ސިނަމާލެ ބުރިޖު މަތީގައި، ސައިކަލު މަތީ އޮށޯވެގެން އޮވެ ދުއްވި މައްސަލައެއްގައި ހައްޔަރުކުރި މީހާ ހުރީ މަސްތުގެ ހާލަތުގައި ކަމަށާއި އޭނާ ނުދައްކާ 44،000 ރުފިޔާގެ ޓްރެފިކް ޖޫރިމަނާ އެބަ އޮތް ކަމަށް ފުލުހުން ބުނެފިއެވެ.
މި މައްސަލައިގައި ކ. މާފުއްޓަށް ނިސްބަތްވާ 26 އަހަރުގެ އަހުމަދު ފާރިޒް ހައްޔަރުކުރީ އިއްޔެ ފަތިހުގެ ވަގުތެއްގައެވެ.
ފުލުހުން ބުނީ، އިއްޔެ ފަތިހު 03:52 އެހައިކަންހާއިރު، ހެލްމެޓް ނާޅައި، ސައިކަލުމަތީގައި އޮށޯވެގެން ނުރައްކާތެރިކޮށް ހުޅުމާލެއިން މާލެއަށް ހައިވޭގައި ސައިކަލެއް ދުއްވާފައިދާ ކަމުގެ މައުލޫމާތު ފުލުހުންނަށް ލިބުމުން އެމީހާ ދެނެގަތް ކަމަށެވެ.
ފުލުހެއް މަގުމަތީގައި -- ފޮޓޯ/ ފުލުހުންމިގޮތުން، އޭނާއަށް މާލޭގެ ޓްރެފިކް ލައިޓް ކައިރިން މަޑުކުރުމަށް ފުލުހުން އެންގުމުން، އެ އެންގުމަށް ތަބާނުވެ ބޮޑުތަކުރުފާނުމަގުން އޭނާ ވަނީ ބާރު ސްޕީޑުގައި ދުއްވާފައި ފިލަން މަސައްކަތްކޮށްފައެވެ. އަދި، ފުލުހުންގެ ވެހިކަލް އޭނާގެ ފަހަތުން ގޮސް ތަކުރާރުކޮށް މަޑުކުރަން އެންގުމުންވެސް މަޑުނުކޮށް ފިލަން އުޅުމުގެ ތެރޭގައި ފުލުހުންގެ ކާރުގައި ޖެހި އެކްސިޑެންޓްވެފައިވާ ކަމަށް އެ މުއައްސަސާއިން ބުންޏެވެ.
މި ކަމުގެ ދިފާއުގައި އިއްޔެ ކްރިމިނަލް ކޯޓުގައި އެ ޒުވާނާ ބުނީ، ފުލުހުންގެ ވެހިކަލެއްގައި ނުޖައްސާ ކަމަށާއި އެ ވެހިކަލުން އޭނާގެ ސައިކަލުގައި ޖައްސާ ވައްޓާލީ ކަމަށެވެ. އަދި، ފުލުހުން އޭނާއަށް އެކިވަރުގެ އަނިޔާތައް ކޮށްފައިވާ ކަމަށް އޭނާ ތުހުމަތުކުރިއެވެ.
މި ހާދިސާގައި ފުލުހުންގެ ކާރަށް ގެއްލުންތަކެއް ލިބިފައިވާއިރު، އެކްސިޑެންޓަށްފަހު ސައިކަލު ދޫކޮށް އެ ސަރަހައްދުން އޭނާ ފިލާފައިވާ ކަމަށް ފުލުހުން ބުންޏެވެ.
ފުލުހުން ބުނީ، އޭނާ ހައްޔަރުކުރީ މާލެތެރެ ޕެޓްރޯލްކުރަމުންދިޔަ ވަގުތެއްގައި، މާލެ، މޫންލައިޓް ހިނގުމުން އޭނާ ހުއްޓުވައިގެން ކަމަށެވެ. އޭނާގެ ބަންދަށް ކޯޓުން އިއްޔެ ވަނީ ހަތް ދުވަސް ޖަހާފައެވެ.
މި މައްސަލައިގައި ފުލުހުން ބުނީ، ފާރިޒަކީ ތަކުރާރުކޮށް އެއްގަމު އުޅަނދު ދުއްވުމުގެ ގާނޫނާއި ގަވާއިދުތަކާ ޚިލާފުވެފައިވާ މީހެއް ކަމަށެވެ. މިގޮތުން، އޭނާ 44,000 ރުފިޔާގެ ޓްރެފިކް ޖޫރިމަނާ ނުދައްކައި އޮތްކަން ފުލުހުން ފާހަގަކުރިއެވެ.
މީގެ އިތުރުން، ލައިސަންސް ނެތި ދުއްވުމާއި އެއްކޮޅަށް ދުއްވާ މަގުތަކުގައި ގަވައިދާ ޚިލާފަށް ދުއްވުމާއި ބާރު ސްޕީޑުގައި ދުއްވުމާއި ލޯގަނޑު ނުޖަހައި ދުއްވުމާއި ލައިސަންސް ހިފަހައްޓާފައި އޮއްވައި ތަކުރާރުކޮށް ދުއްވުމާއި. މަގުމަތީގެ އަމާންކަން ގެއްލޭގޮތަށް ނުރައްކާތެރިކޮށް ދުއްވުމާއި ސައިކަލުގެ ލައިޓުތައް މޮޑިފައިކޮށްގެން ދުއްވުމަކީ އޭނާގެ ޓްރެފިކް ކުށުގެ ރެކޯޑުތަކުގެ ތެރޭގައި ހިމެނޭ ކަންކަމެވެ.
މި މައްސަލަ ފުލުހުން އަންނަނީ އިތުރަށް ތަހުގީގު ކުރަމުންނެވެ.