މުޖުތަމައުގެ ތެރޭގައި ބުޅަލާއެކު އުޅުމުގެ ވިސްނުން ކުރިއެރުވުމަށް "ޕްރޮޖެކްޓް ބައުކަލޯ"ގެ ނަމުގައި ހަރަކާތެއް ފަށައިފިއެވެ.
މިއީ މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާބެހޭ ވުޒާރާއާއި، ޖަނަވާރުންގެ ހިމާޔަތުގައި މަސައްކަތްކުރާ ފަރާތްތަކާއި އިޖުތިމާއީ ޖަމިއްޔާތައް ގުޅިގެން އެއް އަހަރު ދުވަހުގެ މުއްދަތަށް ހިންގުމަށް ހަމަޖެހިފައިވާ ގައުމީ ފެންވަރުގެ ޕައިލެޓް މަޝްރޫއެއްކަމަށް އެ ވުޒާރާއިން ބުންޏެވެ.
އެއް އަހަރު ދުވަހުގެ މުއްދަތަށް ހިންގާ ގައުމީ ޕައިލެޓް މަޝްރޫޢު "ޕްރޮޖެކްޓް ބައުކަލޯ" ރަސްމީކޮށް އިފުތިތާޙުކޮށްފައިވަނީ މިއަދެވެ.
https://x.com/MFAORmv/status/2106752279420506540
މި މަޝްރޫޢު އިފުތިތާޙުކުރުމާއި އެއްބަސްވުމުގައި ސޮއިކުރުމުގެ ރަސްމިއްޔާތު މިއަދު ކުރިއަށްދިޔައިރު، މަސްވެރިކަމާއި ދަނޑުވެރިކަމާބެހޭ ވަޒީރު އަޙްމަދު ޝިޔާމްގެ އިތުރުން އެޗްޑީސީގެ މެނޭޖިން ޑިރެކްޓަރު، ބްރިގޭޑިއާ ޖެނެރަލް (ރިޓަޔަޑް) ޢަލީ ޒުހައިރާއި، ވެޓެރިނަރީ ކްލިނިކްތަކުގެ މަންދޫބުންނާއި، މޯލްޑިވްސް ގާލް ގައިޑްސް އަދި ސްކައުޓް އެސޯސިއޭޝަންގެ ޗީފް ކޮމިޝަނަރުން ބައިވެރިވެވަޑައިގެންނެވިއެވެ.
ހުޅުމާލޭގައި ފެށި މި ޕައިލެޓް ޕްރޮޖެކްޓްގެ ދަށުން "ޓްރެޕް-ނިއުޓާ-ރިޓާން" (ޓީ.އެން.އާރް) ޕްރޮގްރާމް މެދުވެރިކޮށް ގިނަ އަދަދެއްގެ ބުޅާ ހިފައި، ވިހެއުން ހުއްޓުވުމަށްފަހު އަނބުރާ ދޫކުރުމުގެ މަސައްކަތް ކުރިއަށްދާނެއެވެ. އަދި ބުޅާތަކަށް ވެޓެރިނަރީ ފަރުވާ ދިނުމާއި، ބުޅާ ގެންގުޅެން ބޭނުންވާ ފަރާތްތަކާ ހަވާލުކުރުމާއި، ޒިންމާދާރުކަމާއެކު ކާންދިނުމާއި ސާފުތާހިރުކަން ދެމެހެއްޓުމުގެ އިތުރުން މަގުމަތީގެ ސަލާމަތްތެރިކަމާއި މުޖުތަމަޢު ހޭލުންތެރިކުރުވުމުގެ ހަރަކާތްތައްވެސް ކުރިއަށްގެންދިއުމަށް ވަނީ ހަމަޖެހިފައެވެ.
މަގުމަތީގައި އުޅޭ ބުޅަލުގެ އާބާދީ ކޮންޓްރޯލްކުރުމަށް "ޕްރޮޖެކްޓް ބައޯކަލޯ" އިފްތިތާހުކުރުމަށް ބޭއްވި ރަސްމިއްޔާތުގެ ތެރެއިން... ފޮޓޯ/ ފިޝަރީޒް މިނިސްޓްރީމި މަޝްރޫއާ ގުޅޭގޮތުން ވާހަކަދައްކަވަމުން ވަޒީރު އަޙްމަދު ޝިޔާމް ވިދާޅުވީ، މި މަސައްކަތާއެކު ބުޅަލާމެދު މުޖުތަމައުގައި ދެކޭ ގޮތް ވަރަށް ބޮޑަށް ބަދަލުވާނެ ކަމަށް އުންމީދުކުރައްވާ ކަމަށެވެ.
"އުންމީދުކުރަނީ އެންމެން ގުޅިގެން މި ކުރެވޭ މަސައްކަތްތަކާއެކު ރާއްޖޭގައި ބުޅަލާ ދޭތެރޭގައި މީހުން މިދެކޭ ގޮތް ބަދަލުކުރެވޭނެ ކަމަށް. މިކަމުގައި ކޮމިއުނިޓީގެ ވިސްނުން، ބުޅަލަށް ބޭނުންވާ ޝެލްޓާޔާއި ބުޅަލަށް ބޭނުންވާ ކެއާ ދޭން ހެދިފަ ހުރި މުއައްސަސާތައް، އަދި އަޅުގަނޑުމެން ވުޒާރާގައިވެސް ވެޓިނަރީއެއް އެބަ އޮތް ބުޅަލުގެ ޝެލްޓާއެއް އޮޅުހިޔާ ހާލަތު އިމްޕްރޫވްކުރަން،" ވަޒީރު ވިދާޅުވިއެވެ.
މަގުމަތީގައި އުޅޭ ބުޅަލުގެ އާބާދީ ކޮންޓްރޯލްކުރުމަށް "ޕްރޮޖެކްޓް ބައޯކަލޯ" އިފްތިތާހުކުރުމަށް ބޭއްވި ރަސްމިއްޔާތުގެ ތެރެއިން... ފޮޓޯ/ ފިޝަރީ×ޒް މިނިސްޓްރީވަޒީރު ޝިޔާމް ފާހަގަކުރެއްވި ގޮތުގައި، ހުޅުމާލޭގައި މި މަޝްރޫއުގެ ފުރަތަމަ މަރުހަލާ ކުރިއަށްގެންދާއިރު މައިގަނޑު މަގުސަދަކީ މުޅި ރާއްޖެއަށް ފުޅާކުރެވޭނެ ފަދަ ނަމޫނާ ނިޒާމެއް ބިނާކުރުމެވެ. މި އިސްނެގުމުގެ ސަބަބުން އިންސާނީ އުސޫލުތަކުގެ ތެރެއިން މަގުމަތީ ބުޅަލުގެ އާބާދީ ކޮންޓްރޯލްކުރެވި، ޖަނަވާރުންނާއި އިންސާނުންނަށް ވެސް ރައްކާތެރި އަދި އެކުވެރި މާހައުލެއް ބިނާވާނެ ކަމަށް ސަރުކާރުން އުއްމީދު ކުރެއެވެ.
ޖަނަވާރުންގެ ހިމާޔަތާއި ރައްކާތެރިކަމަކީ ސަރުކާރުން އިސްކަންދޭ ކަމެއްގެ ގޮތުގައި ރައީސުލްޖުމްހޫރިއްޔާގެ 2024 ވަނަ އަހަރުގެ ރިޔާސީ ބަޔާނުގައިވެސް ވަނީ ފާހަގަކުރައްވާފައެވެ. އަދި ރައްޔިތުންގެ މަޖިލީހުން ފާސްކުރި "ޖަނަވާރުންގެ ހިމާޔަތާއި ރައްކާތެރިކަމުގެ ބިލު" މިދިޔަ އަހަރުގެ ޑިސެމްބަރު މަހުގެ ތިނެއްގައި ރައީސުލްޖުމްހޫރިއްޔާ ވަނީ ތަސްދީގުކުރައްވާފައެވެ. އެ ގާނޫނުގެ ދަށުން ޖަނަވާރުންގެ ދުޅަހެޔޮކަމާއި އެއާ ގުޅުންހުރި ޒިންމާތަކުގެ ގައުމީ އޮނިގަނޑެއް މިހާރު ވަނީ އެކުލަވާލެވިފައެވެ.
މާލެ ސަރަހައްދުގައި ބުޅާ ގިނަވުމުގެ މައްސަލަ ހައްލުކުރުމަށް މި ސަރުކާރުގައި ވަނީ، މަގުމަތިން ބުޅާ ނަގައި، ގެންގުޅުމަށް "އޮޅުހިޔާ" ފެސިލިޓީ ގާއިމުކޮށްފައެވެ. އެގްރިކަލްޗާ މިނިސްޓްރީގެ ތަފާސްހިސާބުތަކުން ދައްކާ ގޮތުގައި، މިދިޔަ އަހަރުގެ އޭޕްރިލް މަހާއި މި އަހަރުގެ މެއި މަހާ ދޭތެރޭ 'އޮޅުހިޔާ' އަށް 3.4 މިލިއަން ރުފިޔާ ވަނީ ޚަރަދުކޮށްފައެވެ.