މާލޭގައި ފުޅާދާއިރާއެއްގައި ބަނގުރަލުގެ ވިޔަފާރިކުރަމުން ދިޔަ މައްސަލައިގެ ތުހުމަތުގައި ދެ ބިދޭސީއަކު ފުލުހުން ހައްޔަރުކޮށްފިއެވެ.
މި މައްސަލައިގައި ހައްޔަރުކޮށްފައިވަނީ އުމުރުން 44 އަހަރުގެ އިންޑިއާ ރައްޔިތެއް ކަމަށްވާ ޕެރުމަލް މަޔަވަންއާއި، އުމުރުން 35 އަހަރުގެ ސްރީލަންކާ ރައްޔިތެއް ކަމަށްވާ ތުވަން ރިސްލިން ފަލީލްއެވެ.
ފުލުހުން ބުނި ގޮތުގައި، މި ދެ މީހުން ހައްޔަރުކޮށްފައިވަނީ މިދިޔަ ބުރާސްފަތި ދުވަހު ޑްރަގް އެންފޯސްމަންޓާއި ކައުންޓާ ނާކޮޓިކްސް އިންޓެލިޖެންސް ގުޅިގެން ހިންގި ޚާއްސަ އޮޕަރޭޝަނެއްގައެވެ.
މި އޮޕަރޭޝަންގައި މާލޭގެ ގެއެއް ބަލައިފާސްކޮށް ގިނަ އަދަދެއްގެ ތަކެތި ހޯދާފައިވެއެވެ. އެގޮތުން، ބަނގުރާކަމަށް ބެލެވޭ އެއްޗެއް ހުރި 500 އެމްއެލްގެ 1،677 ފުޅިއާއި، ފަސް ލީޓަރުގެ 23 ފުޅީގެ އިތުރުން މަސްތުވާތަކެތިކަމަށް ބެލެވޭ އެއްޗެއް ހުރި ދެ ރަބަރު ޕެކެޓު ފެނިފައިވާ ކަމަށް ފުލުހުން މައުލޫމާތުދެއެވެ.
މި މީހުންގެ މައްޗަށް ތުހުމަތުކުރެވެނީ ގަވާއިދާ ހިލާފަށް ބަނގުރާ ގެންގުޅެ، އޭގެ ވިޔަފާރިކުރުމުގެ އިތުރުން މަސްތުވާތަކެއްޗާއި ބަނގުރާ ބޭނުންކުރުމެވެ.
މައްސަލައިގެ އިޖުރާއަތްތައް ފުރިހަމަކުރުމަށް ފަހު، އިމިގްރޭޝަން ގާނޫނުގެ ދަށުން ފިޔަވަޅުއެޅުމަށް މި ދެ މީހުން ވެސް މިހާރު ވަނީ މޯލްޑިވްސް އިމިގްރޭޝަނާ ހަވާލުކޮށްފައެވެ. މި މައްސަލަ ފުލުހުން ދަނީ އިތުރަށް ތަހުގީގުކުރަމުންނެވެ.
މަސްތުވާތަކެތީގެ މިފަދަ މައްސަލަތަކުގައި ރާއްޖޭގައި އުޅޭ ބިދޭސީންގެ ދައުރު ވަރަށް ބޮޑުކަން ފާހަގަކޮށްލެވެއެވެ. އަދި ވަކިން ޚާއްސަކޮށް ބަނގުރަލުގެ މައްސަލަތަކުގައި ހައްޔަރުކުރާ ބިދޭސީންގެ އަދަދު މި ފަހަކަށް އައިސް ވަނީ އިތުރުވެފައެވެ. އޭގެ ތެރޭގައި ބަންގްލަދޭޝް މީހުން ގިނައެވެ.