މަންމައާއި ބައްޕައަށް އަނިޔާކޮށް، ދައްތަގެ ކަރުގައި ހިފައި ދައްތައަށް އަނިޔާކުރި ދިވެހި ފިރިހެނަކު ޖަލަށްލާން ހުކުމްކޮށްފިއެވެ.
މިއީ އުތުރުގެ ރަށެއްގައި އާއިލީ ހަމަ ނުޖެހުންތަކެއްގެ ތެރެއިން އުފަންވެގެން އައި މައްސަލަތަކެކެވެ. މި މައްސަލައިގައި ދައުލަތުންވަނީ ދިވެހި ފިރިހެނެއްގެ މައްޗަށް ތިން ދައުވާއެއް އުފުލައިފައެވެ. އެއީ, އަނިޔާއެއް ދިނުމުގެ ދެ ދައުވާއާއި، ރައްކާތެރިކުރުމުގެ އަމުރާ ހިލާފުވުމުގެ ދައުވާއެވެ.
އަނިޔާއެއް ދިނުމުގެ ދެ ދައުވާ އުފުލާފައިވަނީ ބައްޕައާއި ދައްތައަށް އަނިޔާކުރި މައްސަލައާއި ގުޅިގެންނެވެ. ރައްކާތެރިކުރުމުގެ އަމުރާ ހިލާފުވުމުގެ ދައުވާކުރީ، މަންމައަށް ގެވެށި އަނިޔާ ކުރާތީ އެކަން ހުއްޓުވުމަށް ކުރިން ނެރެފައިވައިވާ އަމުރާ ހިލާފުވެފައިވާތީއެވެ.
މި މައްސަލަތައް ނިމުނު ގޮތުގެ ރިޕޯޓުން އެނގޭ ގޮތުގައި ގެވެށި އަނިޔާއިން ރައްކާތެރިކުރުމުގެ އަމުރު ނެރެފައިވަނީ މިދިޔަ ސެޕްޓެންބަރު މަހުގެ ތެރޭގައެވެ. އެ އަމުރާ ހިލާފަށް، މި މައްސަލައިގައި ދައުވާ ލިބޭ މީހާވަނީ އޭނާގެ މަންމައާއި ބައްޕަ އަދި ދައްތައާ ދިމާލަށް ހަޅޭއްލަވައި އަޑުގަދަކޮށް ހަދައިފައެވެ.
މި މައްސަލަތަކުގައި އެ ފިރިހެން މީހާގެ މައްޗަށް ކުރި ދައުވާތަކަށް އޭނާ ކޯޓުގައި އިއުތިރާފުވެފައިވާތީ މައްސަލަ ކުރިއަށް ގެންގޮސްފައިވަނީ އަވަސް ނިޔާގެ މައްސަލަތަކެއްގެ ގޮތުގައެއެވެ.
ރައްކާތެރިކުރުމުގެ އަމުރާ ހިލާފުވުމުގެ ދައުވާ ސާބިތުވެ، އެ ފިރިހެން މީހާގެ މައްޗަށް އިއްވާފައިވަނީ ތިން މަސް ދުވަހުގެ ޖަލު ހުކުމެކެވެ. އެކަމަކު، ކޯޓުން ވަނީ އެ ހުކުމް 29 ދުވަހަށް ލުއިކޮށްދީފައެވެ.
އަނިޔާއެއް ދިނުމުގެ ދެ ދައުވާގެ ތެރެއިން ބައްޕައަށް އަނިޔާކުރި މައްސަލައިގައި އިއްވާފައިވަނީ އެއް މަހާއި ހަ ދުވަހުގެ ޖަލު ހުކުމެވެ. އަދި، ދައްތައަށް އަނިޔާކުރި މައްސަލައިގައި އިއްވާފައިވަނީ ދެ މަހާއި 12 ދުވަހުގެ ޖަލު ހުކުމެކެވެ.