ބޮލީވުޑްގައި މިވަގުތު މަސައްކަތްކުރާ ބަތަލާއިންގެ ތެރެއިން ޤުދުރަތީ ރީތިކަން ލިބިފައިވާ ހަމައެކަނި ބަތަލާ އަކީ އައިޝްވާރިޔާ ރާއީ ކަމަށް މަގުބޫލު ފިލްމު ޑައިރެކްޓަރު އަދި ކޮރިއަގްރާފަރު ފަރާ ޚާން ބުނެފިއެވެ.
ފަރާ ޔޫޓިއުބްގައި ގެނެސްދެމުން އަންނަ ކައްކާ ޝޯގެ އެޕިސޯޑެއްގައި އެ ޝޯގެ ހޯސްޓް ދިލިޕްއާ އެކު ކުރިއަށްދިޔަ މުއާމަލާތެއްގައި ބުނީ ހަގީގީ ގުދުރަތީ ރީތިކަން ލިބިފައިވާ ބަތަލާއިން ބޮލީވުޑްއިން ފެނުމަކީ ނާދިރު ކަމެއް ކަމަށާއި ފަރާ ގަބޫލުކުރާ ގޮތުގައި އެފަދަ ރީތިކަމެއް ހަމައެކަނި ލިބިފައިވަނީ ބަތަލާ އައިޝްވާރްޔާ ރާއީ ބައްޗަންއަށް ކަމަށެވެ.
މި މައުޟޫއަށް ވާހަކަ ދެކެވުނީ ފަރާ އެންޑޯސްކުރަމުން އަންނަ ސްކިންކެއާ އުފެއްދުމަކާ ގުޅިގެން ދިލިޕްއާ އެކު ކުރިއަށްދިޔަ މުއާމަލާތަކާ ގުޅިގެންނެވެ.
އައިޝްވާރްޔާ ރާއީ މިސް ވީލްޑްގެ ތާޖާ އެކު--ފޮޓޯ/އެންޑީޓީވީ
ފަރާގެ ގޭގައި ކައްކާއެއްގެ ގޮތުގައި މަސައްކަތް ކުރަމުން އަންނަ ދިލިޕްއާ އެކު އޭނާ ހޯސްޓްކުރާ ޔޫޓިއުބް ޝޯގައި މިފަދަ ވަރަށް ގިނަ މައުޟޫއުތަކަށް ވާހަކަ ދެކެވެއެވެ.
ދެ މީހުންގެ މެދުގައި ދެކެވޭ އެފަދަ ގިނަ ވާހަކަތަކަކީ އެއްވެސް ސެންސަރެއް ނެތި ހަގީގަތާ އެއްގޮތަށް ގެނެސްދޭ ވާހަކަތަކެކެވެ. ފަރާގެ ޝޯ އާއްމުންނަށް ކަމުދާ އެންމެ ބޮޑު އެއް ސަބަބަކީ ވެސް އެއީއެވެ.
ބޮލީވުޑްގައި ވަރަށް ރީތި ބަތަލާއިން ތިއްބާވެސް އައިޝްވާރްޔާގެ ނަން ފަރާ ހާމަ ކުރުމުން ގިނަ ބަޔަކަށް ވަނީ ހައިރާންކަމެއް ލިބިފައެވެ. ގިނަ ބަޔަކު އުއްމީދުކުރީ ރީތި ބަތަލާއިންގެތެރޭ ކެޓްރީނާ ކައިފް، ދީޕިކާ ޕަދުކޯން، އާލިއާ ބަޓް އަދި ޕްރިޔަންކާ ޗޯޕްރާ ފަދަ ތަރިންގެ ނަން ފަރާ ހިމަނާނެ ކަމަށެވެ.
ފަރާ ޚާން އަދި އައިޝްވާރްޔާ ރާއީ--ފޮޓޯ/މިޑް-ޑޭ
ބޮލީވުޑްގައި ކާމިޔާބު ފިލްމީ ކެރިއަރެއް ބިނާކޮށްފައިވާ އައިޝްވާރްޔާ ރާއީ އަކީ 1994 ވަނަ އަހަރު އިންޑިއާއަށް މިސް ވޯލްޑްގެ ތާޖު ކާމިޔާބުކޮށްދިން ބަތަލާއެވެ.
އޭގެފަހުން އައިޝްވާރްޔާ ވެފައި ވަނީ މުޅި ދުނިޔޭގައި ވެސް ހިމެނޭ އެންމެ ރީތިއަންހެނުންގެ ލިސްޓުގެ ކުރިން ޖާގަ ހޯދާފައިވާ މަގުބޫލު އަންހެނަކަށެވެ. އައިޝްވާރްޔާގެ ގުދުރަތީ ރީތިކަން ފެނި ދުނިޔޭގެ އެތައް ބަޔަކަށް ހައިރާންކަން ލިބޭ ވާހަކަ އަކީ ދޭތެރެދޭތެރެއިން ނޫސްތަކުން ވެސް ފެންނަ ޚަބަރެކެވެ.
ފިލްމު "ހަމް ދިލް ދޭ ޗުކޭ ސަނަމް"، "ދޭވްދާސް"، "ތާލް" އަދި "ޖޯދާ އަކްބަރު" ފަދަ ފިލްމުތައް ބެލުންތެރިންނަށް ގެނެސްދިން ބަތަލާ އެންމެފަހުން ކުޅުނު ފިލްމަކީ 2023ވަނަ އަހަރު ރިލީޒްކުރި ފިލްމު "ޕޮނީޔިން ސެލްވަން 2"އެވެ.