހާޒިރުކުރިއެވެ. އޭރު ހާޒިރުކުރީ، ގާނޫނާ ޚިލާފަށް މާލޭގެ އެކި ސަރަހައްދުގެ މަގުތަކަށް އެއްވެ އަޑުގަދަކޮށް މުޒާހަރާކޮށް، އާންމު ދަތުރުފަތުރަށް ހުރަސް އެޅުމާއި، ވިޔަފާރިތަކަށް ދަތިވާނެހެން ހަރަކާތްތެރިވެ، ފުލުހުންގެ ދައުރުހުރަސް އެޅުމުގެ ތުހުމަތުގައެވެ. އަދި، ފުލުހުންގެ އަމުރަށް ނުކިޔަމަންތެރިވެ ވާޖިބަށް ހުރަސް އެޅިކަމަށް ވެސް އޭރު ތުހުމަތު ކުރިއެވެ.