މަގުބޫލު ޗެޓް ޝޯ "ކޮފީ ވިތު ކަރަން"ގެ ނުވަވަނަ ސީޒަނުގައި ދެއްކި ވާހަކަތަކަކާ ގުޅިގެން، ބޮލީވުޑް އަދި ސައުތު ސިނަމާގެ މަޝްހޫރު ޖޯޑު ކަމަށްވާ ރަޝްމިކާ މަންދަންނާ އާއި ވިޖޭ ދޭވަރަކޮންޑާ އަނެއްކާވެސް މީޑިއާގެ ސަމާލުކަމަށް އަތުވެއްޖެއެވެ.
ސޯޝަލް މީޑިއާގައި މި ދެމަފިރިންނަށް ފާޑުކިޔުންތައް އަމާޒުވާން ފެށީ، ކައިވެނިކުރުމަށް އެދި ރަޝްމިކާ އޭނާގެ ގާތުގައި 100 ފަހަރު އެދުނު ކަމަށް ބުނެ އެ ޝޯގައި ވިޖޭ ދެއްކި ވާހަކަތަކަކާ ގުޅިގެންނެވެ. ވިޖޭގެ އެ ވާހަކަތަކާއެކު އޭނާ ރަޝްމިކާއާ މެދު ޢަމަލުކުރާ ގޮތާމެދު ސުވާލު އުފައްދައި، ގިނަ ބަޔަކު ސޯޝަލް މީޑިއާގައި ނުރުހުން ފާޅުކުރަން ފެށިއެވެ.
އެ ޕްރޮގްރާމް ދެއްކިތާ ކުޑަ ދުވަސްކޮޅެއްގެ ތެރޭގައި، ރަޝްމިކާ ވަނީ އޭނާގެ ފިރިމީހާގެ ދިފާޢުގައި ނުކުމެ، ފާޑުކިޔުންތެރިންނަށް ވަރުގަދަ ރައްދެއް ދީފައެވެ. ދެމަފިރިންގެ ވީޑިއޯއަކާއެކު އޭނާ ޙިއްސާކުރި މެސެޖެއްގައި، އާންމުކޮށް މިފަދަ ވާހަކަތަކަށް ޖަވާބުދާރީ ނުވި ނަމަވެސް، މިފަހަރުގެ ޙާލަތު ފެންނަނީ މީހުން ޚިޔާލު ފާޅުކުރުމަށްވުރެ ބޮޑަށް ރުޅިވެރިކަން ބޭރުކޮށްލާނެ އަމާޒެއް ހޯދަމުންދާ މަންޒަރުގެ ގޮތުގައި ކަމަށް ބުންޏެވެ.
ވިޖޭ އާއި ރަޝްމިކާ، ދެ މީހުންގެ ކައިވެނީގެ ރަސްމިއްޔާތުގެ ކުރިން ބޭއްވި 'ހަލްދީ' ހަފްލާގައި--ފޮޓޯ/އެންޑީޓީވީ އޭނާ އެދެން ބޭނުންވެއްޖެ ނަމަ 100 ފަހަރެއް ނޫން ކަމަށާއި 1000 ފަހަރު ވެސް ކައިވެންޏަށް އެދިދާނެ ކަމަށް ރަޝްމިކާ ވަރަށް ސާފުކޮށް ބުނެފައިވެއެވެ. އަމިއްލަ މިނިވަންކަމާއި އިޚުތިޔާރުގެ ބޭނުން ހިފައިގެން، އަމިއްލަ ދިރިއުޅުން ބިނާކުރުމުގެ ފުރިހަމަ ޤާބިލުކަން ދެ މީހުންގެ ކިބައިގައިވެސް އެބަހުރި ކަމަށާއި، ދިރިއުޅުމުގެ ބައިވެރިއެއްގެ ގޮތުގައި އެކަކު އަނެކަކު އިޚުތިޔާރުކުރީ ދެ މީހުންގެ ރުހުމުގައި ކަމަށްވެސް އޭނާ ފާހަގަކުރިއެވެ.
ރަޝްމިކާގެ ބަޔާނަށްފަހު، ވިޖޭ ދޭވަރަކޮންޑާ ވެސް ވަނީ އިންސްޓަގްރާމް މެދުވެރިކޮށް އެ މީހުންގެ ކައިވެނީގެ ދިފާޢުގައި ވާހަކަދައްކައިފައެވެ. ރަޝްމިކާއާއެކު ހޭދަކުރި އުފާވެރި ވަގުތުތަކުގެ ފޮޓޯތަކާއި ވީޑިއޯތައް ހިއްސާކުރަމުން ވިޖޭ ސިފަކުރި ގޮތުގައި، ރަޝްމިކާއަކީ އޭނާގެ ޙަޔާތުގެ އެންމެ ގާތް އެކުވެރިޔާގެ އިތުރުން މުޅި ދިރިއުޅުމުގެ ވެސް އެންމެ މުހިންމު އެއް ބައިވެރިޔާއެވެ.
އެ މީހުންގެ ގުޅުމާ މެދު ކަންބޮޑުވެގެން އުޅޭ ފަރާތްތަކަށް ރައްދުދެމުން ވިޖޭ ބުނީ، އެ ދެމަފިރިން ތިބީ އިންތިހާއަށް އުފަލާއި ހިތްހަމަޖެހުމުގައި ކަމަށެވެ. މި ދެ ތަރިންގެ މި ސާފު އަދި ސީދާ ޖަވާބުތަކާއެކު، ސޯޝަލް މީޑިއާގައި އެ މީހުންގެ ޒަވާޖީ ޙަޔާތާ މެދު ދެކެވެމުންދިޔަ ވާހަކަތަކަށް މިވަނީ ވަރުގަދަ ނިމުމެއް ގެނެސްދީފައެވެ.
ވިޖޭ އާއި ރަޝްމިކާގެ ލޯބީގެ ގުޅުން ފެށުނީ ދެ މީހުން އެކީގައި މަސައްކަތްކުރި މަޤުބޫލު ފިލްމުތައް ކަމަށްވާ "ގީތާ ގޯވިންދަމް" އާއި "ޑިއާ ކޮމްރޭޑް"ގެ މަސައްކަތުގެ ތެރެއިންނެވެ.
އެ ފިލްމުތަކަށްފަހު، އެ މީހުން ލޯބީގެ ގޮތުން ގުޅިގެން އުޅޭކަމުގެ އަޑުތައް އެތައް އަހަރެއް ވަންދެން ފެތުރެމުން ދިޔަނަމަވެސް، ދެ ތަރިންވެސް އެ ގުޅުން ދެމެހެއްޓީ މީޑިއާގެ ލޯތަކާ ދުރުގައެވެ. ނަމަވެސް އެތައް އަހަރެއްގެ ގާތް އެކުވެރިކަން ޒަވާޖީ ޙަޔާތަކަށް ބަދަލުކޮށް، ދާދިފަހުން އެ ދެމަފިރިން ވަނީ އާއިލާ އާއި ގާތް ރަހުމަތްތެރިންގެ ހާޒިރުގައި ކައިވެނީގެ ގޮށް ޖަހައިފައެވެ.
އެހެންކަމުން، ސޯޝަލް މީޑިއާގެ ފާޑުކިޔުންތައް ކޮންމެ ގޮތަކަށް އަމާޒުވި ނަމަވެސް، މި ދެ ތަރިންގެ ޒަވާޖީ ހަޔާތަކީ އެތައް އަހަރެއްގެ އިތުބާރާއި ބަދަހި އެކުވެރިކަމެއްގެ މައްޗަށް ބިނާވެފައިވާ ވަރުގަދަ ގުޅުމެއްކަން އެމީހުންގެ ވާހަކަތަކުން މިހާރު މިވަނީ ސާފުވެފައެވެ.