ގައިދީންނަށް ތަމްރީނު ޕްރޮގްރާމް ހިންގަން މޯލްޑިވްސް ރެޑް ކްރެސެންޓް (އެމްއާރްސީ)އާއި މޯލްޑިވްސް ކަރެކްޝަނަލް ސާވިސް (އެމްސީއެސް)އާ ދެމެދު އެއްބަސްވުމެއްގައި މިއަދު ސޮއިކޮށްފިއެވެ.
މި އެއްބަސްވުމުގެ ދަށުން، ރެޑް ކްރެސެންޓުގެ ގާބިލިއްޔަތުކަން ހުރި މިންވަރަކުން އެ ފަރާތުން ހިންގާ ޕްރޮގްރާމްތަކުގެ ތެރެއިން ކަރެކްޝަންސްއިން އެދޭ ތަމްރީން ޕްރޮގްރާމްތައް، ކަރެކްޝަންސްގެ އޮފިސަރުންނާއި މުވައްޒަފުންނާއި ގައިދީންނަށް ކުރިއަށްގެންދިޔުމަށް ވަނީ ނިންމައިފައެވެ.
ކަރެކްޝަންސްއިން ބުނީ، މި އެއްބަސްވުމުގެ ދަށުން ތަމްރީން ޕްރޮގްރާމްތައް ހިންގަން ފެށުމުން އެ އިދާރާގެ އޮފިސަރުންނާއި މުވައްޒަފުންގެ ފަންނީ ގާބިލުކަން އިތުރުވެ، މަސައްކަތުގެ ފެންވަރު ތަރައްގީވާނެ ކަމަށެވެ.
އެމްސީއެސް އާއި އެމްއާރްސީއާ ދެމެދު ގައިދީންނަށް ތަމްރީން ޕްރޮގްރާމް ހިންގަން އެއްބަސްވުމެއްގައި ސޮއިކުރުން -- ފޮޓޯ/ ކަރެކްޝަންމީގެ އިތުރުން ގައިދީން އިޞްލާޙުކޮށް، މުޖުތަމަޢަށް ބޭނުންތެރި ބައެއްގެ ގޮތުގައި އަނބުރާ ރުޖޫޢަކުރުމަށް ކުރެވެމުންދާ މަސައްކަތްތަކަށް ބޮޑު ކުރިއެރުމެއް ލިބޭނެ ކަމަށް ވެސް އެ ޚިދުމަތުން ފާހަގަކުރެއެވެ.
ފާހަގަކުރެވޭގޮތުގައި، ޖަލުތަކުގެ ނިޒާމު އިސްލާޙުކޮށް ކުށް މަދު މުޖުތަމަޢެއް ބިނާކުރުމަށްޓަކައި، ކަރެކްޝަންސްއިން ގައިދީންނާއި ޖަލު އޮފިސަރުންނަށް ޚާއްޞަ ތަމްރީނުތައް ދޭތެރެއަކުން އަންނަނީ ހިންގަމުންނެވެ.
ގައިދީން ރީހެބިލިޓޭޓްކޮށް އަނބުރާ މުޖުތަމަޢަށް ނެރުމަށްޓަކައި ދީނީ ތަޢުލީމާއި، އަސާސީ އަދި އައިސީޓީ ކޯސްތަކުގެ އިތުރުން ކާޕެންޓްރީ، އިލެކްޓްރިޝަން، ފެހުން، އަދި ދަނޑުވެރިކަން ފަދަ މަސައްކަތްތެރިކަމުގެ ހުނަރުތައް ދަސްކޮށްދީ ސެޓްފިކެޓް ހާސިލުކުރުމުގެ ފުރުޞަތު ފަހިކޮށްދިނުމަށް ތަފާތު ވޯކްޝޮޕްތަކާއި ތަމްރީނުތައް ބާއްވައެވެ.
މީގެ އިތުރުން މަސްތުވާތަކެތިން ސަލާމަތްވުމުގެ ޕްރޮގްރާމްތަކާއި ނަފުސާނީ އަދި އިޖުތިމާޢީ ކައުންސިލިން ވެސް ގައިދީންނަށް ފޯރުކޮށްދެއެވެ.