ދިވެހި ކުއްޖެއްގެ އޯގާތެރިކަން: ބަލި މަންމައަށް ގެނެސްދިން "ކިޔަވާފައި ހުރި ފެން"

މުޖުތަމައުގެ އަހުލާގީ ފޭރާން ވީދި، އަދަބު އިހުތިރާމާއި އޯގާތެރިކަން ނެތިގެންދާ ކަމުގެ ޝަކުވާތަކުން މިއަދު އަޅުގަނޑުމެންގެ ކަންފަތްތައް ވަނީ ފުރިފައެވެ. ކޮންމެ ދުވަހަކު ހެން އިވެމުންދާ އަދި ފެންނަމުންދާ ނާއުންމީދީ ހަބަރުތަކުގެ ތެރެއިން، ކުރިމަގުގެ ޖީލާ މެދު ހިތުގައި އުފެދޭ ކަންބޮޑުވުންތައް ދަނީ އިތުރުވަމުންނެވެ. ނަމަވެސް، ހަގީގީ އިސްލާމީ ތަރުބިއްޔަތުގެ މަތީގައި ދަރިން ބޮޑުކުރެވިއްޖެ ނަމަ، އަޅުގަނޑުމެންގެ މި މުޖުތަމައުއަށް އަދިވެސް އުޖާލާ މުސްތަގުބަލެއް އޮތްކަން ކަށަވަރެވެ. ގޭތެރޭގެ މާހައުލުން ފެށިގެން ދަރިންގެ ހިތްތަކުގައި ﷲ އަށް އޮންނަ ލޯތްބާއި އިތުބާރު ވަރުގަދަކޮށްދިނުމަކީ، ހުރިހާ އިޖުތިމާއީ ބަލިމަޑުކަމަކަށް އޮތް އެންމެ ފުރިހަމަ ފަރުވާއެވެ.

މި ހަގީގަތް އެންމެ ފުންކޮށް އިހުސާސްކޮށްދިނީ، ބަލިވެ އުޅުނު ދިވެހި މަންމައަކަށް އޭނާގެ ދިހަ އަހަރުގެ ދަރިފުޅު އަލީ ގުރުއާން ކިޔަވައިގެން ފެންފުޅިއެއް ތައްޔާރުކޮށްދޭ ވާހަކަ މިއަދު އެ މަންމަ ސޯޝަލް މީޑިއާގައި ހިއްސާކުރި ޕޯސްޓުންނެވެ. އެ ޕޯސްޓު ކިޔާލުމުން އަޅުގަނޑުގެ ހިތަށް ލިބިގެންދިޔައީ ބަޔާންކުރަން ދަތި ފުން ހިތްހަމަޖެހުމަކާއި އުފާވެރިކަމެކެވެ. ތުއްތު ކުއްޖެއްގެ ފަރާތުން ފެނިގެންދިޔަ މި މަތިވެރި އަމަލުން، ދަރިންގެ ހެޔޮ ތަރުބިއްޔަތާއި، އިސްލާމްދީނަށް އޮތް ލޯތްބާއި، މައިންބަފައިންނަށް އޮތް ފުން ކުލުނާއި އޯގާތެރިކަން ވަރަށް ފުރިހަމައަށް ދޭހަވެގެންދިޔައެވެ.

އެ މަންމަގެ އަސަރުގަދަ ލިޔުންކޮޅުން އަޅުގަނޑުގެ ލޮލުން ކަރުނަ ހިލުވާލީ ހަމައެކަނި އެ ކުއްޖާގެ މައުސޫމްކަމުންނެއް ނޫނެވެ. އޭގެ އިތުރުން، މިއަދުގެ ހަލަބޮލި ދުނިޔޭގައި ވެސް މިފަދަ ސާފު، ތަގުވާވެރި ހިތްތަކެއް އަޅުގަނޑުމެންގެ ތެރޭގައި ބޮޑުވަމުން އަންނަކަން އެނގުމުން ލިބުނު އުންމީދުގެ ސަބަބުންނެވެ. މިއީ މުޅި މުޖުތަމައުއާ މެދު އަދިވެސް އުންމީދެއް އެބައޮތްކަމުގެ އިހުސާސް އާކޮށްދިން، ހިތްތަކަށް ފިނިކަން ގެނެސްދިން ހާދިސާއެކެވެ.

އެ މަންމަ ސޯޝަލް މީޑިއާގައި ހިއްސާކުރި ޕޯސްޓުގައި ބުނެފައިވާ ގޮތުގައި، ފާއިތުވި ދުވަސްތަކުގައި އޭނާ އުޅުނީ ބަލިވެއެވެ. އަދި އޭނާ ވޭނުގައި އުޅޭތަން ފެނުމުން، ދަރިފުޅު އަލީ އައިސް އޭނާގެ އަތަށް ފެންފުޅިއެއް ދިއްކޮށްލިއެވެ. އެ ފުޅީގެ ބޭރުގައި، އަލީގެ އަމިއްލަ ތުއްތު އަތުލިޔުމުން “ކިޔަވާފަ ހުރި ފެން” މިހެން ލިޔެފައި އޮތެވެ. އަލީ އޭނާގެ މަންމަ ގާތަށް އައިސް ބުނީ، އެ ފެންފުޅި ބޯލުމަށާއި، އޭރުން ރަނގަޅުވާނެ ކަމަށާއި، އެއީ އޭނާ އަމިއްލައަށް ކިޔަވައިގެން މަންމައަށް ތައްޔާރުކޮށްދިން ފެންފުޅިއެއް ކަމަށެވެ. އެ ވާހަކަ ގަބޫލުކުރަން ދަތިވެގެން، އެ ފެންފުޅިއަށް ކިޔެވީ މާމަތޯ މަންމަ އެހުމުން، އަލީ ޖަވާބުގައި ބުނީ ނޫނެކޭ، ކިޔެވީ ހަމަ އޭނާ އަމިއްލައަށް ކަމަށެވެ.

މި ހުރިހާ ކަމަކުން ހިތަށް ފުން އަސަރުތަކެއް ކުރުވުމުން، ފެންފުޅިއަށް ކިޔެވީ ކޮން އެއްޗެއްތޯ މަންމަ އެހިއެވެ. ޖަވާބުގައި އަލީ ބުނީ، ސޫރަތުލް ފާތިހާ ތިން ފަހަރު، އިހްލާސް، ފަލަގް އަދި ނާސް ސޫރަތް ތިން ފަހަރު، އާޔަތުލް ކުރުސި ތިން ފަހަރު، އަދި ސޫރަތުލް ބަގަރާގެ ފަހު ދެ އާޔަތް ތިން ފަހަރު ކިޔެވި ކަމަށެވެ. އަދި އެގޮތަށް ކިޔެވީ މަންމައަށް އެސްފީނާ ޖެހިފައިވާ ކަމަށް އޭނާއަށް ހީވާތީ ކަމަށާއި، އެ ފެން ބޯލުމުން އިންޝާﷲ މަންމަ ރަނގަޅުވާނެ ކަމަށް ވެސް އަލީ ބުންޏެވެ. ދިހަ އަހަރުގެ ދަރިފުޅަށް ކިޔަވަންވީ ކޮން އެއްޗެއްކަން އެހާ ރަނގަޅަށް އެނގުނު ކަމީ ﷲ އަށް ނުހަނު ޝުކުރުވެރިވާ ކަމެއް ކަމަށާއި، ނަމަވެސް އެއަށްވުރެ ބޮޑަށް އަސަރުކުރުވީ މަންމަ ބަލިވެ އުޅޭތަން ފެނުމާއެކު އެ ތުއްތު ސިކުނޑި ވަގުތުން ﷲ އަށް އެނބުރުނު ގޮތް ފެނުމުން ކަމަށް އެ މަންމަ ލިޔެފައިވެއެވެ. އެއްވެސް މީހަކު އަލީ ގާތު އެކަން ކުރާކަށް ނުބުނެއެވެ. އޭނާއަށް ހަމައެކަނި ފެނުނީ މަންމަގެ ވޭނެވެ. އަދި ވަގުތުން ހަނދާންވީ ﷲ މަތިންނެވެ. އެ ތުއްތު ހިތުގައި އެ ހިޔާލު ލެއްވިކަމަށްޓަކައި، ހާލިގުވަންތަ ﷲ އަށް އޮތް ލޯބި އިތުރުވެގެންދިޔަ ކަމަށް ބުނެ އެ މަންމަ ވަނީ ﷲ އަށް ހަމްދުކޮށްފައެވެ.

އެ މަންމަ އިތުރަށް ކިޔައިދިން ގޮތުގައި، އޭނާ އެ ފެންފުޅިން ފެން ބުޔެވެ. އަދި ފުޅި ދެބައިކުޅަ އެއްބަޔަށް ހުސްވިތަން ފެނުމުން، އަލީ އަނެއްކާވެސް އެ ފުޅި ފުރާލިއެވެ. އެގޮތަށް ތިން ފުޅި ފުރެންދެން އޭނާ ފެން އަޅައިދިނެވެ. އަދި ﷲ ގެ އިރާދަފުޅުން ބަލި ރަނގަޅުވި ކަމަށާއި، އަލީގެ ދުއާ ﷲ އިޖާބަކުރެއްވިކަން ދަރިފުޅު ގާތު ބުނެ، މަންމައަށްޓަކައި އެ ފެން ތައްޔާރުކުރުމަށް އޭނާ ބެހެއްޓި ލޯތްބާއި ކުރި މަސައްކަތަށް ﷲ ހެޔޮ ޖަޒާ ދެއްވުން އެދި ދުއާކޮށްދިން ކަމަށް ވެސް ބުންޏެވެ. އެ ވަގުތު އަލީ ހުރީ އުފަލުން ފޮޅި، ފުޅާ ހިނިތުންވުމެއްގައި ކަމަށް އެ މަންމަ ސިފަކުރިއެވެ. އެހެން އިނދެ، އެހެން އެއްވެސް ފަރާތަކަށް އެނބުރުމުގެ ކުރިން، ހުރިހާ ކަމެއްގައި ﷲ ވޮޑިގެންވާކަން ދަރިޔަކަށް ދަސްވުމަކީ ކޮންފަދަ ފުރިހަމަ ކަމެއްތޯ ވިސްނާލެވުނު ކަމަށް ވެސް އެ ޕޯސްޓުގައިވެއެވެ. ޕޯސްޓު ނިންމާލަމުން އެ މަންމަ ދުއާކޮށްފައިވަނީ، އޭނާގެ ދަރިފުޅުގެ ހިތް އަބަދުވެސް އެފަދައިން ﷲ އާ ގާތްކޮށް ލެހެއްޓެވުމަށާއި، އެ ދަރިފުޅާއި އެ ކުއްޖާގެ އެއްބަނޑުއެއްބަފާ ހުރިހާ ކުދިންނަކީ ގުރުއާނުގެ އަހުލުވެރިން ކަމުގައި ލެއްވުމަށާއި، އަބަދުވެސް ﷲ ގެ ހަޟްރަތަށް ރުޖޫއަވުމުން ހިތްހަމަޖެހުން ލިބޭ ބައެއް ކަމުގައި ލެއްވުމަށެވެ. އަދި “އަޅުގަނޑުގެ ކުޑަކުޑަ އިމާމް އަލީ” އޭ ބުނެ، ﷲ ގެ ބަރަކާތަށް އެދިފައިވެއެވެ.

މި ވާހަކަކޮޅު ކިޔާލުމުން ހިތަށް ލިބިގެންދިޔަ ހަމަޖެހުމަކީ، ހަމައެކަނި މަންމައަކާއި ދަރިޔަކާ ދެމެދު އޮތް ލޯބީގެ ސަބަބުން ލިބުނު ހަމަޖެހުމެއް ނޫނެވެ. އެއީ، ދިހަ އަހަރުގެ ކުޑަކުއްޖަކު އޭނާގެ މަންމައަށް ކުރިމަތިވި ތަކުލީފެއްގައި، އިސްލާމީ ޝަރީއަތުގައި ކަނޑައަޅުއްވާފައިވާ ސައްހަ، ސުންނަތް މަގު އިހުތިޔާރުކުރިތަން ފެނުމުން ލިބުނު އީމާނީ އުފަލެކެވެ. ބައްޔެއް ނުވަތަ މުސީބާތެއް ކުރިމަތިވާ ހިނދު، ކީރިތި ގުރުއާނުގެ އާޔަތްތަކުން ޝިފާއަށް އެދުމަކީ މުއުމިނުންގެ ސިފައެކެވެ. އެ ތުއްތު ކުއްޖާ އެ ވަނީ ބޮޑެތި މީހުންނަށް ވެސް ނަމޫނާއެއް ދައްކާފައެވެ.

އިސްލާމީ ފިގުހާއި އިލްމުވެރިންގެ ބަސްފުޅުތަކަށް ބަލާއިރު، އަލީ އެ ކުރި އަމަލަކީ ދީނީ ގޮތުން ނުހަނު މަތިވެރި އަދި ހުއްދަ ރުގްޔާއެކެވެ. ބަލިމީހެއްގެ މައްޗަށް ސޫރަތުލް އިހްލާސް، ފަލަގް އަދި ނާސް ސޫރަތާއި، ސޫރަތުލް ފާތިހާ އަދި ގުރުއާނުގެ އެހެނިހެން ސޫރަތްތައް ކިޔެވުމަކީ އަޅުގަނޑަށް އެނގިފައިވާ ގޮތުގައި ހުއްދަ ރުގްޔާއެކެވެ. މީގެ އިތުރުން، އަލީގެ ހިތަށް މަންމައަށް އެސްފީނާ ޖެހިފައިވާ ކަމުގެ ހިޔާލު އައިސް، އެކަމުން ރައްކާތެރިކޮށްދިނުމަށް އަވަސްވެގަތް ގޮތުން ވެސް އޭނާގެ ދީނީ ހޭލުންތެރިކަން ހާމަވެއެވެ. އެސްފީނާ ހިމެނޭހެން އެކި ބަލިތަކާއި ނުރައްކާތަކުން އަމިއްލަ ނަފްސާއި އާއިލާ ރައްކާތެރިކުރުމަކީ ކޮންމެ މުސްލިމަކަށް ވެސް ބާރުއަޅުއްވާފައިވާ ކަމެކެވެ. މިފަދަ ސައްހަ އަގީދާއެއް ކުޑަކުއްޖެއްގެ ހިތުގައި އަށަގެންފައި ހުރުމަކީ، އަޅުގަނޑުމެންގެ ހިތްތަކަށް ފުން ތަސައްލީއެއް ގެނެސްދޭ ކަމެކެވެ.

ސުވާލަކީ، ދިހަ އަހަރުގެ ކުއްޖެއްގެ ކިބައިން މިފަދަ ފުރިހަމަ އީމާންތެރިކަމެއް ފެނިގެންދިޔައީ ކިހިނެއް ހެއްޔެވެ؟ ޝައްކެއް ވެސް ނެތް ގޮތުގައި، މިއީ އެ ކުއްޖާގެ މަންމަގެ ފުށުންނާއި ގޭތެރެއިން ލިބޭ ހެޔޮ ތަރުބިއްޔަތުގެ މޭވާއެވެ. ދަރިފުޅު ﷲ އާ ގުޅުވައިދިނުމަކީ އެ ކުއްޖާ އުފަންވާ ވަގުތުން ފެށިގެން (ނުވަތަ އޭގެ ކުރިން ވެސް) މެދުކެނޑުމެއް ނެތި ކުރިއަށްގެންދަންޖެހޭ މުހިންމު މަސައްކަތެކެވެ. ކުއްޖާ ދުނިޔެއަށް އަންނަ ހިނދު ކަނާއަތު ކަންފަތަށް ބަންގީގެ އަޑު އިއްވުމުން ފެށިގެން، އެ ކުއްޖާ ބޮޑުވަމުން އަންނައިރު ގުރުއާން ކިޔެވުމާއި، ނަމާދާއި، ދުއާއާއި، ﷲ ހަނދުމަކުރުމުގެ ތެރެއިން ﷲ ގެ އިސްމުފުޅު އަބަދުވެސް އިވެމުންދިއުމަކީ ކޮންމެހެން ބޭނުންތެރި ކަމެކެވެ. އިސްލާމީ ތަރުބިއްޔަތު ފަށަންޖެހެނީ ގޭތެރެއިން، ކުދިން ކަންކަން އޮޅުންފިލުވުމަށް ޝައުގުވެރިވާ ތުއްތު އުމުރުގައެވެ. ހެޔޮލަފާ އަދި އީމާންތެރިކަން ވަރުގަދަ ބައެއްގެ ގޮތުގައި ދަރިން ބޮޑުކުރުމަށްޓަކައި، ނަމާދާއި ރިވެތި އަހުލާގާއި ދީނަށް ލޯބިކުރުމާއި ﷲ އަށް އަޅުކަންކުރަންޖެހޭ ސަބަބު އެ ކުދިންނަށް އުނގަންނައިދޭންޖެހެއެވެ.

ކުދިންނަށް ދީން އުނގަންނައިދިނުމުގައި ހަމައެކަނި ނަސޭހަތް ދިނުމަކުން ނުފުދެއެވެ. މައިންބަފައިންގެ އަމަލީ ނަމޫނާއަކީ އެންމެ ބާރުގަދަ ވަސީލަތެވެ. ތަރުބިއްޔަތާ ބެހޭ ދިރާސާވެރިން ފާހަގަކުރާ ގޮތުގައި، ތުއްތު އުމުރުގައި ކުދިންގެ ހިތްތަކުގައި ގުރުއާނަށް ލޯބި ޖެއްސުމަށްޓަކައި، އެ ކުދިން ނަކަލުކުރާނެ ރަނގަޅު ނަމޫނާއެއް ފެންނަން ހުންނަންޖެހެއެވެ. އާއިލާގެ ތެރޭގައި ކުދިންގެ ފުރަތަމަ މުދައްރިސުންނަކީ މައިންބަފައިން ކަމަށްވާތީ، ކުދިން އަމަލުކުރާނީ މައިންބަފައިން ކުރާ ކަންތައްތަކަށެވެ. އެހެންކަމުން، ގުރުއާނަށް ލޯބިކުރާކަން ދައްކައިދޭ އަމަލުތައް ފުރަތަމަ ފެންނަންޖެހޭނީ މައިންބަފައިންގެ ކިބައިންނެވެ. އާދަވެގެން ގޭތެރޭގައި ގުރުއާން ނުކިޔަވާ އަދި ގުރުއާނުގެ އަޑު ނުއިއްވާ މައިންބަފައިންނަށް، އެ މީހުންގެ ދަރިންގެ ހިތްތަކުގައި ﷲ އާއި ރަސޫލާ ﷺ އަށް އޮންނަ ލޯބި ފުރިހަމައަށް އަށައެއް ނުގެންނެވޭނެއެވެ.

މިކަމުގައި އިސްލާމީ އިލްމުވެރިން ދެއްވާ އިރުޝާދުތަކަށް ބަލާއިރު، ދަރިފުޅު އުފަންވުމަށްފަހު އެ ކުއްޖާއަށް ގުރުއާން ކިޔަވައިދޭން ފެށުމަކީ ވެސް ގެއްލިގެންދާ ފުރުސަތެއް ކަމަށް ބައެއް އިލްމުވެރިން ފާހަގަކުރައްވައެވެ. އޭގެ ބަދަލުގައި، މައިމީހާގެ ބަނޑުގައި އޮންނަ އިރުން ފެށިގެން ﷲ ގެ ކަލާމްފުޅުގެ އަޑު ކުއްޖާއަށް ގަވާއިދުން އިއްވަންޖެހެއެވެ. ނަމަވެސް، ހަމައެކަނި ރަސްމިއްޔާތެއްގެ ގޮތުން ކޮންމެ ދުވަހަކު ދީނީ ފޮތަކުން ބައެއް ކިޔަވާލުމަކުން މަސްއޫލިއްޔަތު އަދާވީ ކަމަށް ދުށުމަކީ އިންސާނީ ތަބީއަތް ދަށްކޮށްލުމެވެ. ގޭތެރޭގައި ދީނީ ކަންކަމަށް ފަހި މާހައުލެއް ގާއިމުކުރުމަކާ ނުލައި، ހަމައެކަނި ކިޔަވާލާ ކިޔެވުމަކުން އެދެވޭ ނަތީޖާއެއް ނުނިކުންނާނެއެވެ. އަލީގެ އަމަލުން ފެނިގެންދިޔައީ، ހަމައެކަނި ސޫރަތްތަކެއް ހިތުދަސްވެފައި ހުރުމެއް ނޫނެވެ. އޭނާ ބޮޑުވަމުން އައި ދީނީ މާހައުލުގެ ސަބަބުން، ކޮންމެ ކަމެއްގައި ވެސް ފުރަތަމަ ﷲ އަށް ވަކީލުކުރުމުގެ ރޫހު އޭނާގެ ހިތުގައި އަށަގެންފައިވާ މިންވަރެވެ.

އަލީގެ މި ވާހަކައިން ދެން ފާހަގަކޮށްލެވޭ އެންމެ އަސަރުގަދަ އަނެއް ސިފައަކީ، އޭނާގެ މަންމައަށްޓަކައި ހިތުގައި އޮތް ފުން ކުލުނާއި އޯގާތެރިކަމެވެ. މަންމަ ބަލިވެ އުޅޭތަން ފެނުމުން، އަމިއްލަ އިސްނެގުމުގެ މަތިން ފެންފުޅިއަށް ކިޔަވައި، މަންމަ އެ ފެން ބޮމުންދިޔަ ވަރަކަށް ތިން ފަހަރު މަތިން ފުޅި ފުރައިދިނުމަކީ، މައިންބަފައިންނަށް ކަމޭހިތުމުގެ ލާމަސީލު ނަމޫނާއެކެވެ. މިއީ އިސްލާމްދީނުގައި އެންމެ ބޮޑަށް ބާރުއަޅުއްވާފައިވާ އެއް އަސާސެވެ.

މައިންބަފައިންނަށް ހެޔޮކޮށް ހިތުމުގެ މުހިންމުކަން ބަޔާންކުރައްވައި، ކީރިތި ގުރުއާނުގައި ﷲ އަންގަވާފައިވަނީ، އެކަލާނގެއަށް މެނުވީ އަޅުކަން ނުކުރުމަށާއި، މައިންބަފައިންނަށް ހެޔޮކޮށް ހިތުމަށެވެ. އަދި އެ ދެމީހުންކުރެ އެކަކު ނުވަތަ ދެމީހުންމެ މުސްކުޅިކަމާ ހަމައަށް ފޯރައިފި ނަމަ، އެ ދެމީހުންނަށް “އުއްފު” ވެސް ނުބުނުމަށާއި، އެ ދެމީހުންނަށް އަޑުލައި ނަހަދައި، މާތް ބަހުން ވާހަކަދެއްކުމަށެވެ. އަދި އޯގާތެރިކަމުގެ ގޮތުން ނިކަމެތިކަމުގެ ފިޔަ އެ ދެމީހުންނަށްޓަކައި ތިރިކޮށްލުމަށާއި، ތިމާ ކުޑަކުއްޖަކު ކަމުގައި ވީ ދުވަހު އެ ދެމީހުން ތިމާ ބަލައި ބޮޑުކުރި ފަދައިން، އެ ދެމީހުންނަށް ރަހްމަތް ލެއްވުމަށް އެދި ދުއާކުރުމަށް ވެސް ވަނީ އަމުރުކުރައްވާފައެވެ. އަލީ އޭނާގެ މަންމައަށްޓަކައި ކުރި ދުއާއާއި ބެހެއްޓި އޯގާތެރިކަމަކީ ސީދާ މި އިލާހީ އިރުޝާދުގެ އަމަލީ ތަރުޖަމާއެކެވެ.

ޒަމާނީ ދިރިއުޅުމުގެ ހަލަބޮލިކަމުގެ ތެރޭގައި ދަރިން ތަރުބިއްޔަތުކުރުމަށް މައިންބަފައިންނަށް ގޮންޖެހުންތަކެއް ކުރިމަތިވާކަމީ ވެސް ގަބޫލުކުރަންޖެހޭ ހަގީގަތެކެވެ. އެހެންނަމަވެސް، އަލީ ފަދަ ކުދިންގެ އަމަލުތަކުން ސާބިތުކޮށްދެނީ، ހުރިހާ ގޮންޖެހުންތަކެއްގެ ތެރޭގައި ވެސް، ގޭތެރޭގެ ތަރުބިއްޔަތު ރަނގަޅުކުރެވިއްޖެ ނަމަ، އަޅުގަނޑުމެން އެދޭ ފަދަ ޖީލެއް ބިނާކުރެވޭނެ ކަމެވެ.

މުޖުތަމައު އިސްލާހުކުރުމުގެ ތަޅުދަނޑި އޮތީ އަޅުގަނޑުމެންގެ އަމިއްލަ ގޭތެރޭގައެވެ. ސަރުކާރުތަކުންނާއި މުއައްސަސާތަކުން ކިތަންމެ ބޮޑެތި ޕްރޮގްރާމްތަކެއް ހިންގި ނަމަވެސް، ކޮންމެ މަންމައަކާއި ބައްޕައަކު އެ މީހުންގެ ދަރިންގެ ހިތްތަކުގައި އީމާންކަމުގެ އޮށް ނުއިންދާހާ ހިނދަކު، ހަގީގީ ބަދަލެއް ނާންނާނެއެވެ. ދަރިންނަށް ކީރިތި ގުރުއާން އުނގަންނައިދިނުމަކީ ހަމައެކަނި އަކުރު ފިލި ދަސްކޮށްދިނުމެއް ނޫނެވެ. އެއީ ދިރިއުޅުމުގެ ކޮންމެ އަޑިގުޑަންކަމެއްގައި، ކޮންމެ ވޭނެއްގައި، އަދި ކޮންމެ ބިރުވެރިކަމެއްގައި އެންމެ ފުރަތަމަ އެނބުރެންޖެހޭ ފަރާތަކީ ﷲ ކަން އެ ކުދިންގެ އަމަލީ ދިރިއުޅުމުން ދަސްކޮށްދިނުމެވެ.

ވީމާ، މުޖުތަމައު ހަލާކުވެއްޖެ ކަމަށް ބުނެ މާޔޫސްވެ ތިބުމުގެ ބަދަލުގައި، ކޮންމެ ބެލެނިވެރިޔަކު ވެސް މިއަދު އަޒުމް ކަނޑައަޅަންވީ ތިމާގެ ގޭތެރެއަކީ ގުރުއާނާއި ސުންނަތުގެ ނޫރުން އަލިވެފައިވާ ހިޔާވަހިކަމަކަށް ހެދުމަށެވެ. ދަރިންގެ ކުރިމަތީގައި ﷲ އަށް ވަކީލުކޮށް، މައިންބަފައިންނަށް އޯގާތެރިވުމުގެ ރިވެތި ނަމޫނާ މިއަދު ދައްކަވާށެވެ. އޭރުން މާދަމާގެ މުޖުތަމައު އާރާސްތުކުރާނެ ހެޔޮލަފާ، އޯގާތެރި ޖީލެއް ތިޔަ ބެލެނިވެރިންގެ އަތްމަތިން އުފެދިގެން އަންނާނެއެވެ. އަލީ ކަހަލަ އެތައް ކުދީންނެއް އަޅުގަނޑުމެންގެ މުޖްތަމައުން ފެންނާން ފަށާނެއެވެ. ان‌شاءالله

comment ކޮމެންޓް