ސައިކަލުގައި ޖައްސާ ވައްޓާލައި، ފުލުހުން އެކި ވަރުގެ އަނިޔާތައް ކުރި ކަމަށް، ފުލުހުންގެ ވެހިކަލެއްގައި ޖެއްސި ކަމަށް ތުހުމަތުވާ ޒުވާނަކު ކްރިމިނަލް ކޯޓުގައި މިއަދު ބުނެފިއެވެ.
މި މައްސަލައިގައި ތުހުމަތުވާ ކ. މާފުއްޓަށް ނިސްބަތްވާ 26 އަހަރުގެ ޒުވާނަކު ހަތް ދުވަހަށް ބަންދުކުރުމަށް ކޯޓުން މިއަދު ވަނީ އަމުރުކޮށްފައެވެ.
އެ ޒުވާނާގެ މައްޗަށް ކުރަނީ، ފުލުހުންގެ ދައުރު އަދާކުރުމަށް ހުރަސް އެޅުމާއި މުދަލަށް ގެއްލުން ދިނުމުގެ ތުހުމަތެވެ.
އޭނާއާ ދެކޮޅަށް ތުހުމަތުކުރެވޭ ކޮންމެވެސް މިންވަރެއްގެ ހެކި ކޯޓަށް ހުށަހާޅާފައިވެއެވެ. އޭގެތެރޭގައި، ސީނަށް ދިޔަ ފުލުހުންގެ ހާދިސާ ރިޕޯޓު ހިމެނެއެވެ.
ފުލުހުންގެ ކާރެއް ހައިވޭގައި ދުއްވާފައި ދަނީ ސަން ފޮޓޯ/ އަހުމަދު އަވްޝަން އިލްޔާސްކޯޓު އަމުރުން އެނގޭ ގޮތުގައި، އެ ޒުވާނާ ވަނީ ސިނަމާލެ ބުރިޖު ހައިވޭގައި ހެލްމެޓު ނާޅައި، ސައިކަލު މަތީގައި އޮށޯވެގެން ނުރައްކާތެރިކޮށް ދުއްވާފައެވެ.
އެހެންވެ، ފުލުހުންގެ އޭނާ ގާތު މަޑުކުރުން އެދުމުން ވެސް މަޑުނުކޮށް، ފުލުހުންގެ ވެހިކަލެއްގައި ޖައްސާފައިވާ ކަމަށް އިންވެސްޓިގޭޝަން އޮފިސަރު (އައިއޯ) ވިދާޅުވިއެވެ. ދިފާއުގައި އެ ޒުވާނާ ކޯޓުގައި ބުނީ، ފުލުހުންގެ ވެހިކަލެއްގައި ނުޖައްސާ ކަމަށާއި އެ ވެހިކަލުން އޭނާގެ ސައިކަލުގައި ޖައްސާ ވައްޓާލީ ކަމަށެވެ. އަދި، ފުލުހުން އޭނާއަށް އެކިވަރުގެ އަނިޔާކޮށްފައިވާ ކަމަށް އެ ޒުވާނާ ކޯޓުގައި ބުންޏެވެ.
އޭނާ ވަނީ ވަކީލެއްގެ ފުރުސަތު ބޭނުންނުވާ ކަމަށް ބުނެފައެވެ. އެހެންވެ، ކޯޓުން ވަނީ، ޝަރީއަތުގައި އޭނާ ދައްކާ ވާހަކަތަކަކީ، ދެކޮޅަށް ބޭނުންކުރެވިދާނެ ވާހަކަތަކެއް ކަމަށާއި ހަނު ހުރުމުގެ ފުރުސަތު އޮތްކަން ތުހުމަތުވާ މީހާއަށް ހަނދާންކޮށްދީފައެވެ.
މި ހާދިސާ ހިނގި ގޮތް އިތުރަށް ބެލުމަށް އައިއޯއަށް ކޯޓުން ވަނީ އަންގާފައެވެ.
ފާހަގަކުރެވޭ ގޮތުގައި، އާންމު ރައްޔިތުންގެ ހިތްތަކުގައި ބިރުވެރިކަން އުފެދޭގޮތަށް މަގުމަތީގައި ނުރައްކާތެރިކޮށް އުޅަނދު ދުއްވުން ތަކުރާރުކުރާ ފަރާތްތައް ހުއްޓުވަން އަޅާ ފިޔަވަޅުތަކުގެ ދަށުން، އެ މީހުންގެ ވަނަވަރު ހާމަކުރުން ފަދަ ފިޔަވަޅުތައް އަޅާނެ ކަމުގެ އިންޒާރު ފުލުހުން އިއްޔެ ވަނީ ދީފައެވެ.