ބިހުރޯޒު މިސްކިތް ތަޅާލައި އެތަނުގައި 12 ބުރީގެ އިމާރާތެއް އަޅަން އެއްވެސް އިރަކު ސަރުކާރުން ނިންމާފައި ނުވާ ކަމަށް އިސްލާމިކް މިނިސްޓަރު ޑރ. އަހުމަދު ޒިޔާދު ބާގިރު ވިދާޅުވެއްޖެ އެވެ.
ބިހުރޯޒު މިސްކިތް ތަޅާލަން ނިންމާފައި ނުވާ ކަމަށް މިނިސްޓަރު ވިދާޅުވި ނަމަވެސް، މާލޭގައި ހުންނަ ބިހުރޯޒު މިސްކިތާއި މަސްޖިފުލް އިމާމް އާދިލް ތަޅާލައި އެ ދެ މިސްކިތް ހުރި ބިމުގައި 12 ބުރީގެ މަލްޓިޕާޕަސް އިމާރާތެއް އަޅަން އަންނަ އަހަރަށް ފާސްކުރި ބަޖެޓުގައި ވަނީ ހިމަނާފަ އެވެ.
އަންނަ އަހަރަށް ފާސްކުރި 27.9 ބިލިއަން ރުފިޔާގެ ބަޖެޓުގައި ބުނެފައިވާ ގޮތުން، ބިހުރޯޒު މިސްކިތްތައް ތަޅާލައި އަޅާ އިމާރާތަށް ފަސް މިލިއަން ރުފިޔާ ހަރަދު ކުރާނެ އެވެ. އެ ރުފިޔާ ހަރަދު ކުރާނީ އިސްލާމިކް ޑިވެލޮޕްމަންޓް ބޭންކު (އައިޑީބީ)ގެ ހިލޭ އެހީގެ ދަށުން ނެވެ.
ނަމަވެސް ދެ މިސްކިތް ތަޅާލުމަށްފަހު ހަދާ އިމާރާތުގައި މިސްކިތް ހިމެނޭ ކަމެއް ބަޖެޓުގައި ބުނެފައެއް ނުވެއެވެ.
ބިހުރޯޒު މިސްކިތާ ގުޅޭ ގޮތުން ޗެނަލް13ގެ ޕްރޮގްރާމެއްގައި ބައިވެރިވެ މައުލޫމާތު ދެއްވަމުން މިނިސްޓަރު ވިދާޅުވީ، އެ މިސްކިތް ވަށައި ފެންސު ޖަހައި ބަންދު ކޮށްފައިވަނީ އެތަނުން ގަބުރުތައް ފެންނާތީވެ، ގަބުރުތައް ނަގައި ސާފު ކުރުމަށް ކަމަށެވެ. އަދި އެމްޓީސީސީ އާއެކު ކުރާ އެ މަސައްކަތުގައި ދެން ކުރާނީ މިސްކިތުގެ ބޭރު ހިޔާ ކުރުމުގެ މަސައްކަތް ކަމަށް ވިދާޅުވި އެވެ.
"މިއީކީ މިސްކިތް ތަޅާލައި، މިސްކިތް އިންތަނުގައި 12 ބުރީގެ އިމާރާތެއް އަޅައި ނުވަތަ ބޮޑުތަކުރުފާނުގެ ގަބުރު ނަގައި އެހެން ތަނަކަށް.. މިއިން އެއްވެސް ކަމެއް ކުރާކަށް އެއްވެސް އިރެއްގައި ވާހަކައެއް ދެކެވުނީކީ އެއްވެސް ނޫން އެއްވެސް މީޑިއާއަކަށް މައުލޫމާތު ދިނީކީ ވެސް ނޫން،" މިނިސްޓަރު ވިދާޅުވި އެވެ.
މިނިސްޓަރު ޒިޔާދު ވިދާޅުވި ގޮތުގައި، އެފަދަ ވާހަކަތައް އެ ދައްކަނީ ރައްޔިތުންނަށް އޮޅުވާލައި މަގު ފުރެއްދުމުގެ ގޮތުން ކަމަށާއި މި ސަރުކާރުން އިސްލާމްދީން ހިމާޔަތް ކުރަން ކުރާ މަސައްކަތްތައް ރައްޔިތުންނަށް ފޮރުވަން ކަމަށެވެ.